Sirac 8
8
An Paggamit kan Isip
1Dai ka makipasuhay sa sarong mapangyaring tawo, ta tibaad mahulog ka sa saiyang kapangyarihan. 2Dai ka makiiwal sa sarong mayaman na tawo; pwede siyang magsuhol nin mga tawo tanganing pakaraoton ka. Dakul nang tawo an naraot saka mga hade na nabirik an isip huli kan bulawan. 3Dai ka makipasuhay sa tawong sobra kun minataram; dinadagdagan mo sana an gatong kan saiyang kalayo. 4Dai ka magkalwag sa sarong maraot an gawe, ta tibaad mawaraan nin onra an saimong mga ginikanan. 5Dai mo pagtuyawon an tawong nagbabakle na sa pagkakasala. Giromdoma na gabos kita maninigong padusahan. 6Dai mo pagmenoson an sarong gurang na, huli ta naggugurang na man an nagkapira sa sato. 7Dai mo ipag-ogma an kagadanan nin sarong tawo; giromdoma na gabos kita kaipuhan na magadan.
8Dai mo ipagsikwal an itinaram kan mga madonong, huli ta makakanood ka sa sainda nin katukdoan asin kun paano an paglingkod sa dakulang mga tawo. 9Dai mo ipagsikwal an itinaram kan mga gururang na, huli ta sinda mismo nakanood sa mga nagkaerenot sa sainda. Makakanood ka sainda, asin matutukdoan ka ninda kun paano an pagsimbag kun kaipuhan.
10Dai mo pagtawan nin oportunidad na orog na magkasala an sarong parakasala. Pwedeng ika man sana an makulogan; arog iyan kadali kan pagkapaso mantang ginagatongan an kalayo. 11Dai ka magtindog dangan magbaya sa sarong tawo na sobra an kapaabaw-abawan ta tibaad baliktadon niya an saimong mga tataramon asin gamiton iyan laban saimo. 12Dai ka magpasubli nin anoman sa sarong tawo na orog na mapangyari ki sa saimo. Kun gibohon mo iyan, mas marahay pang ibilang mo na sanang nawara iyan. 13Dai ka maggarantiya sa pag-utang nin ibang tawo na an halaga orog pa ki sa kaya mong bayadan. Kaipuhan andam ka sa pagbayad kan siring na garantiya. 14Dai mo pagsangatan nin kaso an sarong hukom, huli ta manggagana siya huli kan saiyang katongdan. 15Dai ka makiiba sa sarong tawo na dai nag-iingat; mayo kang makukuang karahayan diyan kundi kapahamakan. Magibo siya kan gustohon niyang kalolongan, asin magagadan kang kaiba niya.
16Dai ka makipagdiskutiran sa kiisay man na mainiton an payo o magduman sa arin man na lugar na kamo sanang duwa. An kadahasan mayong halaga sa saiya, asin sasalakayon ka niya kun mayo nin siisay man na makakatabang saimo. 17Dai ka maghagad nin hatol sa sarong mangmang huli ta dai niya mahihilom an itinaram mo saiya. 18Dai ka maggibo nin anoman na dapat hilomon sa atubang nin sarong tawo na bako mo midbid, huli ta dai mo aram kun ano an mangyayari sa panahon na gibohon mo iyan. 19Dai mo ipagpahayag sa kiisay man an pinakatago mong kaisipan. Kun gibohon mo iyan, marahay pang itapok mo na man an oportunidad na mag-ogma ka sa maabot na panahon.#8:19 Sa Hebreyo Kun…panahon; sa Griyego Dai ka mag-utang nin boot sa kiisay man.
Currently Selected:
Sirac 8: MBBBIK92
Highlight
Copy
Compare
Share
Want to have your highlights saved across all your devices? Sign up or sign in
Marahay na Bareta Biblia © Philippine Bible Society, 1992.