Mga Talinhaga 9
9
An Kadonongan saka an Kamangmangan
1Nagtugdok kan saiyang harong an kadonongan asin naggamit siya nin pitong harigi. 2Nagbuno siya nin hayop, nagtimpla nin arak, saka inandam an lamesa. 3Sinugo niya an saiyang mga sorogoon na babae na magduman sa pinakahalangkaw na lugar kan banwa tanganing mag-apod nin siring: 4“Magdigdi an siisay man na mangmang!” Dangan an lolong sinasabihan niya, 5“Madya, kakana an sakong tinapay asin inoma an tinimpla kong arak. 6Bayae an kamangmangan, asin mabubuhay ka. Sunoda an dalan nin pakaaram.”
7An nagsasaway sa paratuyatuya, maani nin pagtuyatuya; an minasagwe sa maraot na tawo makakakua nin kulog nin hawak. 8Dai mo pagsawayon an paratuyatuya huli ta maoongis siya saimo. Sagweon mo an tawong madonong, asin mamomoot siya saimo; 9tukdoe an tawong matanos, asin madakula an saiyang pakanood.
10An pagkatakot sa Kagurangnan iyo an kapinonan nin kadonongan; an pagmidbid sa an Banal minatao nin pakasabot. 11Huli sako, madakul an saimong mga aldaw asin mahalawig an saimong buhay. 12Kun igwa ka nin kadonongan, ika man sana an magkikinabang, alagad magtitios ka kun isikwal mo iyan.
13An kalolongan nakakaarog sa sarong babae na maribok, mangmang saka mayo nin sopog.#9:13 Sa Hebreyo, an bersikulo 13 bakong malinaw. 14Nagtutukaw siya sa pintoan kan harong niya, o sa sarong tukawan sa pinakahalangkaw na lugar sa banwa, 15dangan nag-aapod sa mga nag-aaragi, na naghihidali sa saindang paglakaw: 16“Pumadigdi an siisay man na mangmang!” An lolong sinasabihan niya, 17“Mahamis an tubig na hinabonan saka masiram an hinabonan na tinapay.” 18Alagad dai aram kan saiyang mga biktima na kagadanan an idtoon sa saiyang harong, na an saiyang mga nagin bisita yaon na ngunyan sa irarom, sa kinaban kan mga gadan.
Currently Selected:
Mga Talinhaga 9: MBBBIK92
Highlight
Share
Copy
Want to have your highlights saved across all your devices? Sign up or sign in
Marahay na Bareta Biblia © Philippine Bible Society, 1992.
