Salmo 147
147
Pag-omaw sa Dios na Makakamhan
1Omawon an Kagurangnan!
Marahay an mag-awit nin pag-omaw sa satong Dios;
siya maugayon, kaya maninigong omawon.
2Pinapatindog nin Kagurangnan an Jerusalem;
ibinabalik niya an mga nabihag na Israelita.
3Binobolong niya an mga pusong naraot,
an mga lugad ninda saiyang binubugkos.
4Aram niya an bilang kan mga bitoon,
lambang saro inaapod niya sa sadiring ngaran.
5An satong Kagurangnan dakula asin makakamhan;
dai masusukol an saiyang kadonongan.
6Binabangon nin Kagurangnan an mga dukha,
alagad an tampalasan rinoronot niya sa daga.
7Mga awit nin pasalamat awiton sa Kagurangnan;
tumugtog sa lira para sa satuyang Dios.
8An langit tinatahoban niya nin mga panganoron,
inaandam niya an uran para sa daga,
pinapatalubo niya an mga doot sa kabubuldan.
9Kakanon itinatao niya sa mga hayop
asin sa mga ogbon na uwak na minaapod saiya.
10An saiyang kaogmahan dai nasa makosog na mga kabayo,
ni sa maisog na mga soldados;
11kundi nawiwilihan nin Kagurangnan an mga may pagkatakot saiya,
an mga minasarig sa danay niyang pagkamoot.
12Omawon mo an Kagurangnan, O Jerusalem!
Omawon mo an saimong Dios, O Sion!
13Huli ta pinapakosog niya an mga trangkahan mo;
benebendisyonan niya an mga kaakian mo.
14Pinapatoninong niya an mga pagdolonan mo;
marahay na trigo an ipinapakakan niya saimo.
15Minatao siya nin pagboot sa daga,
asin an saiyang tataramon tolos sinusunod.
16Nyebeng arog kan lana an itinatao niya;
ambon siring sa abo na iwinawarak niya.
17Pinapauran niya an mga yelo na arog kan mga graba;
siisay an makakatagal sa lipot na saiyang ipinapadara?
18Dangan minatao siya nin pagboot asin an yelo natutunaw;
ipinapadara niya an doros, asin an tubig minabulos.
19An saiyang tataramon ipinapahayag niya ki Jacob,
ki Israel an saiyang mga togon asin pagboot.
20Dai niya iyan ginigibo sa ibang nasyon;
an mga ini mayo nin pakaisi kan saiyang kabotan.
Omawon an Kagurangnan!
Currently Selected:
Salmo 147: MBBBIK92
Highlight
Copy
Compare
Share
Want to have your highlights saved across all your devices? Sign up or sign in
Marahay na Bareta Biblia © Philippine Bible Society, 1992.
