Mga Talinhaga 8
8
Pag-omaw sa Kadonongan
1Hinanyoga an pag-apod kan kadonongan
asin an pagkurahaw kan pakasabot.
2Nagtitindog an kadonongan sa alitoktok
kan kabubuldan sa may tinampo, asin sa mga pinagsasangahan kan dalan.
3Sa may palaog kan syudad, sa kataed kan mga
trangkahan, nag-aapod an kadonongan:
4“O mga tawo, inaapodan ko kamo!
Inaapodan ko an lambang tawo sa kinaban.
5Kamong mga mangmang, saboton nindo an marahay na hatol;
kamong mga lolong, adalan nindo an marahay na kaisipan.
6Paghinanyog kamo, huli ta mahalagang bagay an itinataram ko;
an gabos kong sinasabi saindo matanos.
7Katotoohan an sinasabi ko;
an kaputikan ikinakauyam ko.
8An lambang tataramon ko totoo;
mayo ini nin sala, mayo nin minadara sa maraot.
9Malinaw ini para sa tawong may pakasabot;
sa madonong, tama ini gabos.
10Pilion nindo an sakong katukdoan embes na plata;
an pakasabot ki sa pinong bulawan.
11“Ako, an kadonongan, orog na marahay ki sa mga alahas;
mayo kamo nin mamawoton na pwedeng ikapantay sako.
12Ako, an kadonongan, igwa nin pakasabot;
igwa ako nin pakaaram saka marahay na hatol.
13An pagkatakot sa Kagurangnan iyo an pagkaongis sa karatan;
ikinakaongis ko an kapalangkawan asin an kapaabaw-abawan,
an mga karatan saka an mga bikong tataramon.
14Minaplano ako saka ginigibo ko iyan.
Igwa ako nin pakasabot asin kosog.
15Tinatabangan ko an mga hade
sa saindang mga palakaw asin an mga pamayo sa paggibo nin tamang mga pagboot.
16An lambang pamayo sa kinaban namamahala huli kan sakong tabang,
siring man an mga gobernador saka an mga ginagalangan na tawo.
17Namomotan ko an namomoot sako;
an naghahanap sako nakakanumpong sako.
18Yaon sako an kayamanan asin an kaomawan, nagdadanay na kayamanan asin kauswagan.
19An bunga ko mas marahay ki sa bulawan, mas marahay ki sa pinong bulawan,
mas marahay ki sa pinakapiling plata.
20Naglalakaw ako sa dalan nin katanosan;
sinusunod ko an mga agihan nin hustisya.
21Tinatawan ko nin kayamanan an mga namomoot sako;
pinapano ko nin kayamanan an saindang harong.
22“Ako an enot na linalang nin Kagurangnan,
an enot sa mga ginibo niya kaidtong panahon.
23Linalang niya ako sa kapinonan,
sa kaenot-enote, bago nagpoon an kinaban.
24Namundag ako kan mayo pa an kadagatan,
kan mayo pa an mga burabod nin tubig.
25Namundag ako bago an kabukidan,
bago ibinugtak sa tamang lugar an kabubuldan,
26bago ginibo nin Dios an daga asin an kaomahan kaiyan;
enot ako maski sa naenot na alpog kan kinaban.
27Idtoon ako duman kan lalangon niya an kalangitan,
kan palibotan niya nin orisonte an ibabaw kan dagat.
28Idtoon ako kan an mga panganoron ibinugtak niya sa langit,
kan bukasan niya an mga burabod kan kairaroman,
29kan itao niya sa dagat an pagdolonan kaiyan,
tanganing an katubigan dai maglapas sa saiyang pagboot,
kan ibugtak niya an pundasyon kan daga.
30Nasa kataed niya ako, arog sa sarong arkitekto.#8:30 Sarong arkitekto; o sarong sadit na aki.
Ako an kaogmahan niya aroaldaw,
asin sa atubang niya, ako danay na nag-oogma—
31nag-oogma sa saiyang kinaban,
asin nawiwili sa katawohan.
32“Kaya ngunyan, mga aki ko, hinanyoga nindo ako.
Giboha nindo an sinasabi ko, asin magigin maogma kamo.
33Maghinanyog kamo sa katukdoan, asin magigin madonong kamo;
dai nindo pagpabayaan an katukdoan.
34Paladan an tawong naghihinanyog sako,
na aroaldaw nagbabantay sa sakuyang mga trangkahan,
na naghahalat sa may pintoan kan sakong harong.
35Huli ta an nakakakua sako, nakakakua nin buhay,
asin nawiwilihan siya nin Kagurangnan.
36An dai nakakakua sako, nagkukulog sa sadiri;
an naoongis sako, namomoot sa kagadanan.”
Currently Selected:
Mga Talinhaga 8: MBBBIK92
Highlight
Share
Compare
Copy
Want to have your highlights saved across all your devices? Sign up or sign in
Marahay na Bareta Biblia © Philippine Bible Society, 1992.
