Mga Talinhaga 5
5
Patanid Laban sa Pakidorog sa Bakong Agom
1Aki ko, himatea nin marahay an sakong kadonongan asin dangoga an sakong pakasabot, 2tanganing maaraman mo an tamang gawe, asin mahayag na ika igwa nin pakaaram sa saimong mga tataramon. 3Huli ta maski nagtatagdo nin dugos an mga ngabil kan agom nin ibang lalaki, asin mas mahalnas pa ki sa lana an saiyang dila, 4alagad sa kataposan, mapait siya arog sa apdo, matarom arog sa espadang duwa an tarom. 5An saiyang mga bitis minapasiring sa kagadanan; an saiyang mga lakad minapasiring sa kinaban kan mga gadan. 6Dai niya sinisiyasat an dalan pasiring sa buhay; nalalagalag siya, alagad dai niya iyan naaaraman.
7Kaya ngunyan, mga aki ko, maghinanyog kamo sako, asin dai nindo paglingawan an sakong mga tataramon. 8Maglikay kamo sa siring na babae! Dai kamo magrani maski sa pintoan kan saiyang harong! 9Huli ta kun gibohon nindo iyan, mawawaraan kamo nin onra asin iyan mapapaduman sa iba; hoben pa kamong magagadan sa kamot kan mga mayong herak na tawo. 10An kayamanan nindo uuboson kan mga dayuhan; an pinagalan nindo, iba an makinabang. 11Matatapos an saindong buhay sa pag-agrangay; matutunaw an saindong laman asin hawak. 12Masabi kamo, “Tadaw ta ikinaongis ko an saindang mga hatol? Tadaw ta isinikwal ko an saindang mga pagsagwe? 13Dai ko dinangog an tingog kan sakong mga paratukdo, ni tinawan nin halaga an saindang katukdoan. 14Ngunyan naaraman kong mayo ako nin onra sa atubang nin mga tawo.”
15Magin maimbod ka sa sadiri mong agom; siya sana an tawan mo kan saimong pagkamoot. 16Mayo nin ikakataong karahayan saimo an mga aki sa bako mong tunay na agom. 17An saimong mga aki dapat na magdarakula tanganing tabangan ka asin bakong an mga dayuhan. 18Kaya makontento ka sa saimong agom, asin hanapon mo an saimong kaogmahan sa babaeng saimong inagom. 19Saro siyang magayon saka mabining babae. Danay na ikaogma mo an saiyang kabinian; mapano ka kan saiyang pagkamoot. 20Aki ko, tadaw ta itatao mo an saimong pagkamoot sa ibang babae? Tadaw ta orog na papahalagahan mo an karinyo kan agom nin ibang lalaki? 21Nahihiling nin Dios an gabos mong gibo. Saen ka man magduman namamasdan ka niya. 22Sarong siod an mga kasalan kan tampalasan, asin nadadakop siya sa hikot kan sadiri niyang kasalan. 23Nagagadan siya huli ta mayo siya nin pakapugol sa sadiri. An dakula niyang kalolongan iyo an madara saiya sa sadiri niyang lulubngan.
Currently Selected:
Mga Talinhaga 5: MBBBIK92
Highlight
Share
Compare
Copy
Want to have your highlights saved across all your devices? Sign up or sign in
Marahay na Bareta Biblia © Philippine Bible Society, 1992.
