Sirac 15
15
1Kun may pagkatakot ka sa Kagurangnan, gigibohon mo ini. Mamumugol ka sa saiyang Katogonan, asin makukua mo an Kadonongan. 2Madatong siya sa pagsabat saimo, arog sa sarong ina o sa hoben na agom na babae. 3Papakakanon ka niya kan tinapay nin pakasabot, asin tatawan ka niya kan tubig nin kadonongan nganing inomon. 4Magsarig ka saiya asin dai ka matutumba, dangan dai ka mapapasopog. 5Ilalangkaw ka niya orog pa ki sa saimong mga kanatad; kun magtaram ka sa katiriponan, siya an matao saimo kan tamang mga tataramon. 6Makakakua ka nin kagayagayahan asin tunay na kaogmahan; gigiromdomon sagkod pa man an saimong ngaran.
7Alagad an mga lolong o mga parakasala dai nanggad makakahiling sa Kadonongan. 8An Kadonongan mayo nin pakilabot sa mga tawong mapaabaw-abaw; dai nanggad siya minalaog sa isip kan mga putikon. 9Bakong tama na an himno nin pag-omaw awiton nin sarong parakasala, huli ta daing katotoohan an saiyang pagsamba. 10An himno dapat sarong kapahayagan nin kadonongan, na an Kagurangnan mismo an nagpasabong.
An Deretso nin Tawo sa Pagpili
11Hare pagbasola an Kagurangnan kun nagkasala ka; dai niya gigibohon an anoman na saiyang naoongisan.#15:11 Sa Hebreyo dai niya gigibohon an anoman na saiyang naoongisan; sa Griyego dai mo paggibohon an ikinakaongis nin Kagurangnan. 12Dai ka magsabing linagalag ka nin Kagurangnan; dai niya kaipuhan an tabang nin mga parakasala tanganing mangyari an saiyang mga katuyohan. 13Ikinakaongis nin Kagurangnan an gabos na klase nin karatan asin dai namomotan an mga iyan kan mga may pagkatakot sa Kagurangnan. 14Kan lalangon nin Kagurangnan an mga tawo sa kapinonan, pinabayaan niya sindang maggibo kan saindang mawoton. 15Kun boot mo, pwede mong otobon an mga kabotan nin Kagurangnan; pwede kang magin maimbod saiya o dai. 16Ibinugtak niya sa atubang mo an kalayo asin tubig; unata an saimong kamot asin kuaha an mawoton mo. 17Igwa ka nin pagpipilian: buhay o kagadanan; mapapasaimo an arin man na pilion mo. 18Dakula an kadonongan nin Kagurangnan; mapangyari siya asin nahihiling niya an gabos. 19Aram niya an gabos na ginigibo nin sarong tawo, asin inaataman niya idtong mga may pagkatakot saiya. 20Dai pa nanggad siya nagboot sa kiisay man na magin maraot o nagtugot sa kiisay man na magkasala.
Currently Selected:
Sirac 15: MBBBIK92
Highlight
Copy
Compare
Share
Want to have your highlights saved across all your devices? Sign up or sign in
Marahay na Bareta Biblia © Philippine Bible Society, 1992.