Sirac 20
20
Pakaaram kun Nuarin dapat Magtaram
1Igwa nin pagtuyaw na bakong tama sa panahon; igwa man nin tawong dai nagtataram alagad madonong. 2Alagad mas marahay na tuyawon mo an sarong tawo ki sa tagoon mo sana an saimong kaanggotan. 3Akoon mo kun ika nasasala, asin malilikayan mo an mapasopog. 4An pagpasabot nin sarong bagay sa paagi nin kosog nakakaagid sa sarong kapon na lalaki na naghihingowang lupigan an sarong daraga. 5Igwa nin mga tawo na pinaghonang madonong huli ta bako sindang matinaram; an iba dai nagugustohan huli ta sobra kun minataram. 6Igwa nin mga tawong dai naggigirong huli ta dai ninda aram an itataram; an iba nagkakaalo huli ta aram ninda an tamang panahon kun nuarin mataram. 7An sarong madonong na tawo dai minataram sagkod na dai minadatong an tamang panahon, alagad an sarong mahambog na lolong dai nakakaaram kun arin an panahon na iyan. 8Mayo nin makakatagal sa sarong tawo na halawig nin marahay kun minataram asin dai minatao sa iba nin panahon tanganing magtaram.
Biglang Pagliwat nin Palad
9An maraot na swerte pwede man na magin dalan pasiring sa kauswagan, asin an marahay na swerte pwede man na magin pasiring sa pagkawarae.
10Kun minsan an pagigin matinao nugad dai minabunga nin marahay, alagad sa ibang panahon minabunga iyan nin doble.
11An onra pwedeng ribayan nin pagkapasopog, alagad igwang mga tawo na nakaitaas sa mga lugar nin onra hale sa mapakumbabang kamugtakan.
12Kun minsan an sarong tawo naghohona na nakatawad siya, alagad pitong doble palan an ibinayad niya.
13Kun minataram an sarong madonong na tawo, nagkakaigwa siya nin mga katood. An sarong mangmang, maski magpauran pa nin pag-omaw sa gabos na tawo, iyan dai makakatabang saiya minsan kadikit. 14An regalo nin sarong lolong dai mo mapapakinabangan; an halaga kaiyan bakong arog kan nasa isip niya.#20:14 an halaga…isip niya; o linalaom sana niyang bayadan siya. 15Dikit siya kun magtao, alagad dakul kun maghanap nin sala, na saiyang ikukurahaw tanganing madangog kan bilog na daga. Kun pinasubli ka niya ngunyan, boot niyang ipuli mo iyan sa aga. (Bakong maoongis ka sa tawong arog kaiyan?) 16Dangan masabi an lolong na tawo, “Mayong namomoot sako. Mayong nagpapahalaga kan ginigibo ko para sainda. Kinukua ninda an itinatao ko sainda, alagad linilibak ninda ako.” 17Tama siya—siya an danay na ngingisihan kan gabos.
An Bakong Tama na Pagtaram
18An pagkadalinas kan dila mas maraot ki sa pagkadalinas sa semento; mahihidali an pagbagsak kan tampalasan arog kan pagkadalinas saka pagbagsak nin sarong tawo.
19An sarong daing galang na tawo nakakaagid sa sarong istorya na inosip sa salang panahon, na danay na nasa ngoso kan mangmang.
20An kasabihan na naghahale sa ngoso nin sarong lolong dai aakoon, huli ta itinataram niya iyan sa bakong tamang panahon.
21An sarong tawo pwedeng maolang sa pagkakasala kan saiyang kadukhaan, kaya kun nagpapahingalo siya, dai siya nagbabasol.
22An buhay nin sarong tawo pwedeng mawara huli sa sopog, o mawara huli kan sa lolong niyang itsura.
23An sarong tawong nangangako sa sarong katood huli ta dai siya tataong magsayuma, naggigibo nin kaiwal na mayo nin tunay na dahelan.
24An pagputik sarong makanos na digta sa ugale nin sarong tawo, alagad danay ining ginigibo kan mga mangmang. 25An sarong mahabon mas marahay pa ki sa sarong tood nang magputik, alagad kapahamakan an aabotan kan duwa. 26An sarong putikon mayo nin onra. Danay siyang namumuhay sa kasosopgan.
An Pag-ingat kan Kadonongan
27Magtaram ka nin may kadonongan, asin mangengenot ka sa daga. An sarong may isip na tawo mawiwilihan nin mga darakulang tawo. 28Dai ninda tatawan nin halaga an saimong mga sala, kaya omahon mo an daga asin anihon mo an bunga!
29Mga regalo saka mga suhol an nakakabuta maski kan mga madonong na tawo; nakakaagid iyan sa busal na minaolang kan dapat na gibohon na pagtuyaw.
30An kadonongan na dai ikinakapahayag nakakaagid sa yaman na ilinubong—pareho iyan mayo nin pakinabang. 31Alagad mas marahay an sarong tawo na nagtatahob kan saiyang kalolongan ki sa saro na nagtatago kan saiyang kadonongan.
Currently Selected:
Sirac 20: MBBBIK92
Highlight
Copy
Compare
Share
Want to have your highlights saved across all your devices? Sign up or sign in
Marahay na Bareta Biblia © Philippine Bible Society, 1992.