Salmo 141
141
Pamibi sa Pagkabanggi#AN TITULO KAINI SA HEBREYO: Sarong salmo ni David.
1Nag-aapod ako saimo, Kagurangnan,
paghumare sa pagtabang sako!
Dangoga ako kun minaapod ako saimo!
2Akoon mo an sakong pamibi siring sa insenso;
asin an initaas kong mga kamot bilang pamangging atang.
3 Kagurangnan, bugtakan mo nin bantay an sakuyang ngoso;
bantayan mo an pintoan nin sakuyang ngabil.
4Likayan an puso ko sa anoman na maraot
asin sa paggibo nin mga karatan,
kaiba kan mga paragibo nin kasombikalan.
Hare ako pagpaayona sa saindang mga pyesta.
5Pwede akong padusahan o sagweon nin tawong matanos sa pagkaherak;
alagad dai ako maako nin kaomawan sa kamot kan tampalasan,
huli ta danay akong namimibi tumang sa saindang karatan.
6Kun itao na sinda sa mga mapadusa sainda,
dangan ninda masasabotan na totoo an tataramon nin Kagurangnan.
7Siring sa kahoy na tinitiak asin binabaak,
an saindang mga tolang iwawarak sa ngoso kan Sheol.#141:7 Sa Hebreyo, an bersikulo 5 sagkod 7 bakong malinaw.
8Alagad itinitingkalag ko an sakong mga mata sa saimo, O Kagurangnan Dios,
sa saimo ako minapaili; hare ako pagpabayae na mayong masasarigan.
9Likayan ako sa siod na inandam ninda para sako;
asin man sa mga litag kan mga naggigibo nin maraot.
10An mga tampalasan mahulog logod sa litag na saindang inandam,
mantang ako padagos sa sakong paglakaw.
Currently Selected:
Salmo 141: MBBBIK92
Highlight
Copy
Compare
Share
Want to have your highlights saved across all your devices? Sign up or sign in
Marahay na Bareta Biblia © Philippine Bible Society, 1992.
