Sirac 1
1
Pag-omaw sa Kadonongan
1Hale sa Kagurangnan an gabos na kadonongan, asin an Kadonongan kaiba niya sagkod lamang.
2Siisay an makakabilang kan tagdo
nin uran o kan baybay sa baybayon?
Siisay an makakabilang kan mga aldaw kan daing kapinonan saka daing kataposan na panahon?
3Gurano kahalangkaw an langit?
Gurano kahiwas an daga?
Gurano kahararom an dagat?
Gurano katotoo an Kadonongan?
Igwa daw nin tawong makakasimbag kaining mga kahapotan?
4Linalang an kadonongan bago an gabos;
an pakasabot danay nang buhay.#1:4 Sa nagkapirang kasuratan idinagdag an bersikulo 5: An ginigikanan nin Kadonongan iyo an tataramon nin Dios sa kaitaasan; an paagi nin Kadonongan gabos mayong kataposan na pagboot.
6Siisay na an pinahilingan kun saen naggigikan an Kadonongan?
Igwa daw nin nakakasabot kan saiyang katusohan?#1:6 Sa nagkapirang kasuratan idinagdag an bersikulo 7: Sa kiisay ipinahayag an pakaaram nin Kadonongan? Siisay an nakasabot kan dakula niyang kasaysayan?
8Igwa sana nin sarong madonong, asin kaipuhan magtindog kita
na may pagkatakot sa atubang kan saiyang trono.
9An Kagurangnan mismo an naglalang kan Kadonongan;
nahiling niya ini asin namidbidan an halaga kaini,
kaya pinano niya nin kadonongan an gabos niyang ginibo.
10Hinirasan niya nin Kadonongan an gabos na tawo,
alagad orog an itinao niya sa mga namomoot saiya.
11An pagkaigwa nin takot sa Kagurangnan sarong onra saka orgulyo;
sarong korona nin kaogmahan saka kagayagayahan.
12An pagkaigwa nin takot sa Kagurangnan nakakapaogma sa puso;
nagtatao nin halawig saka maogmang buhay.
13Sa kataposan nin saiyang buhay magigin marahay an gabos para sa may pagkatakot sa Kagurangnan.
Bebendisyonan siya nin Dios sa aldaw nin saiyang kagadanan.
14An pagkaigwa nin takot sa Kagurangnan
iyo an kapinonan nin Kadonongan.
An Kadonongan itinao sa maimbod maski kan nasa tulak pa kan saindang ina.
15Kaiba tang namuhay siya poon kan mga suanoy na panahon,
asin sasarigan siya kan mga henerasyon pang madatong.
16An pagkaigwa nin takot sa Kagurangnan iyo an kapanoan nin Kadonongan;
totoong binabasog niya kita kan saiyang mga regalo
17asin pinapano an satong mga harong saka kamalig
kan gabos na mawoton nyato.
18An pagkaigwa nin takot sa
Kagurangnan iyo an burak nin Kadonongan
na minabukad kaiba an katoninongan saka an marahay na hawak.#1:18 Sa nagkapirang kasuratan idinadagdag an Nahiling niya ini asin namidbid an halaga kaini (hilingon an 1:9).
19Ipinapadara niya an pakaaram saka pakasabot arog kan uran,
asin pinapadakula an onra kan mga minaako saiya.
20An pagkaigwa nin takot sa Kagurangnan iyo an gamot nin Kadonongan;
an saiyang mga sanga iyo an halawig na buhay.#1:20 Sa nagkapirang kasuratan idinagdag an bersikulo 21: An pagkaigwa nin takot sa Kagurangnan naghahale nin kasalan; saen nakukua an takot sa Kagurangnan, hinahale kaiyan an kaanggotan.
An Pagpogol sa Sadiri
22An bakong matanos na kaanggotan dai nin kapatawadan; iyan an madara saimo sa kapahamakan. 23Maghalat ka asin magin matinios sagkod na umabot an tamang panahon, dangan maoogma ka huli sa ginibo mong iyan. 24Pag-alo sagkod na umabot an tamang panahon nin pagtaram, asin mimidbidon ka huli kan saimong marahay na kaisipan.
An Kadonongan asin an Paggalang sa Dios
25An kadonongan igwa nin nasasaray na mararahay na kasabihan, alagad an mga parakasala nauuyam sa kabanalan. 26Kun boot mong magin madonong, otoba an mga kabotan nin Kagurangnan, asin tatawan ka niya nin nagsusupay na kadonongan. 27Kadonongan an pagkaigwa nin takot sa Kagurangnan asin saro man na katukdoan. An Kagurangnan nawiwili sa kaimbodan saka sa kapakumbabaan. 28Magin maimbod ka sa paggibo kan hinahagad kan saimong relihiyon; kun nagsasamba ka sa Kagurangnan, giboha iyan sa bilog mong puso. 29Magin maingat ka dapit sa saimong sinasabi asin dai ka magsagin-sagin. 30Dai ka magpaabaw-abaw ta tibaad bumagsak ka dangan masopgan. An Kagurangnan an mahayag kan saimong mga sekreto asin siya man an mapaibaba saimo sa atubang kan katiriponan, huli ta dai ka nagduman na may pagkatakot sa Kagurangnan, kundi igwang pusong pano nin kadayaan.
Currently Selected:
Sirac 1: MBBBIK92
Highlight
Copy
Compare
Share
Want to have your highlights saved across all your devices? Sign up or sign in
Marahay na Bareta Biblia © Philippine Bible Society, 1992.