Salmo 139
139
An Gabos Aram nin Dios#AN TITULO KAINI SA HEBREYO: Sarong salmo ni David.
1 Kagurangnan, ako siniyasat mo asin namidbid mo.
2Aram mo kun ako minatukaw o minatindog;
nababasa mo sa harayo an gabos kong iniisip.
3Hinihiling mo kun ako minalakaw o minahigda;
aram mo an gabos kong mga gibo.
4Bago ko ikataram an anoman,
O Kagurangnan, aram mo na iyan.
5Yaon ka sa sakong likodan asin enotan;
sinusurog mo ako kan saimong kapangyarihan.
6An kadonongan mo halangkaw para sako,
dai maabot kan sakong pag-isip.
7Saen ako maduman harayo sa saimong Espiritu?
Saen ako madulag harayo sa saimo?
8Sumakat man ako sa langit, yaon ka duman;
humigda man ako sa lulubngan, yaon ka giraray.
9Lumayog man ako pasiring sa sirangan;
o mag-erok sa pinakaharayong lugar kan solnopan,
10maski duman papangenotan mo ako,
aantabayan kan too mong kamot.
11Kun sabihon ko, “Itago logod ako kan diklom,
asin an liwanag sa palibot ko magin banggi,”
12alagad para saimo, an diklom bakong madiklom,
asin an banggi maliwanag siring sa aldaw.
Para saimo, an diklom pareho sana sa liwanag.
13Ika an naglalang sako;
hinaman mo ako sa tulak nin sakong ina.
14Inoomaw taka huli ta maninigo kang galangan.
Ngangalasan an gabos mong gibo;
midbid mo nanggad an buhay ko.
15Kan an sakong mga tolang hinahaman,
maingat na binibilog sa tulak kan sakong ina;
kan hilom akong nagtatalubo duman—
aram mo nang yaon ako duman.
16Nahiling mo na ako bago ako namundag.
An mga aldaw na talaan para sako nakasurat na sa saimong libro,
bago pa lamang poonan an arin man kaiyan.
17O Dios, misteryo para sako an saimong mga kaisipan,
dakul saka dai mabilang!
18Labi pa iyan sa mga baybay kun bilangon ko.
Kan ako magimata, nasa kaibahan mo pa ako.
19O Dios, gadanon mo logod an mga maraot;
rumayo logod sako an mga napapaha sa dugo.
20Minataram sinda nin maraot tumang saimo;
minataram nin maraot tumang sa ngaran mo.#139:20 Sarong traduksyon “Minataram…mo” bako ining malinaw sa Hebreyo.
21 Kagurangnan, anggot ako sa mga naaanggot saimo;
naoongis ako sa mga minatumang saimo.
22Naglalaad nanggad an kaanggotan ko sainda;
ibinibilang ko sinda na mga kaiwal.
23Siyasata ako, O Dios, asin midbida an sakong puso;
baloa ako asin midbida an mga kaisipan ko.
24Hilinga kun igwa nin karatan,
asin daraha ako sa dalan na daing kasagkoran.#139:24 Sa dalan na daing kasagkoran; o sa mga dalan nin sakuyang mga ginikanan.
Currently Selected:
Salmo 139: MBBBIK92
Highlight
Copy
Compare
Share
Want to have your highlights saved across all your devices? Sign up or sign in
Marahay na Bareta Biblia © Philippine Bible Society, 1992.
