Sirac 9
9
An mga Babae
1Dai mo pag-imonan an saimong agom na babae na saimong namomotan. Tutukdoan mo sana siya kun paano ka niya papasakitan. 2Dai mo ipaghunod an saimong onra sa kiisay man na babae. 3Likayan mo an mga agom nin ibang mga lalaki,#9:3 Sa Hebreyo mga agom nin ibang mga lalaki; sa Griyego mga babaeng imoral. ta tibaad mahulog ka sa saindang mga siod. 4Dai ka makiiba sa mga babaeng paratugtog; dadayaon ka ninda. 5Likayan mo an paghiling nin maigot sa sarong birhen, ta tibaad mapiritan kang magbayad kan dote nin sarong nobya. 6Dai ka magpakalolong sa mga maraot na babae, ta tibaad mawara an gabos mong pagsadiri. 7Kaya dai ka maglagalag sa mga tinampo o maglibot sa mga kabtang kan banwa na dai na pinagdudumanan kan mga tawo. 8Kun makahiling ka nin sarong magayon na babae, maghiling ka sa ibang direksyon. Dai mo pag-isipon an kagayonan nin sarong babae na bako mong agom. Dakul nang lalaki an nalagalag huli sa gayon nin sarong babae. Iyan an minapagkot sa kamawotan na garo kalayo. 9Dai ka magkakan sa kaibahan kan agom nin sarong lalaki o makipag-inoman sa saiya, ta tibaad masugotan ka dangan maraot huli kan saimong kamawotan.
Pakipagkatood sa Ibang Lalaki
10Dai mo nanggad ipagsikwal an haloy mo nang katood; dai ka na nanggad makakakua nin sarong bagong katood na makakaarog sa saiya. An pakikipagkatood nakakaagid sa arak; orog na nagigin managom iyan mantang naghahaloy. 11Dai ka maara sa kauswagan nin sarong parakasala; dai mo aram kun anong kapahamakan an inandam para saiya. 12Dai ka maogma sa mga bagay na nawiwilihan kan mga bakong diosnon; giromdoma na dai sinda pawawaraan nin sala mantang sinda nabubuhay. 13Likayan mo an tawong may kapangyarihan sa paggadan, asin dai ka mahahadit huli sa katakotan nin kagadanan. Alagad kun kaipuhan na magharani ka saiya, mag-ingat ka nin marahay, ta tibaad gadanon ka niya. Pakaaramon mo na naglalakaw ka sa tahaw nin mga siod, asin ika sarong masayon na patamaan.
14Midbidon mo nin marahay an mga tawong nasa palibot mo, asin maghagad ka nin hatol sa mga madonong sana. 15Makipag-olay ka sa mga tawong may inadalan, asin an Katogonan kan Kahorohalangkawe iyo logod an saindong magin tema nin pag-oolay. 16An mga matanos na tawo an pilion mong magin kaiba sa pagkakan, asin an pagkatakot sa Kagurangnan iyo an magin pangenot mong orgulyo.
An mga Pamayo
17Inoomaw an sarong ekspertong trabahador huli kan mga bagay na saiyang ginigibo, asin an Kadonongan nin pamayo napapatunayan huli kan saiyang tataramon. 18An naghihidali asin mayong ingat sa pagtaram natatakotan asin naoongisan kan gabos na namamanwaan.
Currently Selected:
Sirac 9: MBBBIK92
Highlight
Copy
Compare
Share
Want to have your highlights saved across all your devices? Sign up or sign in
Marahay na Bareta Biblia © Philippine Bible Society, 1992.