1 Makabe 15
15
Laamiiɗo Antiyokus njoweeɗiɗaɓo winndani Simon
1Diga duuɗe Yunaniŋke'en, Antiyokus njoweeɗiɗaɓo ɓii laamiiɗo Demetiriyus arano neli bataakewol dow Simon, limanjo mawɗo e ardiiɗo ummaatoore Yahuudu'en e dow jama'aare fuu. 2Ndaa ko winnda nder bataakewol ngo'ol: “Laamiiɗo Antiyokus hoofni Simon, limanjo mawɗo e ardiiɗo ummaatoore bee jama'aare Yahuudu'en fuu. 3Faasiki'en njaɓti laamu kaakiraaɓe am, mi yiɗi annditingo baawɗe am dow laamu ngu'u ngam ngu warta bana ngu wa'no ɓooyma. Mi darni mooɓe sooje'en ɗuuɗɗe, mi taaskitini boo koommbooje konu bee balmi. 4Mi anniyi yahgo lesdi ngam hippaago nattinɓe ndi e wilɓe berniiji ɗuuɗɗi nder laamu am. 5Kanjum waɗi jonta mi tabitini ko mbi'noomi, mi wili garamaaji ɗi laamiiɓe ɓooyma ittani ma. Mi tabitini boo mo'e ɗe ɓe mo'ani ma. 6Mi duŋani ma tappugo ceede ma, ɗe kuuwan nder lesdi ma fuu. 7Sey Urusaliima e haykaliiru fuu ndimɗine. Balmi ɗi keɓɗa fuu, an jeyi e cuuɗi cemmbiɗɗi ɗi nyiɓɗa fuu, an dawranta ɗum. 8Diga jonta haa foroy, a rimɗinaama dow garaama jontaaha e tammiika wargo to ka laarani baytal laamu. 9To mi hoociti laamu lesdi am, mi hokkan on daraja makka, haa ma e haa ummaatoore ma e haa haykaliiru Urusaliima, duniyaaru fuu seedoto tedduŋgal mon.”
Antiyokus njoweeɗiɗaɓo hippi Tirifon haa Door
10Nder hitaande 174, Antiyokus hoɗoyi haa lesdi kaakiraaɓe mum. Mooɓe sooje'en fuu kawtani mo, sooje'en seɗɗa tan luttani Tirifon. 11Antiyokus taasni mo, o doggi o dilli haa Door haa daande maayo. 12O faami ɓillaaje ɓurti ɗuuɗgo dow maako ngam mooɓe sooje'en maako fuu ɗali mo. 13Antiyokus taari Door bee sooje'en yahooɓe bee kosɗe ujine teemerre e noogas, wa'iiɓe pucci boo ujine njoweetato. 14O taari berniwol man, koommbooje konu boo ɗon paki wakeere maayo. O ɓillani wonɓe nder berniwol haa lesdi e haa maayo, walaa nastanɗo walaa gurtanɗo.
Kesɗitinki alkawal bee Roma'en
15Nde Numeniyus e ɗoftuɓe ɗum ngartoyi Roma, ɓe ngaddi bataakeeji ngam laamiiɓe lesɗe ɗuuɗɗe. Ndaa ko winnda nder maaji: 16“Lukiyus, Kaygamma Roma'en, hoofni laamiiɗo Potolome. 17Wakiili'en Yahuudu'en ngari haa amin bana soobiraaɓe e bana wallooɓe ngam hesɗitingo alkawal e soobaaku ngu min kaɓɓi bee maɓɓe. Simon, limanjo mawɗo e jama'aare Yahuudu'en, kamɓe ɓen neli ɓe dow amin. 18Ɓe ngaddani min ndarganaawal kaŋŋeeri, saman maagal deydey kilo cardi teemeɗɗe jowi. 19Min ndawridi neldugo bataakewol haa laamiiɓe gure ɗuuɗɗe. Min ɗon ewno ɓe taa ɓe ɓillana Yahuudu'en, taa ɓe tefra ɓe konu nder gure maɓɓe malla nder lesdi maɓɓe, taa ɓe kawtana konne'en maɓɓe. 20Ɗum fottani min boo jaɓgo ndarganaawal ngal ɓe ndokki min. 21To faasiki'en ndoggi gure mum'en haa cuuɗo haa mon, naŋnge ɓe, ndokke ɓe limanjo mawɗo bi'eteeɗo Simon ngam o hiito ɓe fodde Tawreeta maɓɓe.”
22Kaygamma Lukiyus winndani bataakewol ngo'ol haa laamiiɗo Demetiriyus, haa Attal, haa Ariyarat, haa Arsas 23e haa gure ɗe'e: Samsame, Separta, Delo, Mindo, Sikiyon, Kariya, Samo, Pamfiliya, Likiya, Alikarnasso, Rodo, Faseli, Kos, Side, Arado, Gortina, Kinido, kiprus e Siren. 24Bataakewol ngo'ol neldaama boo haa Simon, limanjo mawɗo.
Antiyokus njoweeɗiɗaɓo fiisti kaɓɓootiral bee Simon
25Laamiiɗo Antiyokus ɗonno taari wuro Door, o ɗon nelda sooje'en maako kippo ngo, o ɗon tappa boo balmi konu. Tirifon maɓɓi ngo, walaa gurtanɗo walaa nastanɗo ngo. 26Simon neldi sooje'en mum waawɓe haɓre ujine ɗiɗo ngam walloygo laamiiɗo, o neldi boo cardi, kaŋŋeeri e balmi ɗuuɗɗi. 27Ammaa Antiyokus sali jaɓgo walliinde man, o fiisti ko ɓe kaɓɓotiri bee Simon e o hoociri mo bana konneejo. 28O neli Atenobiyus, “soobaajo laamiiɗo”, wi'a Simon koŋngol ngo'ol: “On ɗon njogi jonta gure Jaffa, Gezer e suudu Urusaliima semmbiɗndu ammaa ɗum gure laamu am, 29on luuwi ɗe. On ngaɗi bononndaaji ɗuuɗɗi nder lesdi fuu, on nyaami gure goɗɗe ɗuuɗɗe ɗe laamu am. 30Sey ndokkiton yam gure ɗe nyaamɗon e njoɓon yam garamaaji maaje ngam gure laataaki nder lesdi Yahudiya. 31To on calake boo, ndokke yam kilo cardi ujine sappo e tati, deydey saman gure man ngam ko mbonnuɗon haa gure man e boo garamaaji ɗi mi tokkoto ɗe. Sonaa non, min konoto on.”
32Nde Atenobiyus, “soobaajo laamiiɗo”, yotti Urusaliima, o hayɗini daliila jeynitaare Simon, njardukoy kaŋŋeeri e cardi dow taabe e nyaamruɗum boo. O yottini nelal laamiiɗo haa Simon. 33Simon boo jaabi mo: “Min nyaamaay wuro koo wooto nder lesdi njananndi e min koocaay jawle jananɗe. Min koociti lesɗe ɗe min ndoni haa kaakiraaɓe amin, ɗi konne'en amin njaɓti bilaa hujja wakkatiiji goɗɗi. 34Min naftori bososel ngam mi hoocita ndonŋgu kaakiraaɓe amin. 35Ko laarani gure Jaffa e Gezer ɗe ƴamtuɗa, yimɓe gure ngaɗi bononndaaji ɗuuɗɗi dow jama'aare amin e dow lesdi amin. Ammaa, min ndokkete kilo cardi ujine ɗiɗi e teemeɗɗe joweeɗiɗi ngam gure man.” Atenobiyus hokkaay mo jaawaabu. 36O lorti haa laamiiɗo, o ɗon ɓerni, o lornani mo boliiɗe Simon, o wi'i mo jeynitaare nde ɓe ngontiri, o limtani mo ko o yi'i fuu. Laamiiɗo tikki masin.
Kendebe, mawɗo ardiiɓe sooje'en hippoyi Yahudiya
37Tirifon nasti koommbowal, o doggi haa Ortosiya. 38Nden laamiiɗo Antiyokus ardini Kendebe mawɗo ardiiɓe sooje'en gure kommbi maayo. O halfini mo mooɓe sooje'en yahooɓe bee kosɗe e wa'ooɓe pucci, 39o hokki mo umroore waɗgo saŋngeere tiitotirnde bee Yahudiya. O umri mo boo o nyiɓto wuro Kederon e o semmbiɗina pareeje maago ngam o hippa jama'aare Yahuudu'en diga ton. Laamiiɗo gal wakeere mum boo ɗon taasna Tirifon.
40Kendebe yehi haa Jamniya e o fuɗɗi ɓillango Yahuudu'en: O ɗon hippo boo Yahudiya, o ɗon wartira ɓe naŋngaaɓe malla o ɗon mbara woɗɓe. 41O nyiɓti Kederon, o jo'ini sooje'en yahooɓe bee kosɗe e wa'ooɓe pucci, ɓe ɗon cuklani hippaago e fasugo dow laabi Yahudiya bana no laamiiɗo umri.
Currently Selected:
1 Makabe 15: FBDC
Highlight
Copy
Compare
Share
Want to have your highlights saved across all your devices? Sign up or sign in
DEFTERE ALLAH © Alliance Biblique du Cameroun, 1994.