Sirac 10
10
1Tutukdoan nin sarong madonong na pamayo an saiyang nasasakopan, asin magigin husay an saiyang pagpadalagan kan banwaan. 2An gabos na opisyal saka namamanwaan magigin arog kan namamayo sa sainda. 3An mayong inadalan na hade iyo an maraot kan saiyang banwaan, alagad orog na magkokosog an sarong syudad kun an mga pamayo kaiyan madodonong. 4Ibubugtak nin Kagurangnan an kapangyarihan sa tamang tawo sa tamang panahon. 5An kauswagan kan tawong iyan nasa kamot nin Kagurangnan. An Kagurangnan an ginigikanan kan onra na itinatao sa arin man na opisyal.
An Kapaabaw-abawan
6Dai ka maanggot sa kiisay man huli sa lambang sadit na bagay na sala an saiyang pakagibo. Dai ka maggibo nin anoman huli sana ta napasopog ka. 7An kapaabaw-abawan saka an inhustisya ikinakaongis nin Kagurangnan asin nin mga tawo. 8An inhustisya, kapaabaw-abawan, saka an kayamanan iyo an dahelan kan pagbagsak nin mga nasyon asin an pagtunga nin iba sa lugar ninda. 9Alpog saka abo man sana kita; ano an pwede tang ipag-orgulyo? An satong mga hawak dikit-dikit na nalalapa mantang buruhay pa kita.#10:9 An satong hawak…pa kita; an kasabihan na ini bakong malinaw magin sa Griyego o sa Hebreyo. 10An sarong halawig na paghelang ikinakaribong nin sarong doktor. Maski an sarong hade na buhay ngunyan na aldaw pwedeng magadan sa aga. 11Kun nagagadan an sarong tawo, an nasasadirihan niya iyo an mga ulod saka mga langaw.
12Minapoon an kapaabaw-abawan kun tinatalikodan nin sarong tawo an Kagurangnan, na saiyang kaglalang. 13An kapaabaw-abawan nakakaagid sa sarong burabod na nagbubulos nin kasalan, asin an siisay man na mag-ontok diyan mapapano nin karatan. Iyan an dahelan kun tadaw ta dinarahan kan Kagurangnan nin makangirhat na padusa an nagkapirang tawo dangan pinuho sinda. 14An Kagurangnan an nagpabagsak sa mga hade dangan nagbugtak nin mga mapakumbabang mga tawo sa lugar ninda. 15An Kagurangnan an naggabot sagkod kan mga gamot nin mga nasyon dangan nagmukna nin mga mapakumbabang mga nasyon sa lugar ninda. 16An Kagurangnan an nagrumpag nin mga imperyo asin nagronot kan saindang mga daga. 17Siya an nagpuho kan nagkapira sa sainda kaya dai na ngani sinda nagigiromdoman. 18Mayo sa plano kan Kaglalang na magin mapaabaw-abaw saka madahas an mga tawo.
Mga Tawong Dapat Igalang
19Siisay an maninigong mag-ako nin onra? An mga tawo, huli ta may pagkatakot sinda sa Kagurangnan. Siisay an dai maninigong mag-ako nin onra? An mga tawo, huli ta linalapas ninda an mga pagboot nin Kagurangnan. 20Dapat na galangan kan mga parasunod an namamayo sainda, asin ilinalangkaw nin Kagurangnan an mga tawong may pagkatakot saiya.#10:20 Sa nagkapirang kasuratan idinagdag an bersikulo 21: An kauswagan minapoon sa pagkatakot sa Kagurangnan, alagad an pagbagsak minapoon sa katagasan nin payo asin kapalangkawan.
22An mga mayaman, an mga may dangog, asin an mga dukha—gabos nag-oorgulyo sa saindang pagkakaigwa nin pagkatakot sa Kagurangnan. 23Bakong tama na dai paggalangan an sarong tawong madonong huli sa saiyang kadukhaan, asin bakong tama na galangan an sarong parakasala. 24An mga tawong igwa nin dangog, an mga pamayo, saka an mga hukom gagalangan, alagad mayo sa saindo nin maorog pa sa tawong may pagkatakot sa Kagurangnan. 25An sarong oripon na madonong paglilingkodan nin mga talingkas na namamanwaan, asin kun may pagkasabot sinda, dai ninda iyan ipagkukulog nin boot.
An Kapakumbabaan asin an Paggalang sa Sadiri
26Kun nagtatrabaho ka, dai mo ipaghambog an saimong kakayahan, asin dai mo pag-omawon an saimong sadiri sa panahon na nangangaipo ka. 27Orog na marahay an magtrabaho asin magkaigwa nin sobra kan saimong kaipuhan ki sa magparahambog alagad nagugutom.
28Aki ko, magmuraway ka sa kapakumbabaan asin itao mo sa saimong sadiri an tamang halaga kan saimong pagkatawo. 29Mayo nin matanos na dahelan para sa sarong tawo na nagkakasala sa saiya man sana. Dai iginagalang an sarong tawo na dai minagalang sa sadiri niya. 30Iginagalang an sarong dukha huli kan saiyang naaaraman, mantang iginagalang an sarong mayaman huli kan saiyang yaman. 31Kun iginagalang an sarong dukha, gurano pa daw kun siya magin mayaman! Kun ikinakaongis an sarong tawo mantang mayaman siya, gurano pa daw kun siya magin dukha!
Currently Selected:
Sirac 10: MBBBIK92
Highlight
Copy
Compare
Share
Want to have your highlights saved across all your devices? Sign up or sign in
Marahay na Bareta Biblia © Philippine Bible Society, 1992.