Suzan 13
13
Yiide Suzan naŋngi ndotti'en ɗiɗo
1Yahuuduujo bi'eteeɗo Yowakim ɗonno jooɗi haa Baabila. 2O te'i debbo feere bi'eteeɗo Suzan ɓii Helkiya. Debbo oo o ŋarniiɗo, o kulɗo Allah boo. 3Saaro'en maako ɓe nuɗɗinɓe, ɓe mawninno mo nder ɗowtaare heedi Tawreeta Muusa. 4Yowakim mari jawle ɗuuɗɗe. O mari jarne kommbi saare maako. Yahuudu'en ɗuuɗɓe ɗon ngara haa maako ngam heɓgo sawari ngam o ɓurduɗo tedduŋgal caka maɓɓe. 5Hitaande nde'e, ndotti'en ɗiɗo nder ummaatoore Yahuudu'en suɓaama ngam laataago hiitooɓe. Dow maɓɓe Allah wolwi wakkati o wi'i: “Sooynde adilaaku ummori gal Baabila, nde tokkori boo dow ndotti'en suklaniiɓe kiita, kamɓe haanduɓe laataago yimɓe ardiiɓe ummaatoore.” 6Ndotti'en ɓe'e mboowi yahgo haa Yowakim e marɓe haaje hiiteego fuu ɗon njaha tawa ɓe ton. 7To naaŋge wuli, yimɓe fuu kuuca, Suzan ɗon nasta haa jarne gorum haa o waanca ton. 8Ndotti'en ɗiɗo go ɗonno ndaara mo tum haa nokkuure nde'e haa yiide maako naŋngi ɓe. 9Hakkiilo maɓɓe jiiɓi, ɓe luuti laawol Allah, ɓe acci tokkaago laawol umrooje maako.
10Ɓe ɗiɗo fuu, ɓernde maɓɓe ɗon ɓili dow Suzan, ammaa ɓe mbi'mbi'tiraay ko ɓillata ɓe 11ngam koo moy maɓɓe ɗon semta wi'go oya no o yiɗi waaldugo bee maako. 12Nii non, nde weeti fuu, koo moy ɗon tefa dabare yi'go mo. 13Nyannde feere nde naaŋge wuli, ɓe ngurti saare Yowakim, ɓe njaɓɓotiri bee wi'wi'tirgo: “Kuucen haa men, ɗum wakkati hacitaago”. 14Ammaa nde ɓe cenndiri, koo moy lori haa saare Yowakim go. Nde ɓe potti ton, ɓe ƴamtotiri hujja e koo moy wi'i tanum yiide maako ngam Suzan. Nden kam, ɓe carwootiri noy ɓe ngiidata bee maako to o ɗon feere maako.
Ndotti'en kaadani Suzan sooynde semteende
15Ɓe ɗon ndeeni wakkati. Nyannde feere, Suzan yehi haa jarne gorum bana ko woowa, horɓe ɗiɗo tan ɗofti mo. Nde ɗum wakkati gulɗum, o yiɗno yiiwaago. 16Walaa innu fuu haa ton sey ndotti'en ɗiɗo suuɗiiɓe, aynanɓe mo. 17Suzan neli horɓe mum tefana mo nebbam e uurle, o umri ɓe boo, ɓe maɓɓa dammuɗe nastirɗe mawɗe haa o yiiwo. 18Ɓe ngaɗi ko o wi'i, ɓe ngurtori gal dammugal sera waddoygo ko jaagorɗo maɓɓe ƴami ɓe, ɓe ngi'aay ndotti'en suuɗiiɓe. 19Nde ɓe ngurti, ndotti'en go ngurti haa ɓe cuuɗino, ɓe njaawani Suzan, 20ɓe mbi'i mo: “Dammuɗe nokkuure nde'e ɗon maɓɓi e walaa gi'anɗo en. Minin boo, min ɗon cuuni ma. Jaɓ waaldugo bee amin. 21To a sali boo, min kaadante bee wi'go min tawi ma bee sukaajo e a farti horɓe ma daliila man.”
22Suzan uumi, wi'i: “Ndaa mi nasti nder ɓillaare, walaa dabare wurtaago! To mi jaɓi ko on ngiɗi, mi hiitete kiita mbareeki ngam mi njeeni, to mi salake boo, mi daɗataa on. 23Ammaa ndikka on kaadanammi dow gooŋga am dow mi waɗa hakke yeeso Jawmiraawo.” 24Nden Suzan wooki bee semmbe. Ndotti'en go boo mbooki bee semmbe, ɓe ɗon kaadana mo. 25Gooto caka ndotti'en go doggi maɓɓiti dammuɗe jarne. 26Nde huuwooɓe wonɓe haa saare nani gookaali, ɓe portoyi gal dammuɗe sera haa ɓe ndaara ko waɗi Suzan. 27Ndotti'en go limti ɓe ko waɗi. Huuwooɓe go cemti ngam ɓe meeɗaay nango haala bana ka'a dow Suzan.
28Jaŋngo maajum yimɓe mooɓti haa saare Yowakim gorko Suzan, ndotti'en ɗiɗo go ngaroyi, ɗon annini hiitaago mo kiita mbareeki. 29Nde yimɓe fuu kawti, ɓe umri: “Sey ɓe ngadda Suzan ɓii Helkiya, debbo Yowakim”. Ɓe neli goɗɗo waddoya mo. 30O waroyi, o ɗon tokkotiri bee saaro'en maako e ɓiyiiko'en e deerɗiiko'en. 31O ŋarniiɗo masin. 32Hiitooɓe man, ɗum ndotti'en go, ɓe nyidduɓe, ɓe umri ɓe itta suddaare maako ngam ɓe keɓa ɓe ngi'a ŋarol maako haa ɓe cafta. 33Yimɓe maako bee warɓe laargo mo fuu ɗon mboya. 34Hiitooɓe go ummi caka yimɓe, njo'ini juuɗe muuɗum'en dow hoore Suzan. 35kaŋko boo o ɗon woya. Nder bojji maako, o tijji asama. Nder ɓernde maako, o ɗon hooli Jawmiraawo. 36Ndotti'en mbi'i: “Wakkati min ɗon ngiilo feere amin nder jarne gorko Suzan, debbo oo wardi bee horɓe maako ɗiɗo. O maɓɓi dammuɗe mawɗe ɗe jarne fuu e o farti horɓe maako. 37Woodi sukaajo ɗonno suuɗi haa ɗon, wurti ɓaditi mo, wari waaldi bee maako. 38Minin boo min ɗonno haa lonyoodu jarne man, sey min ndaari nyidduɗum ɗu'um, min njaawani ɓe.
39Min tawi ɓe ɗon mbaali ɓe fuu. Min mbaawaay naŋngugo sukaajo oo ngam o ɓuri min semmbe, o teeti o maɓɓitoyi dammugal jarne, o doggi, o daɗi. 40Ammaa min naŋngi debbo oo e min ƴami mo moy woni derkeejo oo. 41Ammaa o sali jaabaago min. Ndaa ko min ngiɗi anndingo on.”
Mooɓtirde fuu jaɓani ɓe ko ɓe mbi'i ngam ɓe ndotti'en nder ummaatoore e ɓe hiitooɓe boo. Suzan hiitaama kiita mbareeki. 42O wooki bee semmbe: “Allah duumiiɗo, a anndi ko suuɗi, a anndi boo kuuje fuu hiddeko ɗe waɗa. 43A anndi boo fakat ko yimɓe ɓe'e mbi'i dow am ɗum fewre. A ɗon laara, mi maayan, alhaali boo waala ko mbaɗmi, ɗum haadoore ɓe kaadani yam.”
Daniyel gooŋɗini Suzan
44Jawmiraawo nani do'a Suzan. 45Wakkati ɓe ɗon njahra mo haa ɓe mbara mo, Allah ummini Ruuhu Ceniiɗo haa sukaajo bi'eteeɗo Daniyel. 46O wooki bee semmbe, o wi'i: “Mi laatataako ceedoowo dow maayde debbo oo!” 47Yimɓe fuu ngayliti gal maako, ɓe ƴami mo: “Ɗume ngiɗɗa wi'go?” 48Suka dari caka maɓɓe, wi'i: “Onon Isra'iila'en on sooyɓe hakkiilo fuu na? On kiiti debbo nder ummaatoore mon kiita mbareeki bilaa dilgo yimɓe, bilaa tefgo gooŋga. 49Lorte haa nokkuure kiita! Worɓe ɓe'e, ɓe kaadani mo dow fewre!”
50Yimɓe fuu njaawɗi, lorti. Ndotti'en feere mbi'i Daniyel: “War, jooɗa caka amin e wi'i min ko numɗa ngam Allah hokki ma hikma yimɓe marɓe duuɓi.” 51Daniyel wi'i: “Cenndite ndotti'en ɗiɗo ɓe'e. Mi ƴaman ɓe feere feere.” 52Ɓe cennditi ɓe. Daniyel ewni ndottiijo arano, wi'i mo: “Ndottiijo keewɗo halleende, wakkati yoɓgo hakke ma ɗi ngaɗɗa ɓooyma yottake. 53A hiitori bilaa adilaaku, a haɓɓi adili'en, a yoofti aybinaaɓe. Jawmiraawo boo umri nii: Taa hiita kiita mbareeki adiliijo malla gooŋgaajo. 54Jonta boo, to gooŋga a tawtori Suzan bee sukaajo, wi'i min haa les lekki kiye tawɗa ɓe?” Ndottiijo go jaabi: “Haa les tanni.” 55Daniyel wi'i: “Yowwa, ndaa fewre nde tammi ittugo ma yoŋki! Fakat Allah umri malaa'ikaajo maako gooto o wara, o haɓɓe, o mbare.”
56Daniyel lorni oo kam e o umri ɓe ngadda oya boo. O wi'i mo: “Taaniraawo Kanaana naa taaniraawo Yahuuda, ŋarol debbo oo jiiɓi ma hakkiilo! Yiide ma dow maako majjini ma hakkiilo! 57Non on ngaɗi bee rewɓe laamu ɓooyma ngu Isra'iila, on mbaaldi bee maɓɓe ngam ɓe ɗon kula on. Ammaa debbo, koo gooto mo lesdi Yahuuda, jaɓanaaki on nyidduɗum ɗu'um! 58Jonta kam, wi'am haa les lekki kiye tawɗa ɓe?” Oo boo jaabi: “Haa les ibbi.” 59Daniyel wi'i mo: “Ndaa fewre nde hiitete kiita mbareeki, an boo! Fakat malaa'ikaajo Allah ɗon reeni, kaafahi haa juŋngo ngam hiitaago ma. O mbaran on, on ɗiɗo fuu.”
60Yimɓe mooɓtiiɓe fuu ngooki, ngetti Allah kisnanɗo hooliiɓe mo. 61Nden ɓe ngayliti dow ndotti'en ɗiɗo seedanooɓe fewre ɓe Daniyel naŋngi nder bolle muuɗum'en go. Ɓe kiiti ɓe kiita nganyaandi ka ɓe kiitino goɗɗo nder ummaatoore maɓɓe. 62Ɓe mbaɗi fodde umroore Tawreeta Muusa, ɓe mbari ɓe. Nyannde man, yoŋki mo walaa aybe hisnaama. 63Helkiya e debbo mum maŋgti Allah ngam daliila Suzan ɓiŋngel maɓɓe non boo Yowakim, gorko maako hawtaade bee asŋgol maɓɓe fuu ngam ɓe annditi walaa cemtiniiɗum haa ngeendam Suzan.
64Diga nyannde man, Daniyel boo heɓi daraja yeeso yimɓe.
Currently Selected:
Suzan 13: FBDC
Highlight
Copy
Compare
Share
Want to have your highlights saved across all your devices? Sign up or sign in
DEFTERE ALLAH © Alliance Biblique du Cameroun, 1994.