An Kadonongan ni Solomon 19
19
An Kalolongan kan mga Egipcio na Nagdara kan saindang Kagadanan
1Alagad an bakong diosnon na mga tawo padagos na nakamate kan saimong makuring kaanggotan sagkod sa kataposan. Aram mo na kun ano an saindang gigibohon bago ninda iyan ginibo. 2Aram mo na maski tinugotan nindang maghale an saimong banwaan, mabago sinda nin isip asin lalamagon sinda. 3-4Mantang nagmomondo pa an mga Egipcio, asin nananambitan sa mga lulubngan kan saindang mga gadan, nalingaw sinda kun tadaw ta siring an nangyari, kaya naggibo sinda nin saro pang kalolongan; linamag ninda an mga tawong pinakimaherakan nindang maghale sa paniwala na nagdurolag sinda. Ginibo ninda ini huli ta kabtang ini kan padusa na maninigo sainda, tanganing magtios sinda kan iba pang mga kasakitan na dapat nindang akoon. 5Kaya mantang nagpapadagos sa pagbaklay an saimong banwaan, nakanumpong an mga Egipcio nin nalalaen na kagadanan.
Inantabayan saka Iningatan nin Dios an Saiyang Banwaan
6Sa saimong pagboot nabago an naturalesa kan bilog na kinaban, tanganing dai mapahamak an saimong banwaan. 7Nahiling ninda an panganoron sa saindang kampo asin an mamarang daga na dating igwa nin tubig. Igwa nin madoot na kapantayan sa pagultanan kan anggot na mga alon kan Dagat na Pula, kaya nagin madali an saindang pagbalyo. 8Nakabalyo an saimong banwaan sa irarom kan saimong pangataman. Pakatapos na mahiling an dakulang ngangalasan na ini, 9nagdaralagan sinda arog sa mga kabayo, nagrulukso arog sa mga kordero, mantang nag-oomaw saimo, Kagurangnan, huli sa pagligtas mo sainda. 10Nagiromdoman pa ninda an mga pangyayari sa buhay ninda kan mga oripon pa sinda—kun paanong mga noknok an nagin produkto kan daga embes na mga baka; kun paanong dakul na talapang an nagin produkto kan mga salog embes na mga sira. 11-12Pakatapos, kan magmawot sinda nin masiram na kakanon, nag-abot hale sa dagat an mga pugo tanganing mahipnoan an saindang kagutoman. An mga pugo sarong klase nin gamgam na dai pa lamang ninda nahiling kaidto.
An Padusa sa mga Egipcio
13Alagad makosog na daguldol an nagpatanid manongod sa padusang maabot sa mga parakasalang idto. Maninigo sindang padusahan huli kan dakula nindang kasalan. Mayo pa nin nasyon na naanggot nin makuri sa mga dayuhan ki sa nasyon na idto. 14An ibang banwaan nagsayuma na akoon an mga dayuhan na nagdolok sainda, alagad ginibong mga oripon kan banwaan na ini an saindang mga bisita na nagin maboot sainda. 15An arin man na nasyon papadusahan kun dai mag-ako nin mga dayuhan, 16alagad an nasyon na ini makuring nagpasakit sa mga dayuhan, pakatapos na akoon ninda ini kaiba an maogmang mga selebrasyon dangan hirasan ninda nin parehong mga deretso. 17An mga tawong ini nabuta man arog kan mga nag-erok sa Sodoma, na nagtoktok sa pintoan kan matanos na lalaking si Lot. Kaipuhan na magkapkap an lambang saro pasiring sa sadiri nindang harong huli kan mahibog na kadikloman na saindang namatean.
An Makangangalas na Kapangyarihan nin Dios
18Sa sarong arpa, an lambang kwerdas igwa nin sadiring nota, alagad an mga notang iyan pwedeng pag-iribahon tanganing magkaigwa nin manlaen-laen na musika. Arog man kaiyan kaidtong panahon, kan mag-iribahan an manlaen-laen na linalang. Hilinga an nangyari! 19An mga hayop sa daga nagpasiring sa dagat asin an mga linalang sa dagat nagpasiring sa daga. 20An kalayo naglaad maski sa tubig, na dai man nakasigbo kaiyan. 21Alagad an mga laad dai man nakatutong kan laman kan mga linalang na pwedeng magadan sa pagtungtong sa mga iyan; dai man natunaw kan kalayo an langitnon na kakanon, na madaling matunaw.
22Kagurangnan, inomaw mo saka pinamuraway an saimong banwaan sa gabos na bagay. Dai mo nanggad sinda pinabayaan. Tinabangan mo sinda sa gabos na panahon asin saen man na lugar.
Currently Selected:
An Kadonongan ni Solomon 19: MBBBIK92
Highlight
Copy
Compare
Share
Want to have your highlights saved across all your devices? Sign up or sign in
Marahay na Bareta Biblia © Philippine Bible Society, 1992.