An Kadonongan ni Solomon 13
13
An Kalolongan kan Pagsamba sa Naturalesa
1Lolong an siisay man na tawo na dai nakakamidbid sa Dios. Hinihiling kan siring na mga tawo an mga marahay na bagay sa palibot ninda, alagad dai pa giraray nakakamidbid sa Dios. Inadalan ninda an mga bagay na linalang niya, alagad dai ninda namidbid an naglalang kan mga iyan. 2Embes kaiyan, naghohona sinda na an mga dios-dios na naghahade sa kinaban iyo an kalayo o an doros o an bagyo o an naglilibot na mga bitoon o an nag-aalon na tubig o an mga bagay na nagliliwanag sa kalangitan. 3An kagayonan kan mga bagay na iyan nawiwilihan kan mga tawo, kaya ibinilang nindang mga dios-dios; alagad dapat nindang masabotan na an mga bagay na iyan igwa nin kagurangnan, asin na siya an mas dakula ki sa gabos na iyan, huli ta siya an kaglalang kan mga bagay na iyan. 4Huli ta an mga tawo nagngalas sa kapangyarihan kan mga bagay na iyan asin kun paano sinda naghihiro, dapat na manodan ninda huli sa mga bagay na iyan na an kaggibo sainda orog pang mapangyari. 5Huli sa paghiling ta sa kahiwasan asin sa kagayonan kan linalang namimidbidan ta an Kaglalang.
6Alagad dai man nyato mababasol nanggad an mga tawong ini. Huli ta tibaad mawot man nanggad nindang makua an Dios alagad dai ninda siya nakua. 7Huli ta maski napapalibotan sinda kan mga gibo nin Dios, padagos pa nindang hinihiling an mga ini, sagkod na maghona sindang mga dios-dios an mga iyan huli kan saindang kagayonan. 8Alagad sa katotoohan, mayo sinda nin dahelan tanganing dai sinda salaon. 9Huli ta kun igwa sinda nin dakulang kapangyarihan sa pagsiyasat kan kinaban, tano ta dai nanggad ninda nakua an Kagurangnan kan gabos na bagay?
An Kalolongan kan Pagsamba sa mga Dios-dios
10Alagad an orog na makaheherak na mga tawo iyo idtong nagbubugtak kan saindang paglaom sa mga bagay na mayo nin buhay, an mga nagsasamba sa mga bagay na gibo nin tawo—mga ladawan nin mga hayop na magayon an pakagibo sa bulawan saka plata, o sa mayong halagang gapo na inukitan kaidto pang panahon. 11An sarong kahoy pwedeng lagadion nin sarong ekspertong paralabra nin kahoy, ubakan ini dangan huli kan kakayahan niya, gibohon niya ining sarong bagay na makakatabang sa mga pangangaipo nin tawo. 12An mga natadang pedaso kan kahoy gagamiton niya bilang igatong sa pagluto nin kakanon na makakapabasog saiya. 13Alagad sa mga tadang pedaso nin kahoy na mayo na nin pakinabang, pwede siyang kumua nin sarong pedaso—na pwedeng tiko o pano nin urat—dangan kun mayo siyang gibo, gamiton an dikit niyang panahon tanganing pormahon iyan na magin sarong ladawan nin sarong tawo, 14o nin sarong mayong halagang hayop. Pinipintahan niya ini nin pula asin tinatahoban an gabos na kaninan. 15Dangan inaandaman niya ini nin maninigong lugar sa lanob saen ipinapako niya ini. 16Iniingatan niyang dai mahulog ini, huli ta aram niyang saro sana ining ladawan na nangangaipo nin tabang; dai kaiyan pwedeng tabangan an sadiri. 17Alagad dai siya nasosopog na magpamibi sa mayong buhay na bagay na iyan dapit sa saiyang agom, mga aki, saka pagsadiri. 18Maluya iyan, alagad pinapamibian niya para sa marahay na hawak. Gadan iyan, alagad hinahagadan niya nin buhay. Mayo iyan nin eksperyensya, alagad hinahagadan niya nin tabang. Dai iyan nakakalakaw, alagad pinapamibian niya para sa marahay na pagbyahe. 19An mga kamot kaiyan mayo nin kapangyarihan, alagad hinahagadan niya nin tabang sa pagnenegosyo, sa paghanap nin kwarta, asin sa saiyang trabaho.
Currently Selected:
An Kadonongan ni Solomon 13: MBBBIK92
Highlight
Copy
Compare
Share
Want to have your highlights saved across all your devices? Sign up or sign in
Marahay na Bareta Biblia © Philippine Bible Society, 1992.