Salmo 135
135
Awit nin Pag-omaw
1Omawon an Kagurangnan!
Omawon an ngaran nin Kagurangnan,
omawon nindo, mga sorogoon nin Kagurangnan,
2na naglilingkod sa harong nin Kagurangnan,
na yaon sa mga patyo kan harong nin satong Dios.
3Omawon an Kagurangnan, huli ta siya marahayon;
mag-awit nin mga pag-omaw sa saiyang ngaran, huli ta siya maugayon.
4Pinili nin Kagurangnan si Jacob para saiya,
si Israel bilang rogaring niya.
5Aram kong dakula an satong Kagurangnan,
mas dakula ki sa gabos na dios-dios.
6Ginigibo niya an anoman na saiyang nawiwilihan,
sa langit asin sa daga,
sa kadagatan asin sa gabos na kairaroman.
7Siya an nagpapaitaas kan mga panganoron hale sa mga poro kan daga;
an naggigibo nin kikilat para sa uran,
asin an nagpapaluwas kan mga doros hale sa saiyang mga sarayan.
8Siya an guminaradan kan mga panganay sa Egipto,
mga panganay nin tawo asin hayop.
9Mga milagro saka ngangalasan ginibo niya duman,
tanganing padusahan an hade asin an gabos na opisyal kaini.
10Rinumpag niya an dakul na nasyon
asin ginadan an mapangyaring mga hade:
11Si Sihon, hade kan mga Amoreo,
si Og, hade nin Basan,
asin an gabos na hade sa Canaan.
12An saindang daga itinao niya bilang pamana,
pamana nin Israel na saiyang banwaan.
13 Kagurangnan, an ngaran mo magdadanay sagkod pa man,
an kabantogan mo sa gabos na panahon.
14Susurogon nin Kagurangnan an saiyang banwaan;
mga sorogoon niya saiyang maheherakan.
15An mga dios-dios kan mga nasyon gibo sa plata asin bulawan,
gibo kan mga kamot nin katawohan.
16Igwang mga ngoso, alagad dai nakakataram;
igwang mga mata, alagad dai nakakahiling.
17Igwang mga talinga, alagad dai nakakadangog;
mayo nin hinangos sa saindang mga ngoso.
18An naggibo sainda magin arog logod sainda;
siring man an gabos na minasarig sainda!
19Banwaan nin Israel, mag-omaw ka sa Kagurangnan;
mga aki ni Aaron, mag-omaw kamo sa Kagurangnan!
20Mga aki ni Levi, mag-omaw kamo sa Kagurangnan;
kamo na may pagkatakot sa Kagurangnan, mag-omaw kamo saiya.
21Hale sa Sion omawon an Kagurangnan,
na nag-eerok sa Jerusalem!
Omawon an Kagurangnan!
Currently Selected:
Salmo 135: MBBBIK92
Highlight
Copy
Compare
Share
Want to have your highlights saved across all your devices? Sign up or sign in
Marahay na Bareta Biblia © Philippine Bible Society, 1992.
