Salmo 145
145
Awit nin Pag-omaw#AN TITULO KAINI SA HEBREYO: Sarong awit nin pag-omaw ni David.
1Oomawon taka, sakuyang Dios asin hade;
magpapasalamat ako saimo sagkod pa man.
2Magpapasalamat ako saimo aroaldaw;
an saimong ngaran oomawon ko sagkod pa man.
3An Kagurangnan dakula asin maninigong omawon;
daing sukol an saiyang kadakulaan.
4Oomawon kan sarong henerasyon sa masunod na henerasyon an mga gibo mo,
ibabalangibog ninda an dakula mong mga gibo.
5Ibabareta ninda an kamurawayan asin kamahalan mo;
mga gibo mong ngangalasan hohorophoropon ko.
6Ibabareta kan mga tawo an mangirhat mong mga gibo;
an saimong kadakulaan irurukyaw ko.
7Ioosip ninda an gabos mong karahayan,
aawiton ninda an saimong katanosan.
8An Kagurangnan maugayon asin maheherakon,
maluya sa pag-anggot asin mayaman sa pagkamoot.
9Siya marahayon sa gabos
asin maheherakon sa gabos niyang linalang.
10An gabos mong linalang magpapasalamat saimo, Kagurangnan,
asin mag-oomaw saimo an saimong mga banal.
11Ibabareta ninda an kamurawayan nin saimong kahadean,
asin ioosip ninda an saimong kapangyarihan,
12nganing an lambang saro makaaram kan saimong mga gibo,
asin kan kamurawayan kan kahadean mo.
13An kahadean mo mayo nin kapinonan asin mayo nin kataposan,
maghahade ka sagkod pa man.
An Kagurangnan maimbod sa gabos niyang tataramon,
asin maugayon sa gabos niyang gibo.
14Tinatabangan niya an gabos na nasasakitan;
binabangon niya an gabos na napapadungkal.
15Gabos na may buhay minalaom saimo;
tinatawan mo sinda nin kakanon kun sinda nangangaipo.
16Tinatawan mo sinda kan maninigo;
itinatao mo an mga kaipuhan kan gabos.
17An Kagurangnan matanos sa gabos niyang mga palakaw,
maheherakon sa gabos niyang gibo.
18Harani siya sa gabos na minaapod saiya;
sa gabos na minaapod saiya nin tudok sa puso.
19Itinatao niya an kamawotan kan mga natatakot saiya;
dinadangog niya an agrangay ninda asin iliniligtas niya.
20Sinusurog nin Kagurangnan an gabos na namomoot saiya;
alagad gagadanon niya an gabos na tampalasan.
21An sakong ngoso maomaw sa Kagurangnan,
an saiyang banal na ngaran omawon logod kan gabos na linalang sa panahon na daing kasagkoran.
Currently Selected:
Salmo 145: MBBBIK92
Highlight
Copy
Compare
Share
Want to have your highlights saved across all your devices? Sign up or sign in
Marahay na Bareta Biblia © Philippine Bible Society, 1992.
