Salmo 136
136
Awit nin Pasasalamat
1Magpasalamat kamo sa Kagurangnan, huli ta siya marahayon;
an saiyang pagkamoot mayo nin kataposan.
2Magpasalamat kamo sa Dios nin mga dios;
an saiyang pagkamoot mayo nin kataposan.
3Magpasalamat kamo sa Kagurangnan nin mga kagurangnan;
an saiyang pagkamoot mayo nin kataposan.
4Siya sana an nakakagibo nin darakulang ngangalasan;
an saiyang pagkamoot mayo nin kataposan.
5An mga langit linalang niya sa saiyang kadonongan;
an saiyang pagkamoot mayo nin kataposan.
6An daga itinugdok niya sa ibabaw kan katubigan;
an saiyang pagkamoot mayo nin kataposan.
7Ginibo niya an dakulang mga ilaw;
an saiyang pagkamoot mayo nin kataposan;
8an aldaw tanganing magtao nin liwanag sa bilog na aldaw;
an saiyang pagkamoot mayo nin kataposan;
9an bulan asin an mga bitoon tanganing magtao nin liwanag sa banggi;
an saiyang pagkamoot mayo nin kataposan.
10Mga panganay sa Egipto saiyang ginadan;
an saiyang pagkamoot mayo nin kataposan.
11Ilinuwas niya an Israel hale sa Egipto;
an saiyang pagkamoot mayo nin kataposan;
12huli kan saiyang makosog na kamot, asin mapangyaring takyag;
an saiyang pagkamoot mayo nin kataposan.
13Binanga niya an Dagat na Pula;
an saiyang pagkamoot mayo nin kataposan;
14an saiyang banwaan pinaagi niya sa tahaw kaiyan;
an saiyang pagkamoot mayo nin kataposan;
15alagad an Faraon asin an hukbo kaini linamos niya duman;
an saiyang pagkamoot mayo nin kataposan.
16An saiyang banwaan pinangenotan niya sa kalangtadan;
an saiyang pagkamoot mayo nin kataposan.
17Mapangyaring mga hade saiyang ginaradan;
an saiyang pagkamoot mayo nin kataposan;
18bantog na mga hade saiyang ginaradan;
an saiyang pagkamoot mayo nin kataposan;
19si Sihon, hade kan mga Amoreo;
an saiyang pagkamoot mayo nin kataposan;
20asin si Og, hade nin Basan;
an saiyang pagkamoot mayo nin kataposan.
21An saindang daga itinao niya bilang pamana;
an saiyang pagkamoot mayo nin kataposan;
22pamana ki Israel na saiyang sorogoon;
an saiyang pagkamoot mayo nin kataposan.
23Siya an nakagiromdom kan kita nagkadaraog;
an saiyang pagkamoot mayo nin kataposan;
24ilinigtas niya kita sa satong mga kaiwal;
an saiyang pagkamoot mayo nin kataposan.
25Siya an nagtatao nin kakanon sa gabos na nabubuhay;
an saiyang pagkamoot mayo nin kataposan.
26Magpasalamat kamo sa Dios nin langit;
an saiyang pagkamoot mayo nin kataposan.
Currently Selected:
Salmo 136: MBBBIK92
Highlight
Copy
Compare
Share
Want to have your highlights saved across all your devices? Sign up or sign in
Marahay na Bareta Biblia © Philippine Bible Society, 1992.
