Salmo 144
144
An Hade Nagpapasalamat sa Dios huli sa Kapangganahan#AN TITULO KAINI SA HEBREYO: Ni David.
1Pag-omawon an Kagurangnan,
sakong gapo na sinasarigan,
sa pakigera ako saiyang tinutukdoan,
sa pakilaban ako saiyang inaandam.
2Siya an danay kong pagkamoot, an sakong parasurog,
sakong pailihan asin paraligtas,
an kalasag na sakong sinasarigan.
Dinadaog niya an mga nasyon na sakop ko.
3 Kagurangnan, ano an tawo ta minimidbid mo;
tadaw ta siya pinapahalagahan mo?
4An tawo siring sa sarong hinangos;
an saiyang mga aldaw siring sa aninong minaagi.
5 Kagurangnan, buksan mo an langit asin humilig ka;
dootan mo an mga bukid asin ini maaraso.
6Sugoon mo an kikilat asin iwarak mo an saimong mga kaiwal;
paraon mo sinda asin daoga.
7Igawagaw mo an saimong kamot hale sa itaas,
ligtasan ako asin hawasa sa katubigan;
ligtasan ako sa kamot kan mga dayuhan,
8na an mga ngoso dai nagtataram nin katotoohan,
na an toong kamot nanunumpa sa kaputikan.
9Maawit ako saimo nin bagong awit, O Dios;
matugtog ako sa arpa asin maawit saimo.
10Tinatawan mo nin kapangganahan an mga hade
asin iliniligtas mo an saimong sorogoon na si David.
11Ligtasan ako sa maringis na mga kaiwal;
ligtasan ako sa kamot kan mga dayuhan,
na an mga ngoso dai nagtataram nin katotoohan,
na an saindang toong kamot nanunumpa sa kaputikan.
12An samong mga aking lalaki
magtalubo logod na masarig arog kan mga tinanom.
An samong mga aking babae
gumayon logod arog kan mga harigi,
na samno sa mga kanto nin sarong palasyo.
13An samong mga harong-harong mapano logod
nin manlaen-laen na kakanon.
An samong mga karnero sa kaomahan
mag-ogbon logod nin dai mabilang.
14Dumakul logod an samong mga baka,
dai logod mataktakan an mga ini sa saindang pagbados.
Mayo logod nin mga pagtangis sa samong mga tinampo.
15Maogma an banwaan na may siring na bendisyon!
Maogma an banwaan na an Dios iyo an Kagurangnan!
Currently Selected:
Salmo 144: MBBBIK92
Highlight
Copy
Compare
Share
Want to have your highlights saved across all your devices? Sign up or sign in
Marahay na Bareta Biblia © Philippine Bible Society, 1992.
