Sirac 4
4
1Aki ko, dai mo pag-olangon an dukha sa saindang hanap-buhay o pagpahalaton sinda sa saindang pangangaipo. 2Dai mo nanggad pagtawan nin dahelan na mamondo o maanggot an sarong nagugutom na tawo. 3Dai mo pagdagdagan an kasakitan nin sarong tawo na mainit na an payo, ni pagparahaloyon an pagtao kan saimong regalo sa makilimos. 4-5Dai ka magsayumang tabangan an sarong makilimos na nasasakitan. Dai mo pagtalikodan an sarong dukha o pagtawan siya nin anoman na dahelan tanganing maldisyonon ka. 6Huli ta kun sa kapaitan nin kalag maldisyonon ka niya, dadangogon kan Kaglalang an saiyang pamibi.
7Gibohang kamotan ka kan mga yaon sa katiriponan. Galangan mo an mga tawong may awtoridad. 8Hinanyoga an sinasabi kan mga dukha, dangan may paggalang na simbagon mo sinda. 9Ligtasan an tawong boot pakaraoton kan iba, asin magin pusog ka sa saimong paghukom. 10Magin arog ka sa sarong ama para sa mga ilo, asin tabangan mo an mga babaeng balo. Dangan makakaarog ka sa sarong aking lalaki kan Kahorohalangkawe, asin mamomotan ka niya orog pa ki sa pagkamoot nin saimong ina.
An Kadonongan bilang sarong Maestro
11Inaataman kan Kadonongan an mga tawong naghahanap sa saiya; ilinalangkaw niya sinda. 12An namomoot saiya namomoot sa buhay, asin an amay pang naghahanap saiya mapapano nin kaogmahan. 13An siisay man na magkaigwa nin Kadonongan magkakaigwa nin dakulang dangog, asin saen man siya magduman, bebendisyonan siya nin Kagurangnan. 14An mga sorogoon kan Kadonongan mga sorogoon kan An Banal, asin namomotan nin Kagurangnan an gabos na namomoot sa Kadonongan. 15An mga nagkukuyog saiya maghuhukom sa mga nasyon;#4:15 Sa Griyego maghuhukom sa mga nasyon; sa Hebreyo magtatao nin matanos na mga paghukom. an mga naghihinanyog saiya igwa nin tunay na katiwasayan. 16Magsarig kamo sa Kadonongan, asin mapapasaindo siya dangan ikakapamana nindo siya sa saindong mga kapagarakian. 17Sa kaenot-enote, gigiyahan kamo nin Kadonongan sa dipisil na mga dalan. Gigibohon niyang matakot kamo nin marahay kaya maghohona kamong dai na kamo makakapadagos. Masasakitan kamo huli kan saiyang disiplina, asin babaloon niya kamo huli sa mga kahagadan niya sagkod na manarig nanggad siya saindo.#4:17 manarig nanggad siya saindo; o manarig nanggad kamo saiya. 18Dangan hidaling madolok siya saindo, ipapahayag an saiyang mga sekreto saindo, asin papaogmahon kamo. 19Alagad kun maglagalag kamo, babayaan niya kamo asin tutugotan na mapahamak.
Pagsarig sa Sadiri
20Kuahon nindo an lambang oportunidad, alagad likayan nindo an maraot; dai nindo pagmenoson an saindong sadiri. 21An kapakumbabaan tinatawan nin onra saka paggalang, alagad an hababang paghiling sa sadiri sarong kasalan. 22Dai kamo magtugot na mangyari an kabotan nin ibang tawo sa ikakapahamak nindo; dai nindo ipaghunod an saindong deretso sa ikakaraot nindo. 23Dai kamo magduwa-duwa sa pagtaram kun kinakaipuhan.#4:23 Probableng teksto kun kinakaipuhan; sa Griyego kaligtasan. Dai nindo pagtagoon an saindong kadonongan.#4:23 Sa Hebreyo Dai nindo pagtagoon an saindong kadonongan; sa kadaklan na Griyegong kasuratan mayo kan mga tataramon na ini; sa ibang Griyegong kasuratan Dai nindo pagtagoon an saindong kadonongan huli sana sa panluwas na mahihiling kan ibang tawo sa saindo. 24Huli ta an saindong kadonongan saka naaaraman mamimidbidan sana sa paagi kan saindong itinataram. 25Alagad dai nanggad kamo magtaram laban sa katotoohan. Giromdoma nindo na dai nindo aram an gabos na bagay. 26Dai kamo masopog na ikumpisal an saindong mga kasalan; mayong pakinabang an paghingowang ontokon an pagbulos kan salog. 27Dai kamo magpasakop sa sarong mangmang, ni magpahiling nin pagpapalaen sa sarong dakulang tawo. 28Panindogan nindo kun ano an tama, maski buhay nindo an nakataya; an Kagurangnan Dios makikilaban para saindo.
29Dai kamo maghidali sa pagtaram o maghinugak asin magpabaya sa saindong trabaho. 30Dai kamo mag-arog sa sarong leon sa saindong harong, ni magin parahanap nin sala sa saindong mga sorogoon. 31Dai nindo pagbukahon an saindong kamot sa pag-ako nin sarong bagay kun saindo man sanang seserahan iyan pag-abot kan panahon nin pagbayad.
Currently Selected:
Sirac 4: MBBBIK92
Highlight
Copy
Compare
Share
Want to have your highlights saved across all your devices? Sign up or sign in
Marahay na Bareta Biblia © Philippine Bible Society, 1992.