Sirac 6
6
1dai kamo magin sarong kaiwal kundi sarong katood. Dinadara saindo kan maraot na dangog an kawaraan nin onra na maninigo sa mga putikon na parakasala. 2Dai kamo magpadaog sa saindong mga kamawotan, ta tibaad peredasohon kaiyan an saindong kalag arog sa sarong torong baka.#6:2 Magin sa Griyego o sa Hebreyo, an bersikulo 2 bakong malinaw. 3Babayaan kamong arog sa sarong gadan na kahoy na mayong dahon o bunga. 4An maraot na kamawotan iyo an mapahamak saindo asin magigin kamong ngingisihan kan saindong mga kaiwal.
Pakipagkatood
5Kun ika sarong tawong magalang, magkakaigwa ka nin dakul na katood. 6Makipagtoninong ka sa dakul na tawo, alagad kuahon mo sana an saro hale sa sangribo bilang saimong parahatol. 7Kun nakikipagkatood ka, dai ka maghidali sa pagtiwala saiya; baloon mo ngona kun pwede siyang pagkatiwalaan. 8Huli ta igwa nin katood na katood mo sana kun nagkikinabang siya, alagad dai siya masurog saimo kun ika nasa kasakitan. 9Igwa man nin katood na nagigin sarong kaiwal, asin minabuyagyag kan saindong pinagpasuhayan na magigin dahelan kan kasosopgan mo. 10-11Igwa pa nin katood na danay mong kaiba sa pagkakan mantang marahay an kamugtakan mo; garo siya anino mo asin nagtatao man nin mga pagboot sa saimong mga sorogoon, alagad dai malalaoman sa panahon nin kasakitan. 12Kun orog na magraot an saimong kamugtakan, sasalungaton ka niya, asin dai mo na siya mahihiling pa.
13Likayan mo an saimong mga kaiwal asin magmaan ka sa atubang kan saimong mga katood. 14An sarong maimbod na katood nakakaagid sa sarong ligtas na pailihan: an nakakakua nin sarong arog saiya, nakakakua nin kayamanan. 15Mayo na nin makakaorog pa sa sarong maimbod na katood; mayo nin paagi tanganing bugtakan nin halaga an siring na tawo. 16An sarong maimbod na katood nakakaagid sa sarong bolong na nagpapadanay kan marahay mong hawak. An may pagkatakot sana sa Kagurangnan an nakakakua nin siring na katood. 17An sarong tawo na may pagkatakot sa Kagurangnan makakakua nin tunay na mga katood, huli ta mamomotan niya sinda arog kan pagkamoot niya sa saiyang sadiri.#6:17 huli ta…sa saiyang sadiri; o huli ta an saiyang mga katood matatakot man sa Kagurangnan.
Mag-adal sa Kadonongan
18Aki ko, pahalagahan mo an Kadonongan mantang aki ka pa, asin padagos na makukua mo siya paggurang mo. 19Magmaigot ka sa paghanap sa Kadonongan arog sa sarong paraoma na maigot na nag-aarado saka nagtatanom; dangan makakalaom ka nin marahay na ani. Sa kadikit na panahon, totoong magtatrabaho ka, alagad dai mahahaloy, mag-oogma ka sa saimong makukua. 20Sa mga mayong disiplinang tawo, an mga kahagadan nin Kadonongan masakit nin marahay asin mayo sinda kan kosog nin boot na magpadagos tanganing masunod an mga iyan. 21An mga kahagadan nin Kadonongan orog na magabat ki sa boot nindang darahon, kaya hidali nindang itinatapok an mga iyan. 22Huli ta an Kadonongan nakakaarog sa saiyang ngaran, asin bakong nahahayag sa kadaklan.
23Aki ko, paghinanyog sako asin giboha an sakong hatol. 24Gakodan an kadena nin Kadonongan sa saimong bitis asin bugtakan sa saimong liog an saiyang sakal. 25Pasana siya sa saimong abaga asin dai ka magreklamo nin huli sa saiyang mga gakod. 26Sunoda an Kadonongan asin magdanay ka sa saiyang mga dalan sa bilog mong puso. 27Hanapa siya, asin ipapahayag niya an saiyang sadiri sa saimo. Mamugol ka saiya asin dai mo siya pagbutasan. 28Dangan maaaraman mo an katoninongan nin isip na dolot niya, saka magigin kaogmahan mo siya. 29Dangan magigin sarong makosog na depensa mo an saiyang mga kadena asin sarong magayon na gubing an saiyang sakal. 30An saiyang sakal magigin sarong bulawan na alahas asin an saiyang mga gakod magigin laso nin kamahalan. 31Isusulot mo an Kadonongan siring sa sarong magayon na korona.
32Aki ko, makakanood ka kun boot mo. Pwede kang magin listo kun maghingowa ka. 33Kun boot mong maghinanyog, makakanood ka asin magigin madonong. 34Magduman ka sa pinagtitiriponan kan mga gurang; hanapon mo an sarong lalaking madonong, dangan mag-iba ka saiya. 35Magin andam ka sa paghinanyog kun nagtataram an mga diosnon na tawo, asin dai ka magtugot na dai mo makua an mga talinhaga na pano nin kadonongan. 36Kun manumpongan mo na an sarong lalaking may pakasabot, amay kang magbangon tanganing dalawon siya; dai ka mag-ontok sa pagdalaw saiya.
37Gamita an gabos mong panahon sa pag-adal saka sa paghorophorop sa mga kabotan nin Kagurangnan. Siya an matao saimo nin pakasabot asin kadonongan na hinahanap mo.
Currently Selected:
Sirac 6: MBBBIK92
Highlight
Copy
Compare
Share
Want to have your highlights saved across all your devices? Sign up or sign in
Marahay na Bareta Biblia © Philippine Bible Society, 1992.