Sirac 18
18
An Kadakulaan nin Dios
1An Kagurangnan, na nabubuhay sagkod lamang, an naglalang kan bilog na kinaban, 2asin siya sana an matanos.#18:2 Sa nagkapirang kasuratan idinagdag an bersikulo 2b-3: asin pwera saiya mayo na nin iba. 3 Ginigiyahan niya an kinaban huli kan saiyang kamot, asin kinukuyog siya kan gabos. Siya an hade kan gabos na bagay, asin linalaen kan saiyang kapangyarihan an banal sa bakong banal. 4Dai niya tinawan an siisay man nin tama sanang kapangyarihan tanganing ipahayag an saiyang ginibohan, asin mayong makakasiyasat kan mapangyari niyang gibo. 5Siisay an makakasukol kan mahal niyang kapangyarihan? Siisay an makakaosip kan bilog na kasaysayan kan saiyang gibong pagkaherak? 6Dai ta pwedeng dagdagan o inaan an mga iyan. Mayo nin paagi tanganing masabotan ta an makangangalas na bagay na ginibo nin Kagurangnan. 7Pag-abot ta sa kataposan kan kasaysayan, dai pa ngani kita nakakapoon; dai ta iyan ikakapaliwanag.
Mayong Halaga an tawo
8Ano an tawo? Ano an halaga niya? An karahayan na saiyang ginigibo—an karatan na saiyang ginigibo—ano an kahulogan kan gabos na iyan? 9Kun mabuhay an sarong tawo sa laog nin sanggatos na taon, halawig nang marahay an saiyang buhay, 10alagad kun ibabaing sa panahon na mayong kapinonan saka kataposan, an mga taon na iyan arog sana sa sarong tagdo nin tubig sa dagat, arog sa sarong batiris. 11Iyan an dahelan kun tadaw ta tinitios kita nin Kagurangnan, kun tano ta daing sukol an saiyang pagkaherak. 12Hinihiling niya kita asin aram niya na magagadan kita; iyan an dahelan kun tadaw ta andam siyang patawadon kita. 13Pwedeng maherak an sarong tawo sa midbid niya, alagad naheherakan nin Kagurangnan an gabos na tawo. Sinasagwe niya kita; dinidisiplina asin tinutukdoan niya. Arog sa sarong pastor na nag-aataman nin mga karnero, ibinabalik niya kita sa saiya. 14Maheherakan niya kita kun aakoon ta an saiyang disiplina asin kun andam kitang ipahiling niya sato kun saen kita nasasala.
Pagkanimaboot asin Pagkamoot
15Aki ko, kun tinatabangan mo an sarong tawo, dai mo siya pagtuyawon. Kun nagtatao ka nin regalo, dai ka magtaram nin anoman na makakakulog. 16Mas mahalaga an saimong mga tataramon ki sa saimong itinatao. Maski an ambon nagtatao nin kaginhawahan sa panahon nin tig-init. 17Totoo, an mahuyong mga tataramon orog na makosog ki sa pinakamarahay na regalo, asin kun totoong nagmamakulog ka, itatao mo bako sana an mahuyong mga tataramon kundi an pinakamarahay na regalo. 18Kamangmangan an magin makuri asin abusado. An mga mata nin siisay man na tinatawan nin regalo dai naoogma sa regalo nin tawong napipiritan sanang magtao.
Pagsiyasat sa Sadiri
19Aramon mo ngona kun ano an saimong itataram bago ka magtaram, asin mangnoha ngona an saimong hawak bago ka maghelang. 20Siyasata an saimong konsyensya bago ka hukoman nin Kagurangnan; dangan pag-abot kan panahon na iyan, papatawadon ka niya. 21Bago ka padusahan sa paagi nin helang, magpakumbaba ka. Kun nagkasala ka, magpahiling ka nin pagsolsol. 22Kun nanuga ka sa Kagurangnan, otobon mo iyan sa lalong madaling panahon. Dai ka maghalat sagkod na madali ka nang magadan bago mo gibohon an dapat na gibohon. 23Alagad bago ka maggibo nin siring na panuga, magin amdam ka ngona sa pag-otob kaiyan. Hare pagbaloa an pagkamatinios nin Kagurangnan. 24Isipa an saiyang kaanggotan sa aldaw nin saimong pagkagadan. Kun mag-atubang ka na sa saiyang paghukom, boot mong talikodan ka niya? 25Kun yaon na saimo an gabos na mawot mo, isipa kun paano an pagigin gutom, kun paano an pagigin dukha. 26Pwedeng magliwat an gabos sa laog sana nin sarong aldaw; pwedeng maghiro tolos an Kagurangnan. 27Kun madonong ka, magigin maingat ka sa gabos mong gibo. Kun nasa palibot mo an kasalan, orog kang magin maingat nganing dai ka magkasala. 28An lambang tawong may pakasabot nakakaaram kun ano an kadonongan asin gagalangan an siisay man na igwa kaiyan. 29Kun pinapahalagahan mo an kadonongan sa panahon na madangog mo iyan, magigin madonong ka man ngapit, asin an saimong mga tataramon paggigikanan nin kadonongan para sa iba.
Pagpugol sa Sadiri
30Dai mo pagsunodon an kinabanon mong mga kamawotan, kundi pugolon mo an mga iyan. 31Kun tutugotan mo an saimong sadiri na makamtan an lambang kamawotan, iyan an maghahatod saimo na magin ngingisihan kan saimong mga kaiwal. 32Dai ka mamuhay sa luho; an gasto sa siring na pamumuhay iyo an madara saimo sa kadukhaan. 33Hare pagigin sarong makilimos huli sa panunubli para sa magastong mga bangkete kun mayo ka kan tamang halaga.
Currently Selected:
Sirac 18: MBBBIK92
Highlight
Copy
Compare
Share
Want to have your highlights saved across all your devices? Sign up or sign in
Marahay na Bareta Biblia © Philippine Bible Society, 1992.