An Kadonongan ni Solomon 17
17
An Takot Nag-abot sa mga Egipcio sa Banggi
1O Kagurangnan, makangangalas saka dipisil ipaliwanag an saimong mga paghukom; kaya nalagalag an mga tawong dai tinukdoan manongod kaiyan. 2Kan naghona an mga tawong dai nagmimidbid kan katogonan na nasa irarom kan saindang kapangyarihan an banal mong banwaan, sinda mismo an nabilanggo sa halawig na banggi nin kadikloman. Nabilanggo sinda sa saindang mga harong, harayo sa saimong mayong kataposan na pangataman. 3Naghona sinda na dai nahiling an hilom nindang mga kasalan, na nalipodan an mga ini kan madiklom na kurtina nin pagkalingaw, alagad ngunyan naribong sinda, nahandal nin marahay asin natakot sa saindang mga nahihiling. 4Dai nakaolang sa saindang makuring takot an madiklom na kwarto na saindang pinagtatagoan. 5An arin man na kalayo mayo nin kapangyarihan sa pagtao sainda nin liwanag, asin an maliwanag kan mga bitoon dai nin naginibo tanganing mahale an diklom na idto. 6Mayo nin nakakatakot na liwanag sainda kundi an makakatakot na kalayo, na bakong tawo an nagmakot, asin sa katakotan ninda, nagtubod sinda na an mga bagay na saindang nahiling mas makatatakot ki sa mga bagay na nasa isip ninda. 7Nawaraan nin halaga an mga hilingon na bunga kan saindang mga salamangka, asin nawaraan man nin halaga an kadonongan na ipinaghambog ninda. 8Nagpahayag sinda na mapapadulag ninda an gabos na natatakotan asin an mga kahelangan nin mga raot an isip, alagad ngunyan sinda mismo an naghelang huli kan makangingising takot. 9Maski mayo man nin nangyaring dapat katakotan ninda, alagad natakot sinda sa nagsisingasing na mga halas saka nag-aaging mga hayop na naghaharani sainda. 10Kaya nagadan sindang nagtatakig sa takot, takot na muklaton an saindang mga mata, alagad dai man ninda ipinirong.
11An kasombikalan sarong katalawan, asin iyo man sana an minakondenar sa sadiri.#17:11 An kasombikalan…sadiri; sa Griyego, bako ining malinaw. An sarong tawo na napupurisaw kan saiyang konsyensya danay na mag-iisip nin mga bagay na orog pa karaot ki sa tunay na nangyayari sa mga iyan. 12An takot mayo man nin ibang kahulogan kundi an dai paggamit kan tabang na itinatao kan isip. 13Kun kulang ka nin tiwala sa isip, masuko ka sa takot na dara kan kamangmangan.
14Sa bilog na banggi an mga tawong idto dai nangangatorog, maski ngani an banggi mayo man nin kapangyarihan sainda, huli ta hale iyan sa mayong kapangyarihan na kairaroman kan kinaban kan mga gadan. 15Linamag sinda kan makatatakot na mga bunga nin isip, asin paralisado sindang nagsuko sa takot na hidali sanang nag-abot sainda saka dai ninda pinaglalaoman. 16Nadismayo an mga tawo asin nabilanggo sa sadiri nindang takot. 17An mga paraoma, an mga pastor saka an mga trabahador sa kalangtadan nabihag asin nagtios kan parehong palad, huli ta gabos sinda nabilanggo sa kadikloman kan parehong kadenang dai nahihiling. 18-19Dai sinda nakahiro sa takot sa nagtataghoy na doros, o sa nag-aawit na mga gamgam sa mga kahoy, o sa naghahagubohob na tubig, o sa tanog kan naghuhurolog na mga gapo, o sa ribok kan dai nahihiling na mga linalang na nagdadaralagan, o sa agrotong kan mga lalaw na hayop, o sa mga aniningal kan kabukidan. 20Sa liwanag kan aldaw, an bilog na kinaban padagos sa saindang trabaho na mayo nin kaolangan. 21An mga tawo sanang idto an natahoban kan banggi, sarong pagnamit kan kadikloman nin kagadanan na naghahalat sainda. Saro sindang pagabat sa sainda man sanang sadiri, orog na magabat ki sa kadikloman.
Currently Selected:
An Kadonongan ni Solomon 17: MBBBIK92
Highlight
Copy
Compare
Share
Want to have your highlights saved across all your devices? Sign up or sign in
Marahay na Bareta Biblia © Philippine Bible Society, 1992.