Daniyel yunaniŋkeere 1

Tornde Azariya

24Yimɓe tato ɓe'e, Ananiya, Azariya e Miisayel, ɗonno ngaanca nder yiite, ɓe ɗon ngima ngam maŋgtugo Jawmiraawo Allah. 25Nden Azariya ummi dari caka yiite, ɓaŋgti do'a ka'a:

26“Yettoore woodani ma, an Jawmiraawo Allah kaakiraaɓe amin. A he'i yimɓe maŋgta e teddina innde ma haa foroy.

27A ɗon waɗana min adilaaku foroy, kuuɗe ma fuu ɗe gooŋɗuɗe, laabi ma fuu ɗi darnuɗi, kiitaaji ɗi a ta'i fuu ɗi ngalaa faasikaare.

28Ooho, fakat a adiliijo nder torraaji ɗi a ukki dow amin e dow Urusaliima, wuro kaakiraaɓe amin seniiŋgo. A hiiti min daliila hakkeeji amin.

29Ngam min ɗowtanaaki ma, min ngaɗi ko wooɗaay bee daaytaago ma, min accaay boo waɗgo aybeeji.

30Min nanaay umrooje ma, min ɗowtanaaki ɗe e min cali huuwtinirgo ɗe. Ammaa an, a hokki min ɗe ngam min keɓra hayru bee maaje.

31Ko ngaɗɗa min fuu ɗum kaanduɗum e torra ka ukkanɗa amin fuu haandani min.

32A ɗali min haa juuɗe konne'en amin, faasiki'en, nyidduɓe e tuurtaniiɓe ma. A ɗowi min haa laamiiɗo mo walaa adilaaku, ɓurduɗo hallugo haa duniyaaru fuu.

33Kanjum waɗi jonta, minin ɗowtaniiɓe ma, rewooɓe ma, min potaay maɓɓititgo hunnduko amin, min laatake toskaaɓe e sakliiɓe.

34Ammaa Jawmiraawo, bee innde ma teddunde, taa wudin min ngam foroy! Taa fiistu alkawal ma bee amin.

35Taa salan min mbooɗeeŋga ma, ngam daliila Ibrahiima, Isiyaaku e Yaakubu jagganiiɓe ma hoolaaɓe.

36A iinani ɓe ruutu ɗuuɗɗo bana koode haa asama, bana njaareendi haa daande maayo. 37E boo, jonta Jawmiraawo, min famarɓe ko ɓuri jama'aaje goɗɗe, min toskake ko ɓuri ummaatooje haa duniyaaru fuu ngam daliila aybeeji amin.

38Hannde boo, min ngalaa laamiiɓe, min ngalaa annabi'en e ɗowooɓe. Min potaay hokkugo dabbaaji kirseteeɗi malla lii'aago dokke kuroori malla uurdi. Walaa pellel ceniiŋgel ngam waddango ma ɓiɓɓe leɗɗe arane ɗe min teɓi ngam min keɓa yaafuye ma.

39Koo non boo, Jawmiraawo, jaɓɓu min ngam mawnitaare amin yewaama e hakkiilo amin leestaama,

40bana to min ɗon lii'o guleteeɗi, njawɗi, ga'i e mborton ɗuuɗkon paykon. Kirseteeŋga nga mi lii'ante hannde nde'e, ɗum tuubu amin, jaɓ nga, ɗal min tokke haa ragare. Fakat hooliiɓe ma laatataako toskiiɓe haa foroy.

41Jonta kam, min tokkoto ma bee ɓernde amin fuu e min leestante e min tefan gondal ma.

42Taa ɗal min nder toskaare, ammaa laar min bee enɗam, hollu min mbooɗeeŋga ma maŋnga!

43Hisnu min bana ɓooyma bee kuuɗe ma kayɗiniiɗe, waŋginan min Jawmiraawo innde ma teddunde.

44E torruɓe min, minin ɗowtaniiɓe ma, ɓe tosko! Ɓe laato ɗawraaɓe laamu fuu, semmbe maɓɓe boo sampite!

45Hollu ɓe, an tan woni Jawmiraawo, Allah tedduɗo dow lesdi fuu!”

Yimre soobiraaɓe Daniyel tato

46Maccuɓe laamiiɗo, sakkinɓe soobiraaɓe tato nder yiite, accaay loowgo nder maage leɗɗe e kuuje feere feere ngam nge ulga, 47ɗemɗe yiite man ɗon ummo deydey ko waɗata meetir noogas e nayi dow ɓolinirde. 48Ɗemɗe yiite man ɗon taari nge e ɗon wula Baabila'en wonɓe les maage. 49Ammaa fuu e non malaa'ikaajo Jawmiraawo jippino nder yiite kommbi Azariya e soobiraaɓe mum. O yerɓi nge gal yaasi 50e o laatini yiite nge'e babal peewŋgal bana to henndu marndu saawawre ɗon fuufa. Yiite nge'e meemataa ɓe sam, nge torraay ɓe, nge ɓillaay ɓe sam. 51Sey nder yiite man, soobiraaɓe tato go ɓaŋgti yimre hawtaade ngam teddingo e maŋgtugo Allah. Ɓe ɗon mbi'a:

52“Yettoore woodani ma, an Jawmiraawo Allah kaakiraaɓe amin! A he'i maŋgteego, sey tedduŋgal ma waŋga haa foroy. Jawmiraawo, innde ma seniinde e teddunde. A he'i maŋgteego bee sawtu mawɗo e tedduŋgal ma waŋga haa foroy.

53Min ngetti ma nder haykaliiru maaɗa seniindu, marndu tedduŋgal. A he'i maŋgteego bee sawtu e tedduŋgal ma waŋga haa foroy.

54Min ngetti ma, an jooɗiiɗo dow keruba'en, an mo daarɗe mum ɗon njotto haa luggeeŋga mbeela. A he'i maŋgteego bee sawtu e tedduŋgal ma waŋga haa foroy.

55Min ngetti ma, an jooɗiiɗo dow koromwal laamu ma. A he'i teddineego jamum e tedduŋgal ma waŋga haa foroy.

56Min ngetti ma, an gonɗo dow asamanji! A he'i maŋgteego e tedduŋgal ma waŋga haa foroy.

57Ngette Jawmiraawo, onon tagle Allah!