Mga Talinhaga 29
29
1An tawong habong magdangog kun sinasaway, mahuhulog asin dai na makakabangon pag-abot kan panahon.
2Kun an matanos iyo an nagkakapot kan kapangyarihan, nag-oogma an banwaan; alagad kun an maraot iyo an namamayo, nag-aagrangay an katawohan.
3An namomoot sa kadonongan minapaogma kan saiyang ama; alagad an nakikiiba sa mga babaeng maraot nagtatapok kan saiyang kabuhayan.
4Kun may pagmakulog an hade sa hustisya, nagigin pusog an nasyon; alagad kun kwarta sana an saiyang pinagmamakulogan, raraoton niya an saiyang banwaan.
5An tawong sagin-sagin na nag-oomaw sa saiyang mga katood, nagbubugtak nin litag para sa saiya man sana.
6An maraot nadadakop sa sadiring kasalan, mantang an matanos nag-aawit asin nag-oogma.
7Minimidbid kan matanos an deretso kan dukha, alagad dai iyan nasasabotan kan mga maraot.
8An mapaabaw-abaw minaparibok kan bilog na banwaan, alagad pinapara kan mga madonong an kaanggotan.
9Kun an madonong makipagdiskutiran sa sarong lolong, pagngingisihan sana siya kaini asin pag-oolog-ologon.
10Ikinakaongis kan mga madahas an tawong onesto, alagad susurogon kan matanos an siring na tawo.
11Hayag kun maanggot an mangmang, alagad mayong girong na pinupugol kan madonong an saiyang kaanggotan.
12Kun an sarong pamayo maghinanyog sa kaputikan, magigin putikon an gabos niyang opisyal.
13Magkapareho sa sarong bagay an dukha asin an nang-aapi—pareho sinda tinawan kan Kagurangnan nin pakahiling.
14Kun sinusurog kan hade an deretso kan dukha, maghahade siya sa halawig na panahon.
15An pagsaway asin pagdisiplina marahay para sa aki. Alagad kun siya pabayaan sa saiyang kamawotan, ikakasopog siya kan saiyang ina.
16Kun an maraot iyo an nagkakapot nin kapangyarihan, nagdadakul an krimen. Alagad mahihiling kan mga matanos an pagbagsak kan mga tawong iyan.
17Disiplinahon mo an saimong aki, asin tatawan ka niya nin kapahingaloan. An saimong puso tatawan niya nin kaogmahan.
18An nasyon na mayo kan pangenot nin Dios, sarong nasyon na mayo nin katoninongan. Paladan an tawo na nag-ootob kan katogonan!
19Dai mo pagdisiplinahon an saimong sorogoon sa paagi nin tataramon, huli ta maski masabotan niya iyan, dai niya iyan ootobon.
20Mas may paglaom an sarong mangmang ki sa tawong basta na sana minataram.
21Kun magpoon sa pagkaaki itao mo sa saimong sorogoon an gabos niyang magustohan, maabot an panahon na mapapasaiya an gabos mong nasasadirihan.
22An tawong madaling maanggot iyo an nagigin dahelan nin dakul na pag-iriwal asin karibokan.
23An mabagsak sa tawo iyo an saiyang kapaabaw-abawan, alagad an mapakumbaba mag-aako nin kaomawan.
24An kaiba kan mahabon naoongis sa sadiri niyang buhay huli ta papadusahan siya kan hukom kun magsabi siya kan katotoohan, asin mamaldisyonon siya nin Dios kun dai niya gibohon iyan.
25An pagkatakot sa sasabihon kan ibang tawo iyo an mapahamak saimo, alagad an pagsarig sa Kagurangnan iyo an maligtas saimo.
26Dakul an nagmamawot na mawilihan sinda kan hade, alagad sa Kagurangnan sana pwede kang makakua nin hustisya.
27An tampalasan ikinakaongis kan matanos, asin an matanos ikinakaongis kan tampalasan.
Currently Selected:
Mga Talinhaga 29: MBBBIK92
Highlight
Copy
Compare
Share
Want to have your highlights saved across all your devices? Sign up or sign in
Marahay na Bareta Biblia © Philippine Bible Society, 1992.
