Sirac 14
14
1Paladan an sarong tawo na dai nasasala sa saiyang pagtaram; mayo siyang dapat na ipaghandal. 2Paladan an tawong dai kinokondenar kan sadiring puso, asin dai nawawaraan nin paglaom!
An Tamang Paggamit kan Kayamanan
3Dai dapat magyaman an sarong maimot. Ano an halaga kan kwarta sa sarong maimot? 4Kun paindahan mo an saimong sadiri tanganing makatipon nin kayamanan, tinitipon mo sana iyan para sa ibang tawo. An ibang tawo an magamit kan saimong kayamanan tanganing mamuhay sa luho. 5Paano ka magigin matinao sa ibang tawo kun dai mo natatawan an saimong sadiri, kun habo mo nganing gastohon an saimong kayamanan para sa saimong kaogmahan? 6Mayo nang mas maraot pang tawo ki sa tawong maimot sa saiya man sana; iyan sarong kasalan na nagdadara nin sadiring padusa. 7Sa panahon na an siring na tawo maggibo nin marahay, iyan dai tinutuyo; an saiyang pagkamaimot mahahayag sa madaling panahon. 8An sarong maimot sarong maraot na tawo; tinatalikodan niya an pangangaipo nin iba 9asin dai siya nakokontento kan yaon na saiya. An pagkamaimot#14:9 Probableng teksto pagkamaimot; sa Griyego makuring inhustisya. iyo an minapasadit sa kalag nin sarong tawo. 10An ibang tawo sobra man an pagkamaimot kaya dai sinda minabugtak maski tinapay sa sadiri nindang lamesa.
11Aki ko, atamana nin marahay an saimong sadiri sosog sa saimong makakaya, asin magdara ka nin maninigong mga dolot sa Kagurangnan. 12Giromdoma na dadalawon ka kan kagadanan sa maabot na aldaw, asin dai itinaram saimo kun nuarin an aldaw na iyan. 13Bago dumatong an aldaw na iyan, magin maboot ka sa saimong mga katood; magin matinao ka sagkod na kaya mo. 14Dai mo pagpaindahan an saimong sadiri, maski na kan kaogmahan para sa sarong aldaw. Kun igwa kang boot na gibohon asin bako iyan paglapas sa katogonan, ipadagos mo iyan! 15Maabot an panahon na babarangaon asin itatao sa iba an gabos mong pinagpagalan. 16Kaya magin matinao ka; alagad magin andam ka man sa pag-ako kan hale sa ibang tawo. Mag-ogma ka, huli ta dai mo makukua an kaogmahan sa kinaban kan mga gadan. 17An gabos na nabubuhay nagigin daan arog sa gubing. An suanoy na katogonan nagboboot na kaipuhan magadan kita. 18An mga tawo nakakaagid sa mga dahon nin marambong na kahoy. An mga nahuhulog na dahon nariribayan nin bago; mantang nagagadan an iba sa sato, namumundag man an iba. 19Malalapa asin mawawara an gabos na gibo kan kamot nin tawo, kaiba kan kaggibo sainda.
An Kaogmahan sa Pagkakaigwa nin Kadonongan
20Paladan an tawong may pagmakulog sa Kadonongan asin naggagamit nin tamang kaisipan. 21An siisay man na nag-aadal kan mga paagi nin Kadonongan makakanood man kan saiyang mga sekreto. 22Hanapa an Kadonongan arog sa sarong paraayam, asin hipaan mo siya sa saiyang pinag-aagihan. 23Magdungaw ka sa saiyang mga bintana asin magdangog sa saiyang mga pintoan. 24Magkampo ka harani sa saiyang harong, 25asin mapapasaimo an pinakamarahay na lugar na pag-eerokan. 26-27Duman mo ipatugdok an saimong harong, ligtas sa irarom kan saiyang mga sanga, asin nalilindongan.#14:26-27 Sa Hebreyo Duman…nalilindongan; sa Griyego Tugoteng ingatan niya an saimong kaakian. Mamuhay kang ligtas sa irarom kan saiyang mga sanga, nalilindongan, napapalibotan kan saiyang kamurawayan.
Currently Selected:
Sirac 14: MBBBIK92
Highlight
Copy
Compare
Share
Want to have your highlights saved across all your devices? Sign up or sign in
Marahay na Bareta Biblia © Philippine Bible Society, 1992.