Sirac 19
19
1Kun gibohon mo iyan, dai ka#19:1 Sa Hebreyo Kun gibohon mo iyan, dai ka; sa Griyego an sarong trabahador na sobrang mag-inom nin arak. nanggad magigin mayaman; kun dai mo pagpahalagahan an mga sadit na bagay, luway-luway kang mabagsak. 2An arak saka an mga babae iyo an nakakapalagalag sa mga tawong may pakasabot. An sarong lalaki na nagpaparaduman sa mga babaeng maraot, nagigin bakong maingat, 3asin an pagigin bakong maingat iyo an magadan saiya. Kakakanon kan mga ulod an naglalapa niyang hawak.
4Mangmang an tawong madaling magtubod sa iba. An tawong nagkakasala, nagkakasala sa saiya man sana. 5Kun napapaogma ka kan karatan, kokondenaron ka.
Mga Tataramon na Mayo nin Halaga
6Likayan mo an mga tataramon na mayo nin halaga, asin malilikayan mo an dakul na karatan. 7Dai mo ipanabi an nadangog mo, asin dai ka magbabasol. 8Dai mo iyan ipag-osip sa saimong mga katood o mga kaiwal pwera sana kun magkakasala ka kun hilomon mo sana iyan. 9Tatandaan ka kan siisay man na makadangog kaiyan, asin dai mahahaloy, kaoongisan ka niya huli kaiyan. 10Nakadangog ka nin osipon? Bayaeng magadan iyan kaiba mo. Magmaisog ka! Dai ka mapapaputok kaiyan. 11An sarong mangmang na naghihingowang hilomon an sarong sekreto nagtitios siring sa sarong nangangaking babae. 12Anoman na oras na makadangog siya nin sekreto, iyan nakakaarog sa sarong bosog na tuminadom sa saiyang bitis.
13Kun nadangog mong nakagibo nin sala an sarong katood, hapoton mo siya dapit kaiyan. Tibaad bako man totoo. Alagad kun totoo, dai na niya iyan gigibohon giraray. 14Kun nabaretaan mong an kanatad mo nagtaram kan dai niya dapat itaram, hapoton mo siya dapit kaiyan. Tibaad dai man niya itinaram. Alagad kun itinaram niya, dai na niya iyan gigibohon giraray. 15Kun igwa kang nadangog na maraot dapit sa sarong katood, hapoton mo siya dapit kaiyan. Tibaad pakaraot sana iyan. Dai mo pagtubodan an gabos na madangog mo. 16An sarong tawo pwedeng dai man tinutuyong masala sa pagtaram. An gabos nagkasala sa paaging ini. 17Kun igwa kang nadangog na ikinaanggot mo sa saimong kanatad, hapoton mo siya dapit kaiyan bago mo siya homaan. Idusay mo an bagay na iyan sa Katogonan kan Kahorohalangkawe.#19:17 Sa nagkapirang kasuratan idinagdag an bersikulo 17c-19: asin dai ka maanggot. 18 An pagkaigwa nin takot sa Kagurangnan iyo an enot na tangga pasiring sa pag-ako niya saimo; mamomotan ka niya kun madonong ka. 19 Adalan mo an mga pagboot nin Kagurangnan. Saro iyan na disiplina na nagtatao nin buhay. An mga tawong naggigibo kan nawiwilihan niya iyo an nagkakakan kan bunga kan kahoy na nagtatao nin buhay na daing kasagkoran.
An Pagmidbid sa Totoong Kadonongan
20Matakot ka sa Kagurangnan asin otobon mo an saiyang Katogonan; iyo iyan an bilog na kadonongan.#19:20 Sa nagkapirang kasuratan idinagdag an bersikulo 20b-21: asin kun ano an kahulogan kan pakaaram kan saiyang kapangyarihan sa gabos. 21 Kun an sarong sorogoon habong magsunod sa saiyang kagurangnan, alagad taod-taod nagsunod man giraray, an kagurangnan anggot pa giraray. 22Pwedeng aram mo an gabos na dapat aramon dapit sa karatan, alagad bako iyan makakapadonong saimo. Bakong tama an pagsunod sa hatol nin mga parakasala. 23Pwedeng gamiton an katusohan nganing mangyari an maraot na katuyohan, alagad nagin arog sa mga lolong an nagkapirang tawo huli sa dai ninda pakaaram kan mas marahay na bagay. 24An sarong diosnon na tawo, maski bakong madonong, mas marahay pa ki sa pinakatusong parakasala. 25Posibleng magin sobra an katusohan dangan magin putikon pa an sarong tawo, o posibleng makua niya an anoman na mawoton niya huli sa ngana-nganang paggalang.
26Dangan igwa nin mga maraot na tawo na namumuhay na garo seryoso asin mamondo, alagad mga tawong naghihingowang dayaon ka. 27Minatalikod sinda na garo dai ka nadangog, alagad kun mayo na nin nakakahiling, dadayaon ka ninda. 28Kun sa anoman na dahelan dai sinda nagkakasala ngunyan, magibo sinda nin karatan sa enot na oportunidad. 29Mamimidbidan mo an sarong tawo huli kan saiyang lalawogon. Sa enot mong pakahiling saiya, maaaraman mo kun igwa siya nin marahay na kaisipan. 30An saiyang paggubing, an saiyang pagngisi, asin an saiyang paglakaw magpapamidbid kan saiyang ugale.
Currently Selected:
Sirac 19: MBBBIK92
Highlight
Copy
Compare
Share
Want to have your highlights saved across all your devices? Sign up or sign in
Marahay na Bareta Biblia © Philippine Bible Society, 1992.