Sirac 7
7
Manlaen-laen na Hatol
1-2Kun dai ka maggibo nin sala, mayong maraot na maabot saimo. 3Dai mo pag-aradohon an daga tanganing tanoman kan banhi nin inhustisya ta tibaad mag-ani ka nin labi pa sa linalaom mo.
4Dai mo paghagadon sa Kagurangnan an pinakahalangkaw na katongdan ni an tukawan nin kaomawan sa hade. 5Dai mo ipagpirit sa Kagurangnan an saimong katanosan o ipagpahiling an saimong kadonongan sa atubang kan hade. 6Dai ka mag-ambisyon na magin sarong hukom, ta tibaad dai mo mahale an karatan, o tibaad palaenon mo an sarong dakulang tawo; mararaot kaiyan an saimong dangog. 7Dai ka maggibo nin krimen laban sa mga tawo, asin hare paghalea an saimong onra sa tahaw kan saimong mga kahimanwa.
8Dai mo na pag-uliton an parehong kasalan. Tama na an padusa na napasaimo sa enot mong pagkasala.
9Dai ka maghona na bibilangon kan Kahorohalangkaweng Dios an dakul na regalong itinao mo, kun kaya aakoon man niya an anoman na dolot na itao mo.
10Dai ka mag-ontok sa pagpamibi, asin dai ka magpabaya sa pagtao nin limos sa mga dukha.
11Dai mo pagngisihan an sarong tawong napasopog. An Kagurangnan iyo an minapaibaba sa sarong tawo, alagad siya man giraray an minapalangkaw sa tawong iyan.
12Dai ka mag-isip nin kaputikan na ioosip mo dapit sa saimong mga katood. 13Dai ka nanggad magputik. Mayong karahayan na makukua diyan.
14Sa katiriponan kan mga gurang, dai ka magparataram kan mayo nin halaga. Dai ka man magparaulit-ulit kun namimibi ka.
15Dai ka maongis sa magabat na trabaho o sa pag-oma; an Kahorohalangkawe an nagtao sato kan mga iyan.
16Dai ka mag-apil sa katiriponan nin mga parakasala; giromdoma na madatong nanggad an padusa nin Kagurangnan.
17Magin mapakumbaba ka, huli ta an pagkalapa sa kagadanan iyo an naghahalat sa sato gabos.#7:17 Sa Hebreyo an pagkalapa…gabos; sa Griyego an padusa kan mga bakong diosnon iyo an kalayo saka mga ulod.
An Pakikipagkapwa
18Dai mo ipagpasaluib an saimong katood huli sana sa kwarta. Dai mo ipagpasaluib an sarong tunay na katood maski pa an gabos na bulawan sa kinaban an karibay kaiyan.
19Hare pagpalihisa an oportunidad na makaagom ka nin sarong madonong saka marahay na babae. An maugayon na agom mahalaga pa ki sa bulawan.
20Dai mo pag-abusohon an sarong sorogoon na naggigibo sa kaimbodan kan saiyang trabaho, o an sarong nagpapatandan na marahay an pagtrabaho para saimo.
21Kamotan mo an sarong madonong na sorogoon siring kan pagkamoot mo sa saimo man sana,#7:21 Sa Hebreyo Kamotan mo…sa saimo man sana; sa Griyego Kamotan mo an sarong madonong na sorogoon. asin dai mo ipagsayuma saiya an saiyang katalingkasan.
22Atamana nin marahay an anoman na hayop na sadiri mo. Kun pinagkakwartahan mo sinda, dai mo ipagpabakal.
23Kun igwa ka nin mga aking lalaki, tukdoan mo sinda. Tukdoan mo sinda kan pagpupugol sa sadiri mantang mga aki pa sinda.
24Kun igwa ka nin mga aking babae, padanaya sindang mabini; dai ka magpahiling nin sobrang pagpadaba. 25Kun ipaagom mo na an saimong aking babae, natapos mo na an sarong dakulang trabaho, alagad itao mo siya sa sarong lalaking may pakasabot.
26Kun igwa ka nin marahay na agom, dai mo siya pagsuhayan, alagad dai mo ipagdusay an saimong sadiri sa sarong dai mo namomotan.
27Galangan mo an saimong ama sa bilog mong puso, asin dai mo nanggad paglingawan an pagtios kan saimong ina kan ika ipinangaki niya. 28Giromdoma na utang mo an saimong buhay sa sainda. Paano mo mababayadan an gabos na ginibo ninda para saimo?
29Matakot ka sa Kagurangnan sa bilog mong puso, asin galangan mo an saiyang mga padi. 30Kamotan mo an saimong Kaglalang sa bilog mong kosog, asin dai mo ipagsikwal an saiyang mga ministro. 31Matakot ka sa Kagurangnan asin galangan mo an mga padi. Itao mo sa sainda an ipinagboot saimong dapat mong itao: an enot na inani, an dolot para sa kasalan, an abaga kan hayop na isinakripisyo—an gabos na hinahagad na sakripisyo saka dolot.
32Tabangan mo an mga dukha, asin itatao nin Kagurangnan saimo an kapanoan nin bendisyon. 33Magin matinao ka sa lambang nabubuhay, asin magin maugay ka sa paggiromdom sa mga gadan na. 34Makidamay ka sa mga nawaraan kan mahal ninda sa buhay, asin makiiba ka sa pagmondo ninda. 35Dai ka magduwa-duwa sa pagsongko sa naghehelang, huli ta sa siring na mga gibo mamomotan ka. 36Sa gabos mong gibo, giromdoma na madatong an aldaw na ika magagadan. Mantang nagigiromdoman mo ini, dai ka nanggad magkakasala.
Currently Selected:
Sirac 7: MBBBIK92
Highlight
Copy
Compare
Share
Want to have your highlights saved across all your devices? Sign up or sign in
Marahay na Bareta Biblia © Philippine Bible Society, 1992.