Salmo 5
5
Pamibi sa Paghagad nin Tabang#AN TITULO KAINI SA HEBREYO: Sarong salmo ni David.
1Hinanyoga an sakong pamibi, Kagurangnan,
himatea an sakong inagrangay.
2Dangoga an paghagad ko nin tabang,
sakuyang Hade asin sakuyang Dios.
Namimibi ako saimo, Kagurangnan;
3pagkaaga dinadangog mo an sakong tingog.
Pagkaaga dolot ko saimo an sarong atang,
dangan minahalat kan saimong kasimbagan.
4Bako ka sarong Dios na naoogma sa karatan;
habo ka sa anoman na kasalan.
5Mga mapaabaw-abaw saimong ikinakauyam,
naoongis ka sa mga paragibong karatan.
6An mga putikon saimong ginagadan;
an mga tawong paha sa dugo asin madaya saimong isinisikwal.
7Alagad huli ta dakula an danay mong pagkamoot,
makakalaog ako sa saimong harong;
makakasamba ako sa banal mong Templo,
makakataong galang sa atubang mo.
8 Kagurangnan, kadakul kan sakong mga kaiwal!
Pangenote ako sa paggibo kan saimong kabotan;
pantaya an saimong dalan na sakong aagihan.
9Huli ta mayo nin katotoohan sa saindang ngoso;
karatan an nasa saindang puso.
An saindang halonan sarong bukas na lulubngan;
an saindang dila pano nin kaputikan.
10Padusahan mo sinda, O Dios, huli kan saindang kasalan.
Huli kan saindang mga plano, logod sinda mapukan.
Pahalea sinda sa saimong atubang,
huli ta sinda nagkasala saka nagtumang saimo.
11Alagad mag-ogma logod an mga minapasurog saimo;
danay na mag-awit sa kaogmahan.
Suroga sinda na mga namomoot saimo,
tanganing mag-ogma sinda sa saimo.
12Benebendisyonan mo an matanos, Kagurangnan;
kalasag nindang pantahob an saimong pagkamoot.
Currently Selected:
Salmo 5: MBBBIK92
Highlight
Copy
Compare
Share
Want to have your highlights saved across all your devices? Sign up or sign in
Marahay na Bareta Biblia © Philippine Bible Society, 1992.
