Sirac 11
11
1Kun madonong an sarong dukha, igwa siya nin dahelan na mag-orgulyo, asin ibibilang siyang sarong dakulang tawo.
Mga Panluwas na Itsura
2Dai nindo pag-omawon an sarong tawo huli kan saiyang magayon na lalawogon, ni kaongisan an sarong tawo huli kan saiyang kakanosan. 3Kun ibabaing sa kadaklan kan mga naglalayog na linalang, an sugod sadit sana, alagad an dugos na ginigibo kaiyan iyo an pinakamahamis sa mga kakanon. 4Dai nindo pag-olog-ologon an sarong tawo na nadidipisilan sa pamumuhay asin nagsusulot na nin girising gubing.#11:4 Sa Hebreyo Dai nindo…gubing; sa Griyego Dai nindo ipagpaabaw-abaw an marahay na mga gubing, asin dai nindo ipaglangkaw an saindong sadiri kun kamo tawan nin onra. An Kagurangnan naggigibo nin makangangalas na mga bagay na dai naaaraman nin mga tawo. 5Kadakul nang mga hade an nahale sa saindang trono dangan nagtapos kan saindang pagigin hade na nakatukaw sa daga, mantang an saindang mga korona isinulot nin mga tawong dai pa lamang namidbidan kaidto. 6Kadakul nang mga pamayo an nawaraan nin onra, asin kadakul nang mga bantog na tawo an nahulog sa kapangyarihan nin iba.
Magin Maingat
7Magsiyasat ka ngona bago ka magtaram na sala an saimong kapwa; isipon mo ngona, dangan ka magsagwe. 8Dai ka magtaram mantang igwang nagtataram; dangogon mo ngona an sinasabi niya bago ka magsugpon. 9Dai ka makipasuhay dapit sa sarong bagay na mayo ka nin pakilabot, ni magtukaw sa kaibahan nin mga parakasala kun hinuhukoman ninda an sarong kaso.
10Aki ko, dai ka makilabot sa kadakul na bagay. Kun maghingowa kang makagibo nin dakul, ika man sana an magtitios. Dai mo mahahaman an saimong trabaho, asin dai mo man iyan madudulagan. 11Halimbawa, uya an sarong tawo na dai nag-oontok sa pagtrabaho arog sa sarong oripon, alagad danay siyang nahuhudyan sa saiyang mga gigibohon. 12Uya man an sarong tawo na dukhang marahay, maluway magtrabaho asin nangangaipong tabangan; alagad nawiwilihan siya nin Kagurangnan asin iliniligtas siya sa saiyang kasakitan. 13Kun marahay na an saiyang kamugtakan, napapangalas an gabos na tawo.
14An gabos na bagay naghahale sa Kagurangnan: marahay asin maraot, buhay asin kagadanan, kadukhaan asin kayamanan. 15An kadonongan, an pakasabot, an pakaaram kan Katogonan, an pagkamoot, asin an paggibo nin mga marahay na bagay—an gabos na ini naghahale sa Kagurangnan. 16An pagkasala asin an kadikloman danay na nasa kaibahan kan mga parakasala poon sa kapinonan, asin an mga naoogma sa karatan magkakaigwa kaiyan sagkod na sinda maggurang. 17An mga regalo nin Kagurangnan sa mga diosnon gabos mga regalong nagdadanay. Kun mawilihan ka niya, danay kang magigin mauswag. 18An sarong tawo pwedeng magyaman huli sa maigot na pagtrabaho asin sa pagsayuma sa saiyang sadiri kan mga bagay na nagtataong kaogmahan, alagad ano an makukua niyang pakinabang diyan? 19Nagsasaboot siya, “Pwede na akong magtukaw-tukaw ngunyan asin mag-ogma huli sa sakong pinagalan.” Alagad dai niya aram kun magigin halawig pa an saiyang buhay asin mawawalat niya sa iba an saiyang kayamanan.
20Pahalagahan nindo an saindong katongdan asin ipaglaban nindo iyan; maggurang kamo sa saindong trabaho. 21Dai kamo maara sa mga naginibohan kan mga parakasala, kundi magsarig kamo sa Kagurangnan asin magpadagos sa saindong trabaho; huli ta pasil para sa Kagurangnan na sa madaling panahon magyaman an sarong dukha. 22Aakoon kan mga diosnon an bendisyon nin Kagurangnan bilang balos sainda, asin pwedeng itao tolos sainda an siring na bendisyon sa madali sanang panahon. 23Dai kamo mahandal dapit sa saindong kaipuhan, o sa kauswagan na mapapasaindo sa maabot na panahon. 24Siring man, dai kamo mag-isip na yaon na saindo an gabos nindong kaipuhan, o na mayong maraot na maabot sa saindo sa maabot na panahon. 25Sa aldaw nin kauswagan, nalilingawan an kasakitan, asin sa aldaw nin kasakitan dai nagigiromdoman an kauswagan. 26Pasil sana para sa Kagurangnan an maghalat sagkod sa aldaw nin kagadanan nin sarong tawo tanganing baloson o padusahan siya. 27Sa aldaw na iyan mahahayag sa gabos an saiyang mga ginibo; an gabos niyang kaogmahan pwedeng mawara sa oras na iyan nin kasakitan. 28Kaya, dai kamo maghona na maogma an buhay nin siisay man sagkod na matapos iyan, huli ta dai pa nahahayag an gabos na patotoo sagkod na dai pa nagagadan an tawong iyan.#11:28 Sa Hebreyo an gabos…iyan; sa Griyego an sarong tawo mamimidbidan huli kan saiyang kaakian.
Magin maingat sa Pagpili nin mga Katood
29Magin maingat kamo dapit sa klase nin tawo na aalokon nindo sa saindong harong, huli ta kadakul an paagi na pwedeng madaya kamo kan mga tusong tawo. 30An mapaabaw-abaw na tawo arog sa pangkati na agbaan sa sarong hawla, na nakakadagka nin iba asin arog siya sa sarong espiya na naghahanap kan saimong mga kaluyahan.#11:30 Sa Hebreyo naghahanap…kaluyahan; sa Griyego naghahalat kan saimong pagbagsak. 31Ipapahiling niyang marahay an karatan asin hahanapan niya nin sala an mahahalagang mga gibo. 32Hale sa sarong sadit na silyab minagikan an dakulang kalayo, asin an sarong parakasala naghahalat sana kan tamang panahon tanganing maggibo nin kadahasan. 33Mag-ingat kamo sa mga tawong arog kaiyan asin sa saindang mga maraot na plano; sinda an madara saindo sa danay na pagkaraot. 34Kun magpasakat kamo nin tawong bako nindo midbid, madara iyan nin problema na tibaad iyo an masiblag saindo sa saindong sadiring pamilya.
Currently Selected:
Sirac 11: MBBBIK92
Highlight
Copy
Compare
Share
Want to have your highlights saved across all your devices? Sign up or sign in
Marahay na Bareta Biblia © Philippine Bible Society, 1992.