Sirac 12
12
1Kun maggibo kamo nin karahayan, aramon nanggad nindo kun siisay an magkikinabang huli kaiyan; dangan dai masasayang an saindong ginibo.#12:1 Sa Hebreyo dai masasayang…ginibo; o pasasalamatan kamo huli kan saindong ginibo. 2Babalosan kamo para sa anoman na karahayan na saindong ginibo sa sarong diosnon na tawo. Kun bako siya an mabalos saindo, an Kahorohalangkawe iyo an mabalos saindo. 3Mayo nanggad nin karahayan na minadatong sa sarong tawo na nagraranga sa tawong maraot; bako iyan sarong matanos na gibo.#12:3 Sa Hebreyo nagraranga…gibo; sa Griyego ginigibong ugale an karatan o habong magtao sa mga dukha. 4Magtao kamo sa mga diosnon na tawo, alagad dai kamo magtabang sa mga parakasala. 5Gumibo kamo nin marahay sa mga mapakumbaba, alagad dai kamo magtao nin anoman sa bakong diosnon. Dai kamo magtao sainda nin pagkakan, ta tibaad gamiton ninda an saimong karahayan laban saimo. An anoman na marahay na bagay na gibohon mo para sainda magdadara saimo nin dobleng beses na kasakitan. 6Naoongisan man kan Kahorohalangkawe an mga parakasala, asin papadusahan niya sinda. 7Magtao kamo sa mga matanos na tawo, alagad dai kamo magtabang sa mga parakasala.
8Kun marahay an dalagan kan panahon, masakit na maaraman kun siisay an mga tunay na katood, alagad sa panahon nin kasakitan mamimidbidan nanggad an saimong mga kaiwal; 9babayaan ka maski kan saimong mga katood. Alagad sa panahon na mauswag ka, maski an saimong mga kaiwal magsasagin-sagin na mga katood mo.#12:9 Sa Hebreyo magsasagin-sagin…katood mo; sa Griyego magmomondo. 10Dai ka nanggad magsarig sa sarong kaiwal; an saiyang karatan nakakaagid sa takla na nakakaraot. 11Mag-ingat ka asin magin andam laban saiya, maski na magsagin-sagin siyang mapakumbaba. Nakakaagid siya sa sarong metal na salming na tinatakla kun dai mo paglinigan. 12Dai mo siya pagpatukawon sa kataed mo ta tibaad ibagsak ka niya dangan siya na an magtukaw sa lugar mo; dai mo siya pagpatukawon sa parteng too mo ta tibaad hingowahon niyang makua saimo an lugar nin onra. Dangan maaaraman mo an katotoohan kan sakong mga tataramon asin magbasol ka kun magiromdoman mo an mga iyan. 13Siisay an maheherak sa sarong nag-aataman nin halas kun singhoton siya kaiyan o sa sarong paramanso nin lalaw na hayop kun kagaton siya kaiyan? 14Kaya mayo man nin maheherak sa saimo kun makiiba ka sa mga parakasala asin mag-ayon sa mga sala nindang gibo.
15An sarong kaiwal makikiiba saimo sa halipot na panahon, alagad dai madamay saimo sa panahon nin kasakitan. 16Mga mahamis na tataramon an sasabihon niya saimo mantang nag-iisip siya kun paano ka masisiod. Magsasagin-sagin siyang nakikidamay sa kamondoan mo, alagad gagadanon ka niya kun igwang oportunidad. 17Kun mag-abot saimo an kapahamakan, makukua mo siyang naghahalat sa pagsingkog saimo mantang nagsasagin-sagin na nagtatabang. 18Pag-abot kan panahon na iyan, mahihiling mo siyang iba na an gawe, nagkukuyongkuyong kan payo, nag-uupak kan mga kamot, asin nagpapalakop nin manlaen-laen na osipon dapit saimo.
Currently Selected:
Sirac 12: MBBBIK92
Highlight
Copy
Compare
Share
Want to have your highlights saved across all your devices? Sign up or sign in
Marahay na Bareta Biblia © Philippine Bible Society, 1992.