Salmo 132
132
Pag-omaw kan Templo
1 Kagurangnan, giromdoma si David
asin an gabos na sakit na saiyang tinios.
2Giromdoma, Kagurangnan, an saiyang sumpa,
an panuga na ginibo niya saimo, Makakamhan na Dios ni Jacob.
3“Dai ako mapuli sa sakong harong ni mapahingalo sa sakong higdaan;
4dai ako mapahingalo o makatorog,
5sagkod na makakua ako nin lugar para sa Kagurangnan,
sarong harong para sa Makakamhan na Dios ni Jacob.”
6Sa Betlehem nabaretaan mi an manongod sa Kaban nin Tipan,
asin nakua mi ini sa kaomahan nin Jearim.
7Kami nagsabi, “Dumuman kita sa harong nin Kagurangnan;
magsamba kita sa atubangan kan saiyang trono.”
8 Kagurangnan, lumaog ka sa lugar na saimong pinagpapahingaloan, kaiba an Kaban nin Tipan,
na tanda kan saimong kapangyarihan.
9An saimong mga padi magubingan logod nin katanosan;
an saimong mga banal magkurahaw logod sa kaogmahan!
10Huli ki David na saimong sorogoon
hare pagsikwalan an hade na saimong linahidan.
11Sarong panuga an ginibo mo ki David
panuga na dai mo babawion:
“Saro sa mga aki mo an gigibohon kong hade;
siya maghahade bilang kasalihid mo.
12Kun otobon kan mga aki mo an sakuyang tipan,
asin an mga pagboot na itatao ko sainda,
an saindang mga aki matukaw man sa saimong trono sagkod pa man.”
13Huli ta an Sion pinili nin Kagurangnan;
minawot niyang ini an magin saiyang erokan:
14“Ini iyo an sakuyang pahingaloan sagkod pa man;
digdi ako maerok, huli ta ini an sakong kamawotan.
15Dakulang bendisyon an itatao ko sa Sion,
an saiyang mga dukha babasogon ko sa kakanon.
16An saiyang mga padi gugubingan ko nin kaligtasan,
asin an saiyang mga banal makurahaw sa kaogmahan.
17Saro sa mga aki ni David an gigibohon kong dakulang hade sa Sion;
papadanayon ko digdi an pagkanihade kan sakong pinili.
18An mga kaiwal niya gugubingan ko nin kasopogan,
alagad sa saiyang payo, an saiyang korona magkikinang.”
Currently Selected:
Salmo 132: MBBBIK92
Highlight
Copy
Compare
Share
Want to have your highlights saved across all your devices? Sign up or sign in
Marahay na Bareta Biblia © Philippine Bible Society, 1992.
