Bataakewol Yeremiya 1
1
Kakkilane labbi
1On laati aybuɓe heedi Allah. Kanjum waɗi laamiiɗo Nabukodonosor mo lesdi Baabila naŋngi on, yahri on haa Baabila. 2To on njottake ton, on neeɓoyan duuɓi ɗuuɗɗi haa yotto gide joweeɗiɗi. “Ammaa, ɓaawo wakkati maajum, Jawmiraawo wi'i, o wurtinan on jam.” 3Paame jonta on tammi laargo haa lesdi Baabila ɗowanteeɓe waɗaaɓe bee leɗɗe, bee kaŋŋeeri malla bee ceede. Ɓe ɗon ndoondi ɓe dow balbe to ɓe ɗon njaha mooɓtirde, ɓe kulna ummaatooje. 4Kakkile taa laatooɗon bana hoɗɓe ɓe'e. Kakkile, taa diina maɓɓe esta on. 5To on ngi'i ummaatoore nde'e ɗon sujida haa meema lesdi ɓaawo e yeeso labbi ɗi'i, mbi'e nder ɓerɗe mon: “Jawmiraawo, an tan he'i sujidaneego.” 6Ngam Jawmiraawo ɗon wi'a: “Malaa'ikaajo ɗon wondi bee mooɗon, o hisnan on.”
Walaa ko labbi mbaawataa waɗgo
7Ɗum cehoowo sehi labbi ɗi'i. No ɗi pawnira bee kaŋŋeeri malla ceede fuu, ɗi nafataa sam e ɗi mbaawataa wolwugo. 8Haa maaji, yimɓe ɗon koocira kaŋŋeeri bana pawne haa paanyo debbo e bee kaŋŋeeri man, ɓe ɗon ngaɗana ɗi meetalol. 9Ndego, liman'en suklaniiɓe labbi man kooca kaŋŋeeri e ceede jo'inaaɗum ngam labbi man, ɓe kuuwtinira ngam haaje maɓɓe malla ɓe caaho ɗum ajaba'en. 10Labbi leɗɗe pawnaaɗi bee cardi e ceede, ɓe ɗon ɓorna ɗi bana to ɗum yimɓe! 11Ammaa ɗi mbaawataa haɓtaago e puunndi e mooƴu. To ɓe ɓorni ɗi limce caɗɗe, 12sey ɓe piɗɗa collaaje haykaliiru takkotooɗe dow geese maaji. 13Bana mo dawranta lesdi ndi'i, ɗi ɗon njogi sawru laamu, ammaa ɗi mbaawataa boo mbargo toonyiiɗo ɗi. 14Goɗɗi caka maaji ɗon njogi laɓi malla fe'irde haa juŋngo maaji, ammaa ɗi mbaawataa haɓtaago to sooje'en malla to wuyɓe kippi ɗi. Naa ɗum ɗowanteeɓe, ngam maajum taa kule ɗi.
15Labbi ɗi yimɓe njo'ini nder haykaliiru nafataa bana taasaaje pusaaɗe. 16Gite maaji ɗon cuddi bee collaaje ɗe nastooɓe umminta bee kosɗe mum'en to ɓe ɗon ngiilo. 17To goɗɗo toonyake laamiiɗo, ɓe naŋnga ɗum ɓe kiito ɗum kiita mbareeki. Liman'en boo ɗon ngaɗa bana non ngam faddaago taa wuyɓe ngujja labbi ɗi'i, ɓe ɗon cemmbiɗina dammuɗe cuuɗi maaji bee paaɓi e kalji. 18Ɓe ɗon kuɓɓa pittirlaaji boo ko ɓuri haaje maɓɓe kamɓe, ammaa labbi man ndaarataa ko ngoota. 19Ɗi ɗon nanndi bee daŋraŋge nder haykaliiru maɓɓe, nder mum fuu nyoli. Gilɗi lesdi ɗon nyaama ɗi bana nyaamirta limce maaji, ammaa kanji kam ɗi kaanjitittaako. 20Yeeso maaji fuu ɓalwi bee ɓalineeri cuurka ngonka nder haykaliiru. 21Bilwili, collon zawleeji e colli goɗɗi ɗon njooɗo dow ɓanndu maaji malla dow hoore maaji, non boo paatuuji ndego. 22kanjum anndinta on ɗi laataaki ɗowanteeɓe. Ngam maajum taa kule ɗi.
23E kaŋŋeeri ndi ɓe takki dow maaji ngam ŋarnugo ɗi, to ɓe piɗɗaay ndi, to ndi furɗi, ɗi mbaawataa aynugo ɗelko maaji. Yaake nde ɓe ɓolina ɗi, ɗi anndaa fuu! 24Ɓe njoɓani ɗi caɗɗum, ammaa ɗi ngalaa yoŋki. 25Nde ɗi mbaawataa yahgo, sey ɓe ndoondo ɗi dow balbe. Kanjum hollata ɗi ngalaa saman. Kanjum boo he'i semtingo suklaniiɓe ɗi. 26To wooru caka labbi man do'ake, sey ɓe ummina ndu. To ɓe ndarni ndu, ndu waawataa yahgo bee hoore maaru. To ndu wuurake, ndu waawataa dartaago. Ammaa ɓe ɗon ngaddana maayɓe dokke ɗe ɓe lii'anto labbi ɗi'i! 27Fahin boo kirseteeɗi ɗi liman'en ngaddanta ɗi, ɓe coorrita ɗi ngam hoore maɓɓe. Malla boo rewɓe liman'en man ngaɗan jorŋgel dow hokkugo laafuɓe e wuustuɓe. 28Koo rewɓe ɓe cenaaki ngam ɓe ɗon mari al'aada maɓɓe malla ngam ɓe ɓesni ɗon meema ɗi. Bee misaaluuji ɗi'i paame naa ɗum ɗowanteeɓe e taa teddine ɗi.
Ɗum boofol ewnaago labbi ɗowanteeɓe
29Noy ɓe ewnorto kuuje gadaaɗe bee leɗɗe, kaŋŋeeri malla cardi ɗowanteeɓe, alhaali boo ɗum rewɓe lii'anto ɓe dokke? 30Haa nokkuuje ɓe ndewata labbi ɗi'i, liman'en man ɗon njooɗi bana haa maayiti, limce ɗon ceeki, gaasa e wakkude ɗon laɓi, hoore suddaaki. 31Ɓe ɗon ciika bana dabbaaji ladde yeeso labbi ɗi'i bana to ɓe ɗon haa yeeso nyaamdu maayiti. 32Sakkomaa liman'en ɗon ɓorta limce labbi ɗi ngam ɓe ɓorna rewɓe e ɓikkoy maɓɓe. 33Fahin boo to a waɗani labbi man kalluɗum malla booɗɗum, kanji kam ɗi mbaawataa waataago bana ɗi mbaawataa hokkugo malla ittango laamiiɗo sumsum. 34Non boo ɗi mbaawataa hokkugo goɗɗo ceede ngam o riska. E to a haɓɓi alkawal bee maaji bee togayeere, koo to a hiɓɓinaay togayeere man, labbi man mbaawataa ƴamtugo. 35Ɗi mbaawataa hisnugo koo moy diga juuɗe maayde malla maa teetingo mo walla semmbe haa juuɗe ɓurɗo ɗum. 36Ɗi ngalaa baawɗe wumtingo malla wurtingo goɗɗo diga ɓillaare, 37ɗi njurmintaa debbo jurumɗo, ɗi mboonantaa atiimeejo. 38Kuuje leɗɗe cuddaaɗe bee kaŋŋeeri malla ceede, saman mum'en fotan bee tapaaje ittaaɗe haa hooseere. Toskaare woodani suklaniiɓe ɗi! 39Moy foti foondugo ɗi bee ɗowanteeɓe?
40Woodi ko ɓurata ɗu'um: Yimɓe Baabila maa ɗon cemtina ɗi. To ɓe ngi'i paho, ɓe njahra mo haa lawru maɓɓe Beel, ɓe toro ndu hokkita paho hunnduko mum bana to Beel man ɗon faama! 41Ammaa ɓe mbaawataa numgo ndikka ɓe acca labbi ɗi. Kanjum woni faataare maɓɓe. 42Rewɓe boo ɗon ngaɗa kanndawol bee ɓoggol e ɓe ɗon njaha dow laawol ngam wulgo dumo. 43To goɗɗo caalotooɗo noddi gooto caka maɓɓe e waaldi bee maako, kaŋko go, o toskina keeddu maako ngam walaa goɗɗo tefi mo, walaa piistuɗo kanndawol maako. 44Ko laarani labbi ɗi'i fuu, ɗum fewre. E noy innu numata ɗum ɗowanteeɓe?
45Ɗum sehooɓe e tappooɓe jawe ngaɗi ɗi. E ɗi ɗon bana no sehooɓe ɓe'e ngiɗi ɗi laato: Kuuje tan, naa huunde feere. 46Tappuɓe ɗi man maa ngeeɗataa haa ɓura yimɓe luttuɓe. 47Noy kuuje cehaaɗe laatorto ɗowanteeɓe? Yimɓe ɓe'e ɗon ɗalana waranɓe ɓaawo maɓɓe miiluuji cemtuɗi. 48To konu malla masiibo tiitake labbi ɗi'i, liman'en ngaɗan sawari ngam anndugo toy ɓe cuuɗoto bee maaji fuu. 49Labbi ɗi'i kam mbaawataa daɗnugo ko'e maaji to konu fuɗɗi malla masiibo waɗi. E ko waɗi en paamataa ɗi laataaki ɗowanteeɓe? 50Kanjum waŋginta leɗɗe pawnaaɗe bee cardi malla bee ceede, ɗum fewre meere. Ummaatooje e laamiiɓe paaman ɗi laataaki ɗowanteeɓe, ammaa ɗum kuuje ɗe yimɓe cehi e haa maaje walaa ko nanndi bee Allah. 51Ɗum laaɓi, naa ɗum ɗowanteeɓe. E moy saloto anndititgo ɗum?
52Ɗi mbaawataa tabitingo laamiiɗo dow lesdi mum e ɗi mbaawataa toɓnugo ndiyam ngam yimɓe. 53Ɗi mbaawataa ta'ugo kiita dow kuuje maɓɓe malla hisnugo kiitaaɗo bee faasikaare. Ɗi mbaawataa koo ɗume 54bana colli piiranɗi hakkunde asama e lesdi. To nokkuure rewgo labbi pawnaaɗi bee kaŋŋeeri ɗon wula, liman'en maaji ndogga, cuuɗo, ammaa kanji kam ɗi ndillataa, ɗi ngula bana daŋraŋge suudu. 55To laamiiɗo konneejo hippake ɗi bee mooɓe mum, ɗi ngalaa dabare haɓtaago. 56E noy njaɓreten malla tammotooɗen ɗum ɗowanteeɓe? Labbi pawnaaɗi bee kaŋŋeeri e ceede mbaawataa hisugo wuyɓe.
Walaa ko labbi nafata
57To wuyɓe man naŋngi ɗi, luuwi kaŋŋeeri e ceede malla limce ɗe ɓe cuddiri ɗi, to ɓe ndilli bee ko ɓe kooci, labbi ɗi'i kam mbaawataa haɓtaago. 58Laamiiɗo laatiiɗo cuusɗo malla kuuwruɗum nafanɗum jawmum, ɗum fuu ɗum ɓuran labbi laatiiɗi pewe meere ɗi'i. Dammugal kisnanŋgal ko woni nder saare malla daŋraŋgal haa saare laamu ɓuran labbi laatiiɗi pewe meere ɗi'i. 59Naaŋge, lewru e koode fuu ɗon ndokka njayawri e ɗon mari nafuuda haa ko ɗum halfina. 60Ma'ere kayre boo, to ma'i, ɗum wooɗi laareego, non boo henndu, to fuufi koo toy fuu. 61E non boo duule: To Allah umri ɗe, ɗe kuuɓidina lesdi, ɗe ɗon kuuwa ko Allah wi'i ɗe fuu. 62Felmaaŋgo ngo Allah nulata diga dow ngam wulgo kooseeje e ladde, kaŋgo boo ɗon huuwa umroore nde Allah umri ngo. Ammaa tafol ngol ɓe ndokki labbi ɗi'i maraay ŋarol malla semmbe kuuje ɗe'e. 63En potaay wi'go malla nanndingo ɗi bee ɗowanteeɓe, ngam ɗi mbaawataa hisnugo malla woonango ɓii Aadamaajo. 64Paame ɗi laataaki ɗowanteeɓe, taa kule ɗi koo seɗɗa.
65Ɗi mbaawataa naalugo malla barkiɗingo laamiiɓe 66malla hollugo ummaatooje kaayeefiiji nder asama malla yaynugo bana naaŋge malla bana lewru. 67Koo dabbaaji ladde maa ɓuran ɗi daraja, ngam kanji, ɗi ɗon mari baawɗe doggugo ngam ɗi cuuɗo, ɗi kisna ko'e maaji! 68Walaa ko hollata en ɗum ɗowanteeɓe! Taa ndokke ɗi daraja koo seɗɗa.
69Haa ngesa kurci, kulnirga colli walaa ko aynata. Non boo labbi ɗi yimɓe pawni bee kaŋŋeeri e ceede. 70En poti foondugo labbi ɗi'i bee wumre gi'e nder ngesa, sonndu koo nduyeeru wara jooɗo dow maaru malla bana maayɗo cakkinaaɗo nder nyiɓre nder yenaande. 71Wakkati to on ndaari limce maaji caɗɗi ɗon timma, ngarta tekke, on paaman ɗi laataaki ɗowanteeɓe. Kanji maa gilɗi tammi nyaamgo ɗi, ɗi cemtinte haa lesdi maaji. 72Goɗɗo mo walaa lawru, ɗowtaniiɗo Allah, ɓuran labbi ɗi'i ngam kaŋko o hisan toskineego.
Currently Selected:
Bataakewol Yeremiya 1: FBDC
Highlight
Copy
Compare
Share
Want to have your highlights saved across all your devices? Sign up or sign in
DEFTERE ALLAH © Alliance Biblique du Cameroun, 1994.