Baruk 1
1
Yahuudu'en Baabila neldi nelal haa Yahuudu'en Urusaliima
1Ndaa deftere nde Baruk ɓii Neriya, ɓii Masiya ɓii Sedesiya ɓii Hasadiya ɓii Hilkiya winndi haa Baabila. 2O winndi nde nder hitaande jowaɓre diga Baabila'en kippi e nguli Urusaliima, nyannde joweeɗiɗawre nder lewru jowaɓru. 3Baruk jaŋngi deftere nde'e yeeso Yekoniya ɓii Yowakim laamiiɗo Yahuuda e yeeso mooɓre warnde nango jaŋgde maajum. 4Jooɗiiɓe Baabila haa fomoonde maayo Sudi ngari fuu: Ministir'en, yerima'en laamiiɗo, baaba ci'e'en e yimɓe fuu diga pamaro haa mawɗo. 5Ɓe ɗonno mboya, ɓe ɗonno cuumo, ɓe ɗonno toro yeeso Jawmiraawo. 6Nden ɓe ngaɗi dokkal, koo moy fuu hokki ko waawi. 7Ɓe neldi dokkal man haa Urusaliima ngam limanjo Yowakim ɓii Hilkiya ɓii Salum e ngam liman'en woɗɓe e jama'aare wonnde bee maako haa Urusaliima.
8Diga nyannde sappo nder lewru Sivan, Baruk hooci paali ɗi ɓe koocuno nder haykaliiru Jawmiraawo, o yiɗi neldugo ɗi lesdi Yahuuda. Sedesiya ɓii Yusiya e laamiiɗo Yahuuda mbaɗno ɗi 9ɓaawo Nabukodonosor laamiiɗo Baabila dahno Yekoniya, mawɓe faada, gudi'en, ministir'en e jama'aare lesdi, yahri ɓe fuu Baabila.
10Egginaaɓe neldani yimɓe Urusaliima nelal nga'al: Min neldani on ceede ngam on cooda alud bee dabbaaji kirseteeɗi e guleteeɗi ngam yaafuye hakkeeji. On lii'ana Jawmiraawo kirsaaɗi e dokke. 11Tore boo ngam Nabukodonosor laamiiɗo Baabila e ngam ɓiɗɗo mum Baltazar. Tore Allah haa faɓɓina ɓe bana asama dow lesdi. 12Ngaɗe ɗum haa Jawmiraawo hokka min semmbe, hokkita min seyo, haa min ngeeɗa haa aynuki Nabukodonosor laamiiɗo Baabila e ɓiɗɗo mum Baltazar, haa min kuuwana ɓe duuɓi ɗuuɗɗi e haa min keɓa mo'ere. 13Tore boo Jawmiraawo Allah meeɗen ngam amin, ngam min ngaɗi aybe dow maako e haa jonta o ittaay tikkere maako saatunde dow amin. 14Min neldan on deftere nde'e haa njaŋngon nde yeeso yimɓe fuu nder Haykaliiru yaake juulde bukkaaji malla nder wakkati feere nde fottani on.
Do'a dahaaɓe
(Daniyel 9:4-19; Esira 9:6-7; Nehemiya 9)
Tuubu dow hakkeeji
15Ndaa ko mbi'oton: “Walaa ko min pelirta Jawmiraawo Allah meeɗen, ngam o adiliijo, ammaa enen en ɗon nder semteende, enen Yahuudu'en e jooɗiiɓe haa Urusaliima 16e laamiiɓe meeɗen, mawɓe faada meeɗen, liman'en meeɗen e kaakiraaɓe meeɗen. 17Gooŋga, en ngaɗi aybe yeeso Allah. 18En tuurti dow maako, en nanaay wolde Jawmiraawo Allah meeɗen yaake o wi'no en en tokko umrooje ɗe o hokki en. 19Diga nyalaade nde o wurtini kaakiraaɓe meeɗen diga Misra haa wargo hannde, en ɗowtanaaki Jawmiraawo, Allah meeɗen, en nanaay ko o wi'i. 20Ngam maajum bana en ndaari hannde, masiibo ɗon tokki en, non boo naaloore nde Jawmiraawo barri en bee hunnduko Muusa jaggiiɗo mum nyannde nde o wurtini kaakiraaɓe meeɗen diga Misra haa o hokka ɓe lesdi keewndi kosam e njumri. 21O neli annabi'en ammaa en nanaay ko o wi'i en bee hunnduko maɓɓe. 22Ammaa koo moy caka meeɗen fuu tokki numooji ɓernde muuɗum, rewi ɗowanteeɓe woɗɓe, waɗi kalluɗum yeeso Jawmiraawo Allah meeɗen.”
Currently Selected:
Baruk 1: FBDC
Highlight
Copy
Compare
Share
Want to have your highlights saved across all your devices? Sign up or sign in
DEFTERE ALLAH © Alliance Biblique du Cameroun, 1994.