Sirac 16
16
An Padusa nin Dios sa mga Parakasala
1Dai dapat pagmawoton an sarong dakulang pamilya kun mayong pakinabang an kaakian. An bakong diosnon na mga aking lalaki dai dapat na ipag-orgulyo. 2Dakul man an saimong kaakian, dai mo sinda paghilingon na may pag-orgulyo sagkod na dai sinda natatakot sa Kagurangnan. 3Dai ka maglaom nin marahay sa saindang noodma o maglaom na mabubuhay sinda sa halawig na panahon. An sarong aki na naggigibo kan kabotan nin Kagurangnan orog pa ki sa sangribo na dai nagigibo kaiyan.#16:3 Sa Hebreyo na naggigibo…dai naggigibo kaiyan; sa Griyego orog pa ki sa sangribo. Mas marahay pang magadan na mayong aki ki sa magkaigwa nin kaakian na bakong diosnon.
4Huli sa kadonongan nin sarong tawo, madakul an mga nag-eerok sa sarong syudad, alagad huli sa sarong tribu nin mga maraot na tawo, mawawara an mga nag-eerok diyan. 5Nahiling ko na an siring na mga bagay asin orog pa sa mga ini an sakong nadangog. 6An kaanggotan nin Kagurangnan malaad laban sa sadit na katiriponan nin mga parakasala o bakong makinuyog na nasyon. 7Dai niya pinatawad idtong suanoy na mga higante na nagrebelde saiya, mga higanteng nagsarig sa saindang kosog. 8Nauyam siya sa kapalangkawan kan mga tawong kataraed ni Lot, asin dai niya sinda pinaligtas. 9Dai niya naherakan idtong nasyon na saiyang pinuho huli kan saindang mga kasalan, 10ni idtong seis syentos mil na mga tawong nagralakaw sa kalangtadan na nagtiripon sa pagrebelde. 11Maski igwa duman nin saro sanang tawo na matagas an payo, nagin sarong ngangalasan kutana kun dai siya napadusahan. Maheherakon an Kagurangnan, alagad pwede man siyang maanggot. Pwedeng maherak siya nin marahay asin pwedeng maanggot siya nin makuri. 12An saiyang pagkaherak dakula, siring na an saiyang padusa dakula. Hinuhukoman niya an mga banwaan sosog sa saindang ginibohan. 13Dai makakadulag an parakasalang dara an saiyang hinabonan. Babalosan nin Kagurangnan an pagigin matinios kan mga diosnon. 14Babalosan nin Kagurangnan an lambang matanos na tawo;#16:14 Sa Hebreyo Babalosan…tawo; sa Griyego Tinatawan niya nin lugar an lambang gibo nin pagkaherak. aakoon kan lambang saro an maninigo saiya.#16:14 Sa nagkapirang kasuratan idinagdag an bersikulo 15-16: Pinatagas nin Kagurangnan an payo kan hade nin Egipto kaya dai niya minidbid an Kagurangnan, tanganing maaraman kan kinaban an mga gibo nin Kagurangnan. 16 Naheherakan niya an bilog na linalang; linaen niya an saiyang liwanag sa kadikloman sa paagi nin plumo.
17Dai ka nanggad magsabi, “Tatagoan ko an Kagurangnan. Mayo nin siisay man duman sa itaas na makakagiromdom sako. Sa kadaklan kan mga tawo, dai ako mamimidbidan. Ano an halaga kan sakong kalag sa kadakulaan nin linalang? 18Pag-abot nin Kagurangnan, tatakigan an gabos: an kinaban asin an katubigan sa irarom kaiyan, an kahiwasan asin an kalangitan sa ibabaw kaiyan. 19Magkukunogkunog an kabukidan, asin tatakigan an mga pundasyon kan kinaban sa panahon na hilingon niya sinda. 20Dai ako nagigiromdoman nin Kagurangnan. Mayo nin nagpapahalaga sa ginigibo ko. 21Kun magkasala ako asin hilom na magin maimbod, mayong makakaaram kaiyan.#16:21 Sa Hebreyo 20-21 Dai ako…makakaaram kaiyan; sa Griyego 20 Dakula iyan nin marahay tanganing masabotan nin tawo. Mayo nin makakasabot kan saiyang mga paagi. 21 Kadaklan kan saiyang mga gibo dai nahihiling arog kan doros nin bagyo. 22Kun gigibohon ko an tama, mayo man nin maosip sa Kagurangnan dapit kaiyan. Siisay man an boot na maghalat saiya? Maluway siya sa paggibo kan sinabi niyang gigibohon.” 23An tawong halipot an isip asin an mangmang sana an mag-iisip nin siring kaini.
An Kadonongan nin Dios sa Linalang
24Aki ko, paghinanyog asin pagdangog sako; orog na madadagdagan an saimong naaaraman kun gibohon mo iyan. 25Itatao ko saimo an orog karahay saka tunay na katukdoan.
26Sa kapinonan ginibo nin Kagurangnan an saiyang trabaho nin paglalang,#16:26 Sa Hebreyo Sa kapinonan…paglalang; sa Griyego Sa paghukom kan Kagurangnan, an saiyang trabaho nagpoon sa kapinonan. asin tinawan niya nin sadiring lugar an gabos.
27Pinakarahay niya an gabos sa mayong tapos na orden
asin nagboot siya na magin arog kaidto sagkod pa man.
Mayo nin nagugutom o napapagal
o minaontok sa pagtrabaho.
28Dai sinda nagsusurosoan asin dai
nanggad sinda minalapas kan saiyang itinaram.
29Kan an gabos na ini magibo nin Kagurangnan,
hiniling niya an kinaban dangan pinano iyan nin marahay na mga bagay.
30Pinano niya iyan kan gabos na klase nin linalang
na kaipuhan magadan dangan magbalik sa alpog na pinaghalean kaiyan.
Currently Selected:
Sirac 16: MBBBIK92
Highlight
Copy
Compare
Share
Want to have your highlights saved across all your devices? Sign up or sign in
Marahay na Bareta Biblia © Philippine Bible Society, 1992.