Sirac 3
3
Mga Katongdan sa mga Magurang
1Mga kaakian, pagdangog kamo sa sako, na saindong ama. Sunoda nindo an sinasabi ko saindo asin magigin ligtas kamo, 2huli ta an mga ama tinawan nin awtoridad kan Kagurangnan, asin an mga ina tinawan nin deretso sa saindang kaakian. 3An siisay man na minagalang sa saiyang ama nagsosolsol na kan saiyang kasalan, 4asin an siisay man na nagpapamuraway kan saiyang ina nakakaarog sa sarong tawo na nagtitipon nin kayamanan. 5An siisay man na minagalang sa saiyang ama papaogmahon kan sadiri niyang kaakian; sisimbagon nin Kagurangnan an saiyang mga pamibi. 6An siisay man na magkuyog sa Kagurangnan huli sa paggalang sa saiyang ama asin sa pagpaogma sa saiyang ina, magkakaigwa nin halawig na buhay. 7Kuyoga nindo an saindong mga magurang na garo kamo mga oripon ninda. 8Galangan nindo an saindong ama sa gabos nindong ginigibo asin sinasabi, tanganing mag-ako kamo kan saiyang bendisyon. 9Kun minatao kan saindang bendisyon an mga magurang, pinapakosog ninda an mga pamilya kan saindang kaakian, alagad kun minamaldisyon ninda an saindang kaakian, rinaraot ninda an pinakapundasyon kan mga iyan.
10Dai nindo paghanapon an sadiri nindong kamurawayan huli sa paghale kan dangog kan saindong ama; an pagkawara kan dangog nin saindong ama bakong kamurawayan para sa saindo. 11An sadiri nindong dangog makukua sa paggalang nindo sa saindong ama. An mga aking dai minagalang sa saindang ina mayo man nin onra. 12Aki kong lalaki, atamana an saimong ama paggurang niya; dai mo siya pagpamondoon mantang nabubuhay siya. 13Magin matinios ka sa panahon na magluya na an saiyang isip; dai mo siya pagbasang-basangon huli ta makosog ka asin marahay an hawak mo. 14Dai malilingawan nin Kagurangnan an marahay na boot na ipinapahiling nindo sa saindong ama; makakatabang iyan sa pagbayad nindo kan saindong mga kasalan. 15Kun kamo nasa kasakitan, magigiromdoman nin Kagurangnan an saindong marahay na boot asin tatabangan niya kamo; an saindong mga kasalan matutunaw siring sa ambon sa mainit na saldang nin aldaw. 16An siisay man na magpabaya sa saiyang mga magurang o magtao sa sainda nin dahelan tanganing maanggot, garo man sana nagmamaldisyon sa Kagurangnan; nasa irarom na siya kan maldisyon nin Kagurangnan.
Kapakumbabaan
17Aki ko, magpakumbaba ka sa gabos mong gibo, asin orog pang maoogma an mga tawo huli kaiyan ki sa mga regalo.#3:17 Sa Hebreyo mga tawo…regalo; sa Griyego mamomotan kamo kan mga tawong inako nin Kagurangnan. 18Mantang nag-oorog an saimong kadakulaan, dapat mag-orog man an saimong kapakumbabaan; dangan mawiwilihan ka nin Kagurangnan.#3:18 Idinagdag kan nagkapirang Griyegong kasuratan an bersikulo 19: Dakul na tawo an ilinangkaw saka ginalangan, alagad an mga sekreto nin Dios saiyang ipinahayag sa mga mapakumbaba; sa Hebreyo: Dakula an pagkaherak nin Dios, asin ipinapahayag niya an saiyang mga sekreto sa mga mapakumbaba. 20Dakula an kapangyarihan nin Kagurangnan, asin ginagalangan siya kan mga mapakumbaba. 21Dai ka maghingowang masabotan an mga bagay na labi kadipisil para saimo, ni magsiyasat kaidtong dai nasasakopan kan saimong pakasabot. 22Horophoropa an Katogonan na itinao saimo. Dai mo na kaipuhan na maaraman pa an dapit sa mga bagay na dai ipinahayag nin Kagurangnan, 23kaya dai mo na pakiaraman an mga bagay na iyan. Huli ta an mga bagay na ipinahiling saimo dai kayang saboton kan isip nin tawo. 24Dakul nang tawo an nalagalag kan sadiri man sana nindang kaisipan; an sala nindang kaisipan iyo an nagpangurol kan saindang paghukom.#3:24 Idinagdag kan nagkapirang Griyegong kasuratan an bersikulo 25: Kun mayo ka nin mga mata, dai ka makakahiling; kun kulang ka nin pakaaram dai ka magpahayag na igwa ka kaiyan; sa Hebreyong kasuratan igwa kaining mga tataramon pakatapos kan bersikulo 27: Kun mayo ka nin mga mata dai ka makakahiling; kun mayo ka nin pakaaram, dai ka pwedeng magkaigwa nin Kadonongan.
26Sa kataposan an katagasan nin payo iyo an madara saimo sa kasakitan. An namomoot sa pag-alaman magagadan sa parehong dahelan. 27An tawong matagas an payo magpapasan nin dakul na kasakitan. An parakasala danay na nagdadagdag nin kasalan sa tambak na niyang kasalan. 28Mayo nin bolong an kasakitan kan mga mapaabaw-abaw, huli ta nakagamot na nin hararom sa sainda an karatan. 29An mga madonong na tawo makakanood sa mga kasabihan saka mga parabola. Minahinanyog sinda nin marahay huli ta boot nindang makanood.
An Pagtao sa mga Dukha
30An pagtao sa mga dukha nakakabayad nin kasalan, siring na sinisigbo kan tubig an nagkakarabang kalayo. 31An siisay man na minagibo nin karahayan sa iba nag-iisip kan maabot na panahon, huli ta makakakua siya nin tabang sa panahon nin saiyang pagbagsak.
Currently Selected:
Sirac 3: MBBBIK92
Highlight
Copy
Compare
Share
Want to have your highlights saved across all your devices? Sign up or sign in
Marahay na Bareta Biblia © Philippine Bible Society, 1992.