Salmo 148
148
Pag-apod sa Mga Linalang Tanganing Omawon an Dios
1Omawon an Kagurangnan!
Omawon an Kagurangnan sa kalangitan,
omawon siya sa kaitaasan.
2Omawon nindo siya, gabos na anghel niya,
omawon nindo siya, gabos niyang mga hukbo.
3Omawon nindo siya, aldaw asin bulan;
omawon nindo siya, mga bitoon na maliwanag.
4Omawon nindo siya, kamong mga langit na halangkawon;
asin kamong mga tubig sa ibabaw kan kalangitan.#148:4 MGA TUBIG…KALANGITAN: Hilingon sa Gen. 1:6-7.
5Omawon logod ninda an ngaran nin Kagurangnan!
Huli ta nagboot siya, asin sinda nalalang.
6Nagboot siya na mamugtak sinda sa saindang mga lugar sagkod pa man,
asin dai ninda pwedeng lapason iyan.
7Hale sa daga omawon nindo an Kagurangnan;
kamong nabubuhay sa dagat asin kamong mga kairaroman.
8Kalayo asin uran, yelo asin mga panganoron, omawon nindo an Kagurangnan;
asin kamong makokosog na doros na minakuyog kan saiyang tataramon.
9Omawon nindo siya, mga bulod asin mga bukid,
mga kahoy na nagbubunga asin mga sedro;
10mga hayop na maringis asin magaro,
mga hayop na nagkakamang asin mga gamgam na naglalayog!
11Omawon nindo siya, mga hade asin gabos na banwaan,
mga prinsipe asin gabos na pamayo kan kinaban;
12mga soltero asin mga daraga,
mga gurang na lalaki asin mga aki.
13Omawon nindo an ngaran nin Kagurangnan,
huli ta an ngaran niya iyo sana an dakula;
an kamurawayan niya halangkaw pa sa langit asin sa daga.
14Pinakosog niya an saiyang nasyon,
kaya inoomaw siya kan saiyang mga banal,
kan banwaan nin Israel na saiyang namomotan.
Omawon an Kagurangnan!
Currently Selected:
Salmo 148: MBBBIK92
Highlight
Copy
Compare
Share
Want to have your highlights saved across all your devices? Sign up or sign in
Marahay na Bareta Biblia © Philippine Bible Society, 1992.
