Parahulit 1
1
An Buhay mayo nin Halaga
1Iyo ini an mga tataramon kan Parahulit, na aking lalaki ni David na hade sa Jerusalem.
2Mayong halaga an buhay, an sabi kan Parahulit. Mayo nin halaga an gabos na bagay. An buhay mayo nin halaga! Mayo nin halaga an gabos. 3Ano an napapakinabang nin tawo sa gabos niyang ginigibo sa kinaban? 4Minaagi an sarong henerasyon, asin minadatong an saro pa, alagad an kinaban nagdadanay sagkod lamang. 5An aldaw minasirang dangan minasolnop, asin hidaling minabalik sa lugar na sinisirangan kaiyan. 6An doros minahuyop pasiring sa habagat, asin minalibot pasiring sa amihan; pabalik-balik sana an doros. 7An gabos na salog minabulos pasiring sa dagat, alagad dai ini napapano. An tubig minabalik sa mga salog, tanganing padagos naman na magbulos. 8An gabos na bagay pano nin kapagalan; anoman an itaram nin tawo dai iyan nanggad ikapaliwanag. An mata dai nakokontento sa paghiling; siring man an talinga sa pagdangog. 9An nangyari kaidto, mangyayari giraray, asin an ginibo kaidto, gigibohon giraray. Mayo nin anoman na bago sa kinaban. 10Igwa nin masabing, “Hilinga, bago ini!” Alagad bako, huli ta haloy nang nangyari iyan bago pa kita namundag. 11Mayo nin nakakagiromdom kan mga nangyari na, asin an mga mangyayari poon ngunyan dai man magigiromdoman ngapit.
An Eksperyensya kan Parahulit
12Ako, an Parahulit, nagin hade nin Israel sa Jerusalem. 13Hiningowa kong siyasaton asin adalan an gabos na bagay na ginigibo sa kinaban na ini.
Mamondong palad an itinao nin Dios sa sato. 14Nahiling ko na an gabos na ginibo sa kinaban na ini, asin sinasabihan ko kamo; an gabos mayo nin halaga; garo saro sana iyan na paglamag sa doros. 15Dai man napapatanos an tiko, asin an mayo dai man nabibilang.
16Nagsaboot ako, “Nakamtan ko an dakulang kadonongan, orog ki sa gabos na naenot sako na naghade sa Jerusalem. Aram ko kun ano mananggad an kadonongan asin an pakaaram.” 17Hiningowa kong saboton an kalaenan kan pakaaram asin kalolongan, kan kadonongan saka karungawan. Alagad nahiling ko na arog man giraray ini sa paglamag sa doros. 18Kun mas madonong ka, mas dakul man an saimong kahaditan; kun mas dakul an saimong naaaraman, mas dakul man an saimong kamondoan.
Currently Selected:
Parahulit 1: MBBBIK92
Highlight
Copy
Compare
Share
Want to have your highlights saved across all your devices? Sign up or sign in
Marahay na Bareta Biblia © Philippine Bible Society, 1992.
