An Kadonongan ni Solomon 14
14
An mga Ladawan na Kahoy Ibinaing sa Arkong Kahoy ni Noe
1Siring man, an sarong tawong nag-aandam sa pagsakay sa anggot na dagat naghahagad nin tabang sa sarong pedasong kahoy na orog na matapo ki sa sakayan na lulunadan niya. 2Sarong tawong nagmawot nin ganansya an nagplano kan porma kan sakayan, asin sarong may abilidad na tawo an guminibo kaiyan. 3Alagad, an pangataman mo, O Ama, iyo an naggigiya kaiyan; tinatawan mo iyan nin ligtas na dalan sa mga alon kan dagat. 4Maski an mga tawong mayo nin abilidad pwedeng magpadagat, huli ta iliniligtas mo sinda sa kapahamakan. 5Kabotan mong magamit an mga bagay na ginibo mo huli kan saimong kadonongan. Kaya an mga tawo pwedeng magsakay sa dagat na lunad sa sarong sakayan dangan ligtas na makadoong sa daga huli ta nananarig sinda sa sadit na pedaso nin kahoy na idto.
6Arog kaini kaidtong panahon, kan nawawara na an sarong mapaabaw-abaw na rasa nin mga higante. An paglaom kan kinaban nagpaili sa siring na sakayan na nasa pangataman mo dangan nagwalat sa kinaban nin sarong bagong henerasyon na mapadagos kan rasa nin tawo. 7Benendisyonan an arko ni Noe na nagin paagi tanganing magdanay an katanosan, 8alagad isinumpa an ladawan na ginibo nin tawo. Isinumpa man an naggibo kaiyan, huli ta guminibo siya nin sarong bagay na mawawara sana dangan inapod niya iyan na sarong dios. 9Ikinakaongis nin Dios an bakong diosnon na mga tawo asin an bakong diosnon na mga bagay na ginibo ninda. 10Papadusahan nin Dios an mga bagay na ginibo asin sa mga tawong naggibo kaiyan. 11Kaya an paghukom nin Dios mahugpa sa mga paganong ladawan, huli ta maski ngani ginibo an mga iyan hale sa mga bagay na linalang nin Dios, nagin makauuyam an mga bagay na iyan na naglitag kan mga kalag nin lolong na mga tawo.
An mga Ginikanan kan Pagsamba sa mga Dios-dios
12An kaisipan na maggibo nin mga ladawan iyo an kapinonan nin karigsokan. Poon na gibohon an mga iyan, dinigtaan na kaiyan an buhay nin tawo. 13Mayo man kaidto nin mga ladawan asin an mga iyan dai man magdadanay. 14An kapaabaw-abawan nin tawo iyo an nagdara sainda sa kinaban, kaya marikas man na kataposan an inandam para sainda.
15Igwa kaidto nin sarong ama na namondo nin marahay huli ta bako pang panahon na nagadan an saiyang aki, kaya guminibo siya nin sarong ladawan kan aking idto na biglang kinua saiya. Kaya inomaw niya an sarong tawong gadan bilang sarong dios, asin an mga sakop niya tinawan niya nin sekretong mga seremonya. 16Sa pag-agi kan panahon, orog na kuminosog an bakong diosnon na kaugalean na idto. Sa kataposan, nagin sarong togon iyan, asin sa pagboot kan mapangyaring mga hade sinamba na an mga ladawan. 17Kun harayo an erokan kan mga tawo asin dipisil sindang makatao nin kaomawan sa saindang namamayo, iniisip na sana ninda an saiyang itsura dangan minagibo sinda nin ladawan na nakakaagid saiya. 18An ambisyosong mga paragibo nin mga ladawan iyo an nagpalakop kan pagsambang ini, maski dai man midbid kan mga tawo an saindang hade. 19An sarong paragibo nin ladawan, na nagmamawot na mawilihan kan hade, pwedeng gumibo nin ladawan kan hade na mas magayon pa an porma ki sa mismong hade. 20Dangan an mga tawo madadagka nin marahay kan ladawan, kaya sinasamba na ninda iyan, na kaidto tinatawan sana ninda nin pag-omaw bilang sarong tawo. 21Kaya ini nagin sarong tago na litag para sa mga tawo, huli ta an mga tawong nagmomondo o nasasakopan kan kapangyarihan kan hade, minatao sa mga kahoy o mga gapo kan kaomawan na maninigo sanang itao sa Dios.
An Mga Bunga kan Pagsamba sa mga Dios-dios
22Pakatapos kaiyan, bako sanang nasala sinda manongod sa pagsabot sa Dios, kundi nabuhay sinda sa dakulang pakikilaban sa karatan, dangan sa saindang kamangmangan an mga pakikilaban na iyan sa karatan inapod nindang katoninongan. 23Ginadan ninda an mga aki sa mga seremonya nin pag-ako sa mga bagong kaayon, nagselebrar sinda nin sekretong mga misteryo asin nagdororogan sa nalalaen na mga paagi. 24Dai na ninda pinadanay na mayong digta an saindang buhay o an saindang pag-inagoman. Sa pasaluib na paagi, pwedeng gadanon nin sarong tawo an saiyang kapwa o mapamondo sa paagi nin pagdorog sa agom kaini. 25An gabos nagin sarong dakulang kariribokan nin madugong garadanan, harabonan, darayaan, karigsokan, pagkawara nin kaimbodan saka orden, kaputikan, 26pananakot sa mga tawong inosente, paglingaw kan mga utang na boot, pagdigta kan mga kalag, kasalan sa laman, pagsiriblagan nin mag-aragom, dororogan, saka karigsokan. 27An pagsamba sa mga dios-dios, na an mga ngaran dai dapat sambiton, iyo an kapinonan saka kataposan, an dahelan asin an bunga nin lambang karatan. 28An mga nagsasamba sainda garo mga lolong na nagpaparataram sa kaogmahan, o nagpopropesiya nin kaputikan, o namumuhay sa karatan o tolos-tolos na minapainda sa saindang mga tataramon. 29Nagpuputik sinda maski nanumpa nin katotoohan, asin dai natatakot na papadusahan sinda huli ta an sinasarigan nindang mga dios-dios mayo man nin buhay. 30Alagad aabotan man giraray sinda nin padusa sa duwang dahelan: enot, nasala sinda manongod sa Dios huli ta nagsamba sinda sa mga dios-dios, asin ikaduwa, dai ninda pinahalagahan an kabanalan kaya nanumpa sinda nin kaputikan tanganing dayaon an mga tawo. 31Kun nagkakasala an bakong matanos na mga tawo, an malamag sainda bako an kapangyarihan kan mga bagay na sinumpaan ninda, kundi an padusa na maninigo sa mga parakasala.
Currently Selected:
An Kadonongan ni Solomon 14: MBBBIK92
Highlight
Copy
Compare
Share
Want to have your highlights saved across all your devices? Sign up or sign in
Marahay na Bareta Biblia © Philippine Bible Society, 1992.