An Kadonongan ni Solomon 15
15
An Totoong Dios iyo an Nagtatao nin Buhay na Mayong Kataposan
1Alagad totoo ka saka maboot asin matinios, O samuyang Dios. An kinaban may pagkaherak mong pinaghahadean. 2Maski nagkakasala kami, minimidbid mi an saimong kapangyarihan asin sadiri mo man giraray kami. Alagad huli ta aram nyamo na sadiri mo kami, dai kami magkakasala. 3An pakamidbid saimo iyo an kapanoan nin katanosan, asin an pagkamidbid kan saimong kapangyarihan iyo an kapinonan nin buhay na mayo nin kataposan. 4Dai kami nadagka sa salang dalan kan arin man na maraot na gibo kan abilidad nin tawo, o kan mayong halagang trabaho nin mga pintor o kan arin man na ladawan na manlaen-laen an kolor. 5An mga bagay na iyan nakakabuhay kan marigsok na pakamate nin mga lolong asin nagigin dahelan kan pagmawot ninda para sa sarong gadan na ladawan. 6An siisay man na naggigibo nin siring na bagay, o nagmamawot saka nagsasamba kaiyan, namomoot sa sarong bagay na maraot, asin nakakakua kan maninigo sa saiya, kun ibinubugtak niya diyan an saiyang paglaom.
An Kalolongan kan Pagsamba sa Dalipay na mga Dios-dios
7An sarong paragibo nin koron minakua nin malumoy na dalipay dangan maingat na minagibo nin mga bagay na magagamit nyato. An iba kaiyan ginigibo niya para sa marahay na katuyohan, an iba para sa bakong marahay na katuyohan, alagad gabos iyan hale sa parehong dalipay, asin pareho man sana an pakagibo niya kan gabos. Siya an minadesisyon kun para sa anong katuyohan gagamiton an mga ginibo niya. 8Tawo siya na, dai pa nahaloy, ginibo man hale sa daga, dangan dai mahahaloy mabalik sa daga na hinalean niya, kun dapat na niyang ipuli an kalag na ipinasubli saiya. Tawo siya, alagad sinasayang niya an trabaho huli sa paggibo nin sarong mayong halagang dios-dios hale sa parehong dalipay na ginagamit niya sa paggibo nin mga koron. 9Dai niya pinahalagahan na siya magagadan o na halipot an saiyang buhay, kundi kinokompetensya niya an mga paragibo sa bulawan, plata saka bronse, asin inaarog niya an mga gibo ninda. Ipinag-orgulyo niya an mga bagay na saiyang ginigibo, alagad imitasyon sanang mga dios-dios iyan. 10Gibo sa abo an saiyang puso. An saiyang paglaom mas barato ki sa ati, asin an saiyang buhay orog pang barato ki sa laboy, 11huli ta dai nanggad niya namidbid an Dios na naggibo saiya, na naghangos saiya nin sarong aktibong kalag asin sarong buhay na espiritu. 12Naghohona siya na an buhay saro sanang karawat; sarong saodan saen pwede siyang magkaigwa nin dilihensya. Nagtutubod siya na dapat siyang makaganansya sa anoman na paagi. 13An tawong ini, na naggigibo nin ladawan saka mga mapapasaon na mga koron hale sa parehong dalipay, orog na nakakaaram ki sa iba, na siya nagkakasala.
An Padusa sa mga Egipcio
14Alagad an pinakalolong sa mga tawo, an mas mayo pang isip ki sa mga omboy, iyo an mga kaiwal na nag-api kan saimong banwaan, O Kagurangnan. 15Naghona sinda na mga dios an gabos nindang paganong mga ladawan, na dai nakakahiling maski igwa nin mga mata, na dai nakakahangos maski igwa nin dungo, na dai nakakadangog maski igwa nin talinga, na dai nakakamate maski igwa nin mga muro, na dai nakakalakaw maski igwa nin mga bitis. 16Ginibo sinda nin sarong tawo na sinublian man sana an espiritu. Mayo nin siisay man na tawo na makakagibo nin sarong dios-dios na pareho sa sarong tawo. 17An lambang tawo magagadan, alagad an arin man na bagay na gibo kan saiyang masumbikal na mga kamot gadan na poon pa sa kapinonan. Mas marahay pa siya ki sa bagay na saiyang sinasamba, huli ta siya buhay, alagad an sinasamba niya gadan, asin dai pa nanggad nagkaigwa nin buhay. 18An siring na mga tawo nagsasamba sa makauuyam na mga hayop, maski sa pinakakulang nin pakasabot na mga hayop. 19Bilang mga hayop, bako sindang magayon tanganing mawoton nin siisay man. Huli ta maski an Dios dai sinda isinabay kan omawon asin bendisyonan niya an iba niyang linalang.
Currently Selected:
An Kadonongan ni Solomon 15: MBBBIK92
Highlight
Copy
Compare
Share
Want to have your highlights saved across all your devices? Sign up or sign in
Marahay na Bareta Biblia © Philippine Bible Society, 1992.