Salmo 143
143
Pamibi Tanganing Tabangan#AN TITULO KAINI SA HEBREYO: Sarong tula nin David.
1Hinanyoga an sakong pamibi, Kagurangnan;
dangoga an sakong pakimaherak!
Simbaga ako huli kan saimong pagkamaimbod asin pagkamatanos.
2Dai mo paghukoman an sorogoon mo,
huli ta mayo nin matanos sa atubang mo.
3Linalamag ako kan sakong kaiwal;
rinoronot niya an sakuyang buhay.
Pinapatukaw niya ako sa kadikloman,
siring sa mga haloy nang nagadan.
4Kaya pinanluluya an sakong espiritu,
asin natatakot an puso ko.
5Ginigiromdom ko an mga aldaw kaidto;
mga gibo mo hinohorophorop ko;
iniisip-isip an saimong mga ginibo.
6Iniitaas ko an mga kamot ko sa pagpamibi saimo;
siring sa alang na daga, an kalag ko napapaha saimo.
7Paghumare sa pagsimbag sako, Kagurangnan!
Pinanluluya an sakuyang espiritu!
Hare pagtagoa sako an lalawogon mo,
tibaad makaarog ako sa mga nahulog sa lulubngan.
8Pagkaaga pagiromdoman sako an danay mong pagkamoot,
huli ta minasarig ako saimo.
Itukdo mo sako an dalan na aagihan ko,
huli ta an sakong kalag iniitaas ko saimo.
9Ligtasan ako, Kagurangnan, sa sakong mga kaiwal;
sa sakong pagdulag, ika an sakong pailihan.
10Tukdoe ako na maotob an saimong kabotan,
huli ta ika an sakuyang Dios.
Pangenotan logod ako kan saimong espiritu
sa dalan na patag asin ligtas.
11Ligtasan ako, Kagurangnan, huli kan saimong ngaran;
sa saimong pagkamatanos, agawa ako sa mga kasakitan.
12Huli kan pagkamoot mo sako, tunawa an sakong mga kaiwal;
huli ta ako sorogoon mo, gadana an sakong mga kalaban.
Currently Selected:
Salmo 143: MBBBIK92
Highlight
Copy
Compare
Share
Want to have your highlights saved across all your devices? Sign up or sign in
Marahay na Bareta Biblia © Philippine Bible Society, 1992.
