Sirac 2
2
Kaimbodan sa Dios
1Aki ko, kun malingkod ka sa Kagurangnan, magin andam ka sa mga pagbalo. 2Magin sinsero asin maigot ka. Dai ka mapurisaw sa panahon nin kasakitan. 3Magdanay ka sa Kagurangnan; dai mo nanggad siya pagtalikodan asin magigin mauswag ka sa kataposan kan saimong buhay. 4Akoa an anoman na dumatong saimo, asin magin matinios ka maski sa mga pagbabago na magpapakumbaba saimo. 5An bulawan binabalo sa kalayo, asin an ugale nin sarong tawo binabalo sa horno nin kapakumbabaan. 6Magsarig ka sa Kagurangnan, asin tatabangan ka niya. Sosoga an saiyang mga dalan, asin bugtakan an saimong paglaom sa saiya.
7Kamo gabos na may pagkatakot sa Kagurangnan, maghalat kamo saiya na ipahiling saindo an saiyang pagkaherak. Dai nindo siya pagtalikodan, tibaad bumagsak kamo. 8Kamo gabos na may pagkatakot sa Kagurangnan, pagsarig kamo saiya, asin babalosan nanggad kamo. 9Kamo gabos na may pagkatakot sa Kagurangnan, maglaom kamo sa saiyang mga biyaya nin pagkaherak asin mayong tapos na kaogmahan.
10Giromdoma an mga suanoy na henerasyon dangan isip-isipa ini: siisay an tawong nagsarig sa Kagurangnan na pinasopog niya? Igwa na daw nin tawong danay na may pagkatakot saiya na saiyang tinalikodan? Igwa daw nin tawong namibi saiya na dai niya sinimbag? 11Maboot asin maheherakon an Kagurangnan; pinapatawad niya an satong mga kasalan asin iliniligtas niya kita sa panahon nin kasakitan. 12Alagad mapapahamak an mga maluya an boot—an gabos na parakasala na naglalakaw sa duwang dalan! 13Herak man sa mga nawawaraan nin kosog nin boot; mayo sinda nin pagtubod, kaya dai sinda iingatan. 14Herak man sa mga nawawaraan nin paglaom. Ano an saindang gigibohon pagdatong nin Kagurangnan tanganing hukoman sinda?
15An mga may pagkatakot sa Kagurangnan dai naglalapas kan saiyang mga kabotan; an mga namomoot saiya mabubuhay sosog sa pamumuhay na boot niya. 16An mga tawong may pagkatakot saka namomoot sa Kagurangnan maghihingowang paogmahon siya asin idudusay ninda an saindang sadiri sa pagkuyog kan Katogonan. 17An mga tawong may pagkatakot sa Kagurangnan danay na andam sa paglingkod saiya. Nagpapakumbaba sinda sa atubang niya, asin nagsasabi, 18“Ibinubugtak mi an samong palad sa kamot nin Kagurangnan, bakong sa mga kamot nin tawo, huli ta an saiyang pagkaherak arog kadakula kan saiyang kamahalan.”
Currently Selected:
Sirac 2: MBBBIK92
Highlight
Copy
Compare
Share
Want to have your highlights saved across all your devices? Sign up or sign in
Marahay na Bareta Biblia © Philippine Bible Society, 1992.