Mga Talinhaga 30
30
An mga Tataramon ni Agur
1Iyo ini an mga tataramon ni Agur na aking lalaki ni Jake:
“Dai ko kaibahan an Dios, asin mayo ako nin magiginibo.#30:1 Probableng teksto Dai…magiginibo; sa Hebreyo, bako ining malinaw.
2Saro akong mangmang, dai
maninigo na magin tawo;
maski kaisipan nin tawo, mayo ako.
3Mayo ako nin nanodan na kadonongan,
mayo ako nin naaaraman manongod sa Dios.
4Siisay an nagsakat sa langit dangan naghilig?
Siisay an nakapugol kan doros sa saiyang mga kamot?
Siisay an nakapatos kan katubigan sa sarong pedaso nin tela?
Siisay an nagbugtak kan mga pagdolonan kan kinaban?
Siisay siya, kun aram mo? Siisay an saiyang aking lalaki?
5“Inootob nin Dios an lambang panuga na saiyang ginibo. Siya an kalasag kan gabos na nagpapaili saiya. 6Dai mo pagdugangan an saiyang mga tataramon, ta tibaad tuyawon ka niya dangan ipahiling niya na saro kang putikon.”
Dagdag na mga Talinhaga
7O Dios, duwang bagay an hahagadon ko saimo bago ako magadan: 8dai mo ako pagpabayaan na magin putikon asin dai mo ako pagpayamanon o pagin dukhaon. Itao mo sako an maninigo ko sanang kakanon. 9Kun ako magyaman tibaad makapagsabi ako na dai taka kaipuhan. Alagad kun ako magin dukha, tibaad manghabon ako asin matawan ko nin kasosopgan an sakong Dios.
10Dai mo pagpakaraoton an sarong sorogoon sa saiyang kagurangnan. Tibaad maldisyonon ka niya saka pabayadon huli kan ginibo mo.
11Igwa nin mga tawo na minamaldisyon sa saindang ama asin dai minaomaw sa saindang ina.
12Igwa nin mga tawo na naghohona na sinda malinig, alagad dai man ninda nalilinig an saindang ati.
13Igwa nin mga tawo na mapaabaw-abaw—naghohona sinda na sinda marahay.
14Igwa nin mga tawo na makuring nagbebentahe sa dukha asin sa daing sukat; sa paaging iyan sinda nabubuhay.
15An linta igwa nin duwang aking babae, asin pareho sinda may ngaran na “Tawan mo ako!”
Igwa nin apat na bagay na dai nakokontento:
16An kinaban kan mga gadan,
an babaeng mayong aki,
an alang na daga na nangangaipo nin uran,
asin an kalayo na nagkakaraba.
17An siisay man na nag-oolog-olog sa saiyang ama o nagsisikwal sa saiyang ina sa paggurang kan mga ini dapat na ipakakan sa mga bwitre o ipatuka an mga mata sa mga uwak.
18Igwa nin apat na bagay na makangangalas asin dai ko nasasabotan:
19an agila na naglalayog sa kalangitan,
an halas na nagkakanap sa ibabaw nin gapo,
an barko na naglalayag sa kadagatan,
asin an lalaki saka babae na nagkakaminootan.
20Siring kaini an ginigibo kan babaeng nagpapasambay: nakikidorog siya sa lalaki, minakarigos, dangan minasabi, “Mayo ako nin ginibong maraot!”
21Igwa nin apat na bagay na dai matitios kan kinaban:
22an oripon na nagin hade,
an lolong na igwa kan boot niyang kakanon,
23an makauuyam na babae na naagom,
asin an sorogoon na babae na nakasalihid sa saiyang kagurangnan na babae.
24Sa kinaban igwa nin apat na saradit na hayop, alagad madonong nin marahay:
25An mga tanga: maluluya sinda, alagad sinasaray ninda an saindang kakanon kun tig-init.
26An mga kuneho: bako sinda
makosog, alagad ginigibo ninda
an saindang mga harong sa kagapoan.
27An mga doron: mayo sinda nin hade, alagad nag-iiribahan sinda sa paglakaw.
28An mga tagaw: pwede mong kapotan,
alagad mahihiling mo sinda sa
mga palasyo.
29Igwa nin apat na bagay na magayon pagmasdan mantang naglalakaw:
30an leon, an pinakamakosog sa gabos na hayop asin dai natatakot sa kiisay man;
31an kanding, an mabaskog na solog na manok,
asin an mga hade sa atubang kan
saindang nasasakopan.
32Kun sa kalolongan mo nagin mapaabaw-abaw ka, asin nagpaplano ka nin maraot, mag-ontok ka saka maghorophorop! 33Kun magbate ka nin gatas, magkakaigwa ka nin mantikilya. Kun suntokon mo an dungo kan saimong kapwa, madugo iyan. Kun paanggoton mo an saimong kapwa, mapapahamak ka.
Currently Selected:
Mga Talinhaga 30: MBBBIK92
Highlight
Copy
Compare
Share
Want to have your highlights saved across all your devices? Sign up or sign in
Marahay na Bareta Biblia © Philippine Bible Society, 1992.
