An Kadonongan ni Solomon 16
16
1Kaya maninigo na an mga tawong ini padusahan asin pasakitan kan siring na mga linalang.
2Alagad, Kagurangnan, an saimong banwaan dai mo pinadusahan sa paaging ini; kundi pinahilingan mo sinda nin pagkaherak. Pinadarahan mo sinda nin mga pugo bilang kakanon, sarong managom na kakanon na makakahale kan saindang kagutoman. 3Ginibo mo ini tanganing kan magutom an mga nagsamba sa mga dios-dios, dai sinda makakakan huli kan makauuyam na mga linalang na ipinadara mo sainda. Alagad an saimong banwaan nakamate nin gutom sa kadikit sanang panahon, dangan nagkakan sinda kan masiram na kakanon. 4Maninigong magtios nin makuring pangangaipo an mga nang-api, mantang nahiling kan banwaan mo an pagsakit kan saindang mga kaiwal.
5Kan an saimong banwaan salakayon nin mangirhat saka maisog na mga halas na nagpoon manggadan huli kan saindang mga kamandag, dai nahaloy an saimong kaanggotan sa pagraot kan saimong banwaan. 6Sa kadikit na panahon napasainda an kasakitan na ini bilang patanid. Dangan tinawan mo sinda nin sarong tanda na nakakabolong, an halas na bronse, sa pagpagiromdom sainda kan ipinagboboot kan Katogonan. 7An siisay man na maghiling sa tanda na idto, nabolong sa pagkakagat nin halas—nabolong siya bako huli kan saiyang hiniling, kundi huli saimo, an kagtubos kan katawohan. 8Sa paaging ini, ipinasabot mo man sa samong mga kaiwal na ika an nagliligtas sa tawo sa anoman na karatan. 9An samong mga kaiwal nagadan sa kagat nin mga lukton saka mga langaw; mayo nin paagi tanganing mabolong sinda, huli ta maninigo sindang padusahan kan siring na mga linalang. 10Alagad an saimong banwaan dai nadaog maski kan mga halas na igwa nin kamandag, huli ta an saimong pagkaherak iyo an nagtabang saka nagbolong sainda. 11Nakagat sinda kan mga halas tanganing magiromdoman ninda an saimong mga pagboot, alagad ilinigtas mo sinda tolos, tanganing dai ka nanggad ninda malingawan asin mamatean ninda an saimong pagkamaboot. 12Bakong medisina o panlahid an nagpaomay sainda. Naomayan sinda huli kan saimong tataramon, O Kagurangnan, an tataramon na nakakabolong kan katawohan. 13Igwa ka nin kapangyarihan sa buhay saka sa kagadanan; ika an makakadara sa mga tawo sa trangkahan nin kagadanan asin ika man sana an makakatao nin buhay. 14Pwedeng gadanon nin sarong maraot na tawo an saiyang kapwa, alagad dai niya ini pwedeng buhayon giraray o ikaligtas an kalag kaini sa pagkabilanggo sa kinaban kan mga gadan.
Makosog na mga Bagyo an Tuminama sa Egipto
15Mayo nin siisay man na pwedeng makadulag saimo. 16An bakong diosnon na mga tawo, na nagsayumang magmidbid saimo bilang Dios, saimong pinadusahan kan dakula mong kapangyarihan. Linamag sinda nin makosog na mga pagbagyo asin pag-uran nin yelo saka gabos natutong sa kalayo. 17An orog na makangangalas iyo na an kalayo orog na naglaad sa tubig, na iyo kutana an dapat na magsigbo kan kalayo. An gabos na kabagsikan kan naturalesa nagtarabang sa pagdepensa kan matanos. 18Sarong panahon, naontok an kalayo, tanganing dai magkagaradan an mga linalang na sinugo tanganing padusahan an mga bakong diosnon. An mga tawong idto kaipuhan makasabot na linalamag sinda kan saimong paghukom. 19Sarong panahon naman, kan an kalayo napalibotan nin tubig, orog idtong naglaad, sarong paglaad na dai pa lamang nangyari kaidto, kaya nagkararaot an mga tinanom sa daga na pinag-erokan kan bakong matanos na mga tawong idto.
An Mga Israelita Tinawan nin Manna bilang Kakanon
20Alagad an saimong banwaan dai nakamate kan kasakitan na ini. Embes kaiyan, tinawan mo sinda kan kakanon nin mga anghel. Hale sa langit ipinadara mo an tinapay na pwede nang kakanon, asin dai na kaipuhan pang lutoon. Maski ano an pagnamit kan lambang saro, nasiraman siya kan kakanon na itinao mo. 21An gabos na ini nagpahiling kan mamomoton mong pangataman sa saimong kaakian; nabago an namit kan tinapay sosog sa pagnamit nin lambang saro. 22An kakanon na idto madaling matunaw arog sa ambon o yelo alagad sa pangyayaring idto dai natunaw maski sa kalayo. Nangyari ini tanganing tukdoan an saimong banwaan na an parehong kalayo na nagraraot kan tinanom kan saindang mga kaiwal kan magbagyo saka mag-uran nin yelo, 23iyo man an kalayo na hinalean nin kapangyarihan tanganing magkaigwa nin kakanon an saimong matanos na banwaan.
24Linalang mo an kinaban; nagsusunod iyan kan saimong pagboot. Ginagamit kan gabos na linalang an saindang kapangyarihan tanganing padusahan an bakong matanos na mga tawo, alagad nagin mahoyo saka maboot iyan sa mga nagsasarig saimo. 25Ginamit kan bilog na linalang an manlaen-laen na porma tanganing ikapahiling an saimong pagkamatinao sa mga namimibi saimo.#16:25 sa mga namimibi saimo; o sa mga nangangaipo. 26Nangyari ini, O Kagurangnan, tanganing an banwaan na namomotan mo makanood na dai sinda pinapakakan kan itinanom ninda. An tataramon mo iyo an nag-aataman kan mga nagsasarig saimo. 27An kakanon, na dai naraot kan kalayo, natunaw kan tamaan kan saldang nin aldaw, 28tanganing tukdoan kami na kaipuhan magbangon kami bago magsirang an aldaw, tanganing magpasalamat saimo, dangan magpamibi mantang nag-iitaas an aldaw. 29Alagad an paglaom nin sarong tawo na dai tataong magpasalamat natutunaw siring sa ambon, asin nagmamara siring sa tubig na dai ginagamit.
Currently Selected:
An Kadonongan ni Solomon 16: MBBBIK92
Highlight
Copy
Compare
Share
Want to have your highlights saved across all your devices? Sign up or sign in
Marahay na Bareta Biblia © Philippine Bible Society, 1992.