1 Makabe 16
16
Ɓiɓɓe Simon parti Kendebe
1Yuhanna ummi diga Gezer haa o yaha o maatina baaba maako Simon ko Kendebe waɗi. 2Simon ewni ɓiyum'en mawniraaɓe ɗiɗo, Yahuuda e Yuhanna, o wi'i ɓe: “Min bee deerɗam'en, bee lenyol baaba am fuu, min kaɓi bee konne'en Isra'iila diga nderkaaku amin haa hannde. Min kaɓdi, nde ɗuuɗɗum min kisni Isra'iila. 3Jonta mi naywi, ammaa onon barka Allah, on ɗon nder sukaaku. Kooce babal am e ngal deerɗam'en, ndille, kaɓane ummaatoore men, Allah wallu on!”
4Yuhanna mooɓti nder lesdi maɓɓe sooje'en yahooɓe bee kosɗe e wa'ooɓe pucci deydey ujine noogas, nden o dilli haɓoygo bee Kendebe. Ɓe mbaali haa Moodin. 5Jaŋngo maajum fajira cub, ɓe njotti yayre. Haa ton sooje'en yahooɓe bee kosɗe e wa'iiɓe pucci ɗuuɗɓe, ngari potti bee maɓɓe. Maayo ɗon caka maɓɓe. 6Yuhanna e yimɓe mum ndari, taaski, tiiti konne'en. O faami sooje'en maako kuli taƴtugo maayo, nden o aarti o taƴti. Nde yimɓe maako ngi'i o taƴti, ɓe tokki mo. 7Yuhanna sennditi sooje'en mum, o darni wa'ooɓe pucci haa caka cak sooje'en yahooɓe bee kosɗe ngam konne'en wa'iiɓe pucci ɓuranno ɗuuɗgo. 8Ɓe puufi algaytaaji ngam fuɗɗugo haɓre e Kendebe jaalaama bee sooje'en maako fuu. Konne'en ɗuuɗɓe maayi nder konu man e luttuɓe ndoggi, cuuɗoyi nder suudu semmbiɗndu haa Kederon. 9Yahuuda naawnaama nder haɓre man, ammaa deerɗiiko Yuhanna taasni dogguɓe haa Kederon, wuro ngo Kendebe nyiɓti. 10Woɗɓe cuuɗoyi nder aynorɗi kommbi Asdod, haa kaywe. Yuhanna wuli wuro man, konne'en ujine ɗiɗo mbaraama. Ɓaawoɗon, Yuhanna lorti Yahudiya o jamo kelen.
Simon mbaraama e ɓiyum Yuhanna roni ɗum
11Potolome ɓii Abubos laati ardiiɗo mawɗo haa ngomna nder yayre Yeriko. O ɗon mari kaŋŋeeri e cardi ɗuuɗɗum, 12ngam o esiraawo Simon, limanjo mawɗo. 13Ɗum hokki mo eeleende ngam o laato ardiiɗo lesdi fuu. O nufi senndirgo bee Simon e ɓiyum'en bee ƴoƴre.
14Wakkati man, Simon boo ɗon sukli yiilaago gure lesdi man fuu, ngam faamgo haajeeji maɓɓe. O jippi haa Yeriko bee ɓiyiiko'en Matatiyas e Yahuuda, nder lewru sappo e go'ooru, waato lewru Cebat nder hitaande 177. 15Ɓii Abubos jaɓɓi ɓe e o weerni ɓe haa cuurel cemmbiɗŋgel bi'eteeŋgel Dok, ngel o nyiɓi. O ɗon suuɗi anniyaaji maako, o waddani ɓe nyaamdu ɗuuɗndu. Ammaa o suuɗi sooje'en nder saare man. 16Nde Simon e ɓiyum'en njari, nguyki, Potolome e yimɓe mum nasti, njaɓti balmi maɓɓe, ɓe kippoyi Simon haa suudu ndu o woni ngam nyaamgo, ɓe mbari mo kaŋko e ɓiyiiko'en ɗiɗo e woɗɓe nder tokkiiɓe mo. 17Potolome waɗi bana nii faasikaare nyiddunde, o waɗi halleende dow mbooɗeeŋga.
18Ɓaawoɗon, Potolome winndani laamiiɗo Antiyokus dow ɗum ko laati fuu. O ƴami mo boo o nelda mooɓe sooje'en ngam cemmbiɗina mo, o heɓa no o hokkira laamiiɗo gure e lesdi man. 19O neli yimɓe feere haa Gezer bee umroore mbargo Yuhanna. O winndani mawɓe ardiiɓe sooje'en ngam haa ɓe kawtana mo. O iinani ɓe kaŋŋeeri, cardi e caahuuji. 20Potolome neli fahin yimɓe woɗɓe haa Urusaliima, ngam ɓe nyaama wuro man e townde nde haykaliiru. 21Goɗɗo feere doggi haa Gezer bee law maatini Yuhanna no baaba maako e deerɗiiko'en fuu mbaraama e o wi'i mo: “Potolome neli yimɓe ngam ɓe mbare, an boo.”
22Habaru man sakli Yuhanna. Nde o faami ɓe ngiɗi mbargo mo, o naŋngi nelaaɓe go e o mbari ɓe.
23Luttuɗum taariha Yuhanna, kaɓe maako, jaalorɗe maako, nyiɓaalooji mahi cemmbiɗɗi e kuuɗe maako goɗɗe fuu, 24ɗum winndaama nder deftere kuuɗe limanku ɓaawo nde o roni laamu baaba maako.
Currently Selected:
1 Makabe 16: FBDC
Highlight
Copy
Compare
Share
Want to have your highlights saved across all your devices? Sign up or sign in
DEFTERE ALLAH © Alliance Biblique du Cameroun, 1994.