An Kadonongan ni Solomon 18
18
Sarong Ilaw an Nagliliwanag sa mga Israelita
1Alagad para sa saimong banal na banwaan, igwa nin dakulang ilaw. An mga tingog kan mga Israelita nadangog kan saindang mga kaiwal, alagad dai sinda nahiling kan mga ini. Naori an mga ini huli sa marahay na palad kan saimong banwaan na dai nasakitan. 2Maninigo pa nganing magpasalamat an saindang mga kaiwal huli ta dai sainda nagbalos an banwaan na ginibohan ninda nin maraot, kaya nakimaherak sinda sa banwaan na idto na maghale na.#18:2 kaya nakimaherak…maghale na; o nakimaherak na patawadon an nakaagi nindang pang-aapi.
3Dangan inantabayan mo an saimong banwaan sa saindang paglakaw sa daga na dai ninda midbid. Giniyahan mo sinda sa paagi nin sarong hariging kalayo, na garo aldaw na dai man nakakapaso sa sainda mantang nagbabaklay. 4Alagad an saindang mga kaiwal, na dai man nakakahiling kan liwanag, maninigo na mabilanggo sa kadikloman, huli ta ginibo man nindang mga bilanggo an saimong banwaan. Kaya sa paagi kan saimong banwaan, an daing kataposan na liwanag kan Katogonan itinao mo sa kinaban.
An Pagkagadan kan mga Panganay na Lalaki kan mga Egipcio
5Kan nagdesisyon an saimong mga kaiwal na gadanon an mga aki kan banal mong banwaan, igwa nin sarong aki na pinabayaan, alagad dai nahaloy, ilinigtas. Dangan pinadusahan mo an saimong mga kaiwal huli sa paggadan kan kadaklan kan saindang mga aki. An bilog nindang hukbo linamos mo sa sarong dakulang baha. 6Alagad an samong mga ginikanan sinabihan mo na kaidto kun ano an mangyayari kan bangging idto, tanganing mapaogma sinda sa pakaaram kan saimong mga panuga na saindang sinarigan. 7Aram kan saimong banwaan na ililigtas mo an matanos na nasyon saka gagadanon mo an saindang mga kaiwal. 8Sa parehong paagi na saimong ginamit, pinadusahan mo an samong mga kaiwal asin inapod mo kami sa saimo sa pagpamuraway samo.
9Kan panahon na ini, an mga banal na aki kan matanos na nasyon na ini hilom na nagdolot nin mga atang, nagkaoroyon na kukuyogon ninda an togon nin Dios asin naghinirasan kan mga bendisyon saka mga kasakitan. Inawit na ninda an suanoy na mga awit nin pag-omaw. 10Alagad an makaheherak na pagtangis saka panambitan kan saindang mga kaiwal para sa saindang mga aki nag-aniningal maski saen. 11Pareho an padusa na inako kan mga kagurangnan saka kan mga oripon. Pareho man na pagtios na namatean kan hade asin kan ordinaryong tawo kan mawaraan sinda kan panganay nindang aki. 12Dai mabilang an mga bangkay; dikit sana an natadang buhay kaya dai gabos ikinalubong an mga gadan. Sa saro sanang pangyayari, nagadan an namomotan nindang mga aki; nagadan sinda gabos sa parehong paagi. 13Dai sinda nagtubod sa arin man na patanid, kundi naglaom sinda sa saindang mga salamangka. Alagad kan gadanon an mga panganay nindang aking lalaki, an Israel minidbid ninda na aki nin Dios.
14Nasa kabangaan pa sana an banggi asin matoninong an gabos, 15kan an saimong orog na mapangyaring tataramon maghilig hale sa saimong mamuraway na trono sa langit, pasiring sa dagang nakatalaan nang padusahan. Naghilig iyan siring sa sarong soldados na maisog na minasalakay, 16dara an sarong matarom na espada tanganing kuyogon an saimong pagboot. Nakatindog siya sa daga dangan nagduduta sa langit an saiyang payo asin pinapano nin kagadanan an daga. 17Sa oras na idto, an mga tawong naghihingagdan nagkaigwa nin makatatakot na mga pangatorogan asin nakamate nin dai pinaghohonang katakotan. 18Sa bilog na daga, naghihigda na sinda na naghihingagdan, asin an lambang saro nagsasabi kun tano ta sinda naghihingagdan. 19Aram ninda kun tano ta sinda naghihingagdan, huli ta pinatanidan na sinda huli kan mga makatatakot nindang mga pangatorogan.
An Pamibi ni Aaron iyo an Nagligtas sa mga Israelita sa Kagadanan
20Nagdatong man an kagadanan sa matanos na nasyon, huli ta nagdatong an peste mantang yaon sinda sa desyerto, alagad dai nahaloy an saimong kaanggotan. 21Igwa nin sarong tawong mayong kasalan na naghiro tolos tanganing surogon sinda. Ginamit ni Aaron an saiyang katongdan bilang padi. Huli sa mga pamibi asin insenso bilang saiyang mga armas, inatubang niya an saimong kaanggotan asin tinapos an kasakitan. Sa paggibo niya kaini, pinatunayan niya na siya saimong sorogoon. 22Nadaog niya an mapait na kasakitan,#18:22 Probableng teksto mapait na kasakitan; sa Griyego katiriponan. alagad bako huli sa kosog niya o sa kosog nin hukbo. Embes kaiyan, ginamit niya an pamibi tanganing maontok an padusa; nakimaherak siya huli kan mga panuga saka mga tipan mo sa samong mga ginikanan. 23Tambak na an mga bangkay, alagad nakilabot siya tanganing mapugol an saimong labi-labing kaanggotan asin tanganing dai na magadan an mga natada pang buhay. 24Sa halaba niyang gubing naladawan an bilog na kinaban. An mga nakatampok sa gubing na apat na raya nin mga bato iyo an kamurawayan saka kaomawan kan samong mga ginikanan; an korona sa saiyang payo iyo an tanda kan saimong kamahalan. 25Takot an Anghel nin Kagadanan sa mga bagay na ini, kaya nagsuko siya. Dikit sana idtong pakanamit kan saimong kaanggotan, alagad tama na idto.
Currently Selected:
An Kadonongan ni Solomon 18: MBBBIK92
Highlight
Copy
Compare
Share
Want to have your highlights saved across all your devices? Sign up or sign in
Marahay na Bareta Biblia © Philippine Bible Society, 1992.