Sirac 5
5
Dai Kamo Magpalangkaw
1Dai kamo magsarig sa kwarta, na garo baga huli kaiyan dai na nindo kaipuhan an ibang tawo. 2Dai kamo mag-isip na kaipuhan igwa kamo kan gabos na bagay na saindong mawoton, dangan uboson nindo an saindong kosog sa pagkua kaiyan. 3Dai kamo mag-isip na mayo nin siisay man na mas halangkaw an awtoridad ki sa saindo, huli ta papadusahan nanggad kamo nin Kagurangnan. 4Dai kamo mag-isip na pwede kamong magkasala dangan dai kamo papadusahan, huli ta an Kagurangnan makakahalat bago kamo padusahan. 5Dai kamo magsarig na papatawadon kamo nin Kagurangnan, kaya orog nindong dinadagdagan an saindong mga kasalan. 6Dai kamo mag-isip na dakula nin marahay an saiyang pagkaherak kun kaya papatawadon niya an saindong mga kasalan gurano man kadakul. Totoong naheherak siya, alagad naanggot siya sa mga parakasala. 7Maghidali kamo sa pagbalik sa Kagurangnan. Dai kamo mag-isip na pwede nindong gibohon iyan sa mga masurunod na aldaw; huli ta hidali sanang madatong saindo an kaanggotan nin Kagurangnan, asin magagadan kamo sa saiyang pagpadusa. 8Dai kamo magsarig sa kayamanan na hinabonan; mayo iyan nin karahayan na idodolot saindo sa aldaw nin kasakitan.
An Pagigin Sinsero asin an Pagpugol sa Sadiri
9-10Magin pusog kamo sa saindong tinutubod asin magin maimbod kamo sa saindong itinataram. Dai kamo maghingowang mapaogma an gabos na tawo, ni mag-oyon sa gabos nindang sinasabi.#5:9-10 Sa Hebreyo sa gabos nindang sinasabi; sa Griyego idinagdag an Iyo iyan an ginigibo kan mga parakasala, na bakong maimbod sa saindang mga itinataram. 11Danay kamong magin andam sa pagdangog, alagad maluway sa pagsimbag. 12Magsimbag sana kamo kun aram nindo an saindong sasabihon, alagad mag-alo kamo kun dai nindo aram. 13An pagtaram pwedeng magdara nin onra o kasosopgan; pwedeng mapahamak kamo huli kan saindong sinasabi.
14Hare nindo paghanapa an dangog nin sarong parapakaraot, asin dai kamo maggibo nin mga istorya na ikakakulog nin tawo. An mga parahabon mawawaraan nin onra; an mga putikon kokondenaron nanggad. 15Dai nanggad kamo maggibo nin anoman na makakaraot,#5:15 Sa Hebreyo Dai nanggad kamo maggibo nin anoman na makakaraot; sa Griyego Dai kamo magin mangmang sa anoman na bagay. sadit man na bagay iyan o dakula;
Currently Selected:
Sirac 5: MBBBIK92
Highlight
Copy
Compare
Share
Want to have your highlights saved across all your devices? Sign up or sign in
Marahay na Bareta Biblia © Philippine Bible Society, 1992.