Mga Talinhaga 7
7
1Aki ko, giromdoma an sakong mga sinasabi, asin dai mo nanggad paglingawan an ipinapagibo ko saimo. 2Otoba an sakong mga pagboot asin mabubuhay ka. An sakong katukdoan ingatan mo arog kan pag-ingat mo sa saimong mga mata. 3Ibugkos mo iyan sa saimong mga muro asin isurat mo sa saimong puso. 4Sabihan mo an kadonongan, “Tugang takang babae,” asin an pakasabot apodon mong namomotan na katood. 5Ililikay ka ninda sa babaeng may agom, sa babaeng may mahahamis na mga tataramon.
An Maraot na Babae
6Nagdudungaw ako kaidto sa bintana kan sakong harong, 7asin nahiling ko an dakul na mayong eksperyensyang mga hoben na lalaki, alagad may namasdan akong sarong lolong na hoben. 8Naglalakaw siya sa tinampo, harani sa kantong ineerokan nin sarong babae, 9sa kadikloman nin banggi. 10Dangan sinabat siya kan babae; nakagubing ini nin sa maraot na babae, asin katusohan an nasa puso kaini. 11Makosog an saiyang boot asin mayo nin sopog. Danay siyang nasa mga tinampo 12o nagtitindog sa sarong kanto, kun minsan sa mga tinampo, kun minsan sa saodan. 13Pinugol kan babae an hoben asin hinadokan, dangan daing sopog na nagsabi, 14“Nagdolot ako nin mga atang ngunyan na aldaw, asin igwa ako kan karneng hale sa mga sakripisyo. 15Kaya nagluwas ako tanganing hanapon ka, asin ngunyan nanumpongan taka! 16Hinapinan ko an sakong higdaan nin linong hale sa Egipto na manlaen-laen an kolor. 17An sakong higdaan winisikan ko nin pahamot na mira, aloe, asin kanela. 18Madya, lunodon ta an satong sadiri sa kaogmahan; uboson ta an bilog na banggi sa pagkamoot. 19Mayo sa harong an sakong agom. Naghale siya asin harayo an lugar na saiyang dudumanan. 20Nagdara siya nin dakul na kwarta; mapuli siya pakalihis nin duwang semana.” 21Huli kan mga tataramon na nandadagka, nagsuko an hoben. 22Nagsunod tolos siya sa babae arog sa bakang bubunoon, arog sa usa na naglulukso pasiring sa litag, 23saen malagbas sa saiyang puso an sarong bosog. Arog siya sa sarong gamgam na naglalaog sa sarong hikot; dai niya naaaraman na nasa pag-alaman an saiyang buhay.
24Kaya ngunyan, mga aki ko, hinanyoga nindo ako. Himatea nindo nin marahay an mga tataramon ko. 25An saindong puso dai nindo pagtugotan na madagka kan siring na babae; dai kamo maglagalag pasiring sa saiyang harong. 26Huli ta kadakul nang lalaki an rinaot niya, asin dai na mabilang an nagkagaradan huli saiya. 27Kun magduman ka sa saiyang harong, nasa dalan na kamo pasiring sa kinaban kan mga gadan. Iyo iyan an halipot na agihan pasiring sa kagadanan.
Currently Selected:
Mga Talinhaga 7: MBBBIK92
Highlight
Share
Compare
Copy
Want to have your highlights saved across all your devices? Sign up or sign in
Marahay na Bareta Biblia © Philippine Bible Society, 1992.
