Mga Talinhaga 31
31
Hatol sa sarong Hade
1Iyo ini an mga itinukdo ki Hadeng Lemuel kan saiyang ina:
2“Ika an sakong namomotan na aki, an kasimbagan sa sakong mga pamibi. Ano an sasabihon ko saimo? 3Dai mo pagsayangon an saimong kosog sa mga babae asin an saimong kwarta sa sainda; ipapahamak ninda an hade. 4Lemuel, an mga hade dai dapat na mag-inom nin arak, ni magmawot nin makosog na inomon. 5Kun sinda nabuburat, nalilingawan ninda an katogonan asin napapabayaan an deretso kan mga mayong sukat. 6Itao mo an arak sa mga naghihingagdan asin sa mga nasasakitan. 7Pabayae sindang mag-inom asin malingawan an saindang kadukhaan saka kamondoan.
8“Magpahayag ka para sa mga tawo na dai nakakapahayag kan saindang sadiri. Ipakilaban mo an deretso kan gabos na dai kayang makilaban. 9Magpahayag ka para sainda asin magin saro kang matanos na hukom. Ipakilaban mo an deretso kan dukha asin kan mayong sukat.”
An Marahay na Agom na Babae
10Masakit an paghanap nin marahay na agom na babae? Mas mahalaga siya ki sa mga alahas.
11May pagsarig saiya an saiyang agom asin dai ini magkukulang nin kakanon.
12Mantang siya nabubuhay, gabos karahayan an itinatao niya sa saiyang agom asin bakong karatan.
13Mahigos siyang maggibo nin mga gubing na lana saka lino.
14Arog kan barkong pangnegosyo, nagdadara siya sa saiyang harong nin mga kakanon na hale sa hararayong lugar.
15Bago magsirang an aldaw minabangon na siya tanganing andamon an kakanon kan saiyang pamilya, asin tanganing taraman an saiyang mga sorogoon na babae kan dapat nindang gibohon.
16Maingat niyang hinihiling an sarong oma bago binabakal iyan. Dangan minapagibo siya nin ubasan hale sa kwartang saiyang natipon.
17Siya maigot sa pagtrabaho, makosog, saka mahigos.
18Naaaraman niya an halaga kan lambang ginigibo niya, asin maski matanga na an banggi nagtatrabaho pa siya.
19Naggigibo siya nin torsido saka naghahabol nin sadiring gubing.
20Matinao siya sa dukha saka sa mayong sukat.
21Dai siya nahahadit kun tiglipot huli ta an saiyang pamilya igwa nin mahimbong na gubing.
22Naggigibo siya nin mga kubrekama asin nagsusulot siya nin gubing na pinong purpurang lana.
23An saiyang agom minimidbid kan banwaan asin saro siya sa mga ginagalangan na tawo.
24Naggigibo siya nin mga gubing saka mga habay, dangan ipinapabakal iyan sa mga negosyante.
25Makosog siya saka ginagalangan; dai siya natatakot kan maabot na aldaw.
26Nagtataram siya na may mahuyong kadonongan.
27Dai siya nag-oontok sa pagtrabaho aroaldaw asin minamangno niya an mga pangangaipo kan saiyang pamilya.
28Ginagalangan siya kan saiyang mga aki, asin inoomaw kan saiyang agom.
29Minasabi an saiyang agom, “Kadakul na babae an marahay na agom, alagad ika an nangongorog sainda.”
30Madaya an karinyo asin nawawara an gayon, alagad an babae na may pagkatakot sa Kagurangnan dapat na omawon.
31Tawan mo siya nin kaomawan huli kan saiyang mga ginibohan. Maninigong galangan siya kan lambang saro.
Currently Selected:
Mga Talinhaga 31: MBBBIK92
Highlight
Copy
Compare
Share
Want to have your highlights saved across all your devices? Sign up or sign in
Marahay na Bareta Biblia © Philippine Bible Society, 1992.
